ନୂଆଦିଲ୍ଲୀ,୨୭/୮:ଗତକାଲି ମଧ୍ୟ ବୁର୍କିନା ଫାସୋରେ ହୋଇଥିବା ଆତଙ୍କବାଦୀ ଆକ୍ରମଣରେ ୨୦୦ ଲୋକଙ୍କ ମୃ୍ତ୍ୟୁ । ବୁର୍କିନା ଫାସୋରେ ଅଲ କାଏଦା ସହ ଜଡିତ ଆତଙ୍କବାଦୀ ଗୋଷ୍ଠୀ ଜାମାତ ନୁସରତ ଅଲ-ଇସଲାମ ବାଲ-ମୁସଲିମିନ (JNIM) ଏହି ଘଟଣା ପାଇଁ ଦାୟୀ ବୋଲି କୁହାଯାଉଛି । ଏଥିରେ ୨୦୦ ଲୋକଙ୍କର ମୃତ୍ୟୁ ହୋଇଥିବା ବେଳେ ସେଥିରେ ସାଧାରଣ ନାଗରିକ ଓ ସୁରକ୍ଷାକର୍ମୀ ମଧ୍ୟ ସାମିଲ ଥିଲେ। ସେହିପରି ଏଥିରେ ୧୪୦ଜଣ ଆହତ ହୋଇଥିବା ମଧ୍ୟ ସୂଚନା ମିଳିଛି। ତେବେ ଏହି ଘଟଣା ରଣନୀତିକ ସହର କାୟାର ୪୦ କିଲୋମିଟର ଉତ୍ତରରେ ଅବସ୍ଥିତ ବାର୍ସାଲଗୋରେ ଘଟିଛି | 

ଖବର ଅନୁଯାୟୀ, ଆତଙ୍କବାଦୀମାନେ ସୁରକ୍ଷାକର୍ମୀଙ୍କ ଏକ ସମୂହ ଉପରେ ଗୁଳି ଚଳାଇଥିଲେ । ଏହି ଆକ୍ରମଣରେ ଅନେକ ସୈନିକ ନିଖୋଜ ହୋଇଥିବା ବେଳେ ଆତଙ୍କବାଦୀମାନେ ସେମାନଙ୍କ ଅସ୍ତ୍ରଶସ୍ତ୍ର ଓ ସୈନ୍ୟ ଆମ୍ବୁଲାନ୍ସକୁ ଜବତ କରିଥିଲେ। ତେବେ ଜେଏନଆଇଏମ ଆକ୍ରମଣ ପର  କିଛି ଭିଡିଓ ସେୟାର କରି ନିଜ ଦୋଷ ମାନିଛି। ସେପଟେ ଆହତଙ୍କ ଚିକିତ୍ସା ପାଇଁ କାୟାରୁ ଡାକ୍ତରୀ ଦଳ ଡକାଯାଇଥିଲା। ଖବର ଅନୁଯାୟୀ ବୁର୍କିନା ଫାସୋ ସେନା ସମ୍ଭାବ୍ୟ ଆକ୍ରମଣ ବିଷୟରେ ଜାଣିଥିଲା ଏବଂ ଖାଲ ଖୋଳିବାରେ ସାହାଯ୍ୟ କରିବାକୁ ଲୋକଙ୍କୁ ଆହ୍ବାନ ଦେଇଥିଲେ । ନ୍ୟୁଜ୍ ସେଣ୍ଟ୍ରାଲ୍ ଆଫ୍ରିକା ଅନୁଯାୟୀ , ବୁର୍କିନା ଫାସୋ ବାହିନୀ ଏକ ବିବୃତ୍ତିରେ କହିଛି ଯେ, ଆତଙ୍କବାଦୀ ଆକ୍ରମଣ ଯୋଗୁଁ ଆକ୍ରମଣର ଗମ୍ଭୀରତା ଏବଂ ମୃତ୍ୟୁ ସଂଖ୍ୟା ଅଧିକ ସତ୍ତ୍ୱେ ସଶସ୍ତ୍ର ବାହିନୀ ଏହି ଆକ୍ରମଣର ମୁକାବିଲା କରିବାରେ ସଫଳ ହୋଇଥିଲେ ଏବଂ ଅନେକ ଆତଙ୍କବାଦୀଙ୍କୁ ନିରପେକ୍ଷ କରିଥିଲେ।