କଳାହାଣ୍ଡି, ୧୯/୦୨: ନୂଆ କୁଣିଆଙ୍କୁ ବାଟୋଇ ଦେବାକୁ ଯିବା ବେଳେ ଅଘଟଣ। ମୁଣ୍ଡ ଉପରେ ଛିଣ୍ଡି ପଡିଲା ତାର। ଚାଲିଗଲା ୨ ଜଣଙ୍କ ଜୀବନ। ଆଉ ଜଣେ ଗୁରୁତର ଅବସ୍ଥାରେ ଚିକିତ୍ସାଧୀନ। କଳାହାଣ୍ଡି ଜିଲ୍ଲା ଲାଞ୍ଜିଗଡ ବ୍ଲକ ଦାନିକାପେଲ ଗାଁରେ ଘଟିଛି ଏଭଳି ଅଭାବନୀୟ ଘଟଣା। 

ସୂଚନାନୁଯାୟୀ, ଲାଞ୍ଜିଗଡ ବ୍ଲକ ଦାନିକାପେଲ ଗାଁର ଡଙ୍ଗେ ମାଝୀ ଏବଂ ଟିଙ୍ଗୁ ମାଝୀଙ୍କ ଘରକୁ ପାଖ ଗାଁରୁ କାଙ୍ଗା ମାଝୀ ନାମକ ଜଣେ ବ୍ୟକ୍ତି ନୂଆ କୁଣିଆ ହୋଇ ଆସିଥିଲେ। ସେ ଯିବା ବେଳେ ଡଙ୍ଗେ ମାଝୀ ଏବଂ ଟିଙ୍ଗୁ ମାଝୀ ତାଙ୍କୁ ବାଟୋଇ ଦେବାକୁ ଯାଇଥିଲେ। କିନ୍ତୁ ବାଟରେ ସେମାନଙ୍କ ଉପରେ ଏକ ୧୧ କେଭି ତାର ଛିଣ୍ଡି ପଡିଥିଲା। ଫଳରେ ୩ ଜଣ ଗୁରୁତର ହୋଇଥିଲେ। ସେମାନଙ୍କୁ ବିଶ୍ୱନାଥପୁର ଡାକ୍ତରଖାନାକୁ ନିଆଯାଇଥିଲା। ହେଲେ ଡାକ୍ତର ସେଠାରେ କାଙ୍ଗା ମାଝୀ ଓ ଟିଙ୍ଗୁ ମାଝୀଙ୍କୁ ମୃତ ଘୋଷଣା କରିଥିଲେ। ଡଙ୍ଗେଙ୍କ ଅବସ୍ଥା ଗୁରୁତର ହେବାରୁ ତାଙ୍କୁ ଭବାନୀପାଟଣା ଜିଲ୍ଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ବିଦ୍ୟୁତ ବିଭାଗର ଚରମ ଅବହେଳା ଯୋଗୁଁ ଏଭଳି ଘଟିଥିବା କୁହାଯାଉଛି।