ନୂଆଦିଲ୍ଲୀ,୩୦/୦୫: ଭାରତ ସରକାର ନୌସେନା ନିମନ୍ତେ ଫ୍ରାନ୍ସରୁ୨୬ଟି ରାଫେଲ-ଏମ୍ ଯୁଦ୍ଧ ବିମାନ କିଣିବାକୁ ଯାଉଛନ୍ତି । ଏଥିପାଇଁ ଖୁବଶୀଘ୍ର ଚୁକ୍ତି ସ୍ୱାକ୍ଷର ହେବ । ଖବର ମୁତାବକ ଗୁରୁବାର ଫ୍ରାନ୍ସ ସରକାରଙ୍କ ପ୍ରତିନିଧି ଏବଂ ଡାସଲ୍ଟ କମ୍ପାନିର ଅଧିକାରୀ ଭାରତ ଆସିବେ। ଏହାପରେ ପ୍ରତିରକ୍ଷା ମନ୍ତ୍ରଣାଳୟର ଠିକା ବୁଝାମଣା କମିଟି ସହ ଚୁକ୍ତି ନିମନ୍ତେ ଆଲୋଚନା କରିବେ । ଏଥିପାଇଁ ୫୦ ହଜାର କୋଟି ଟଙ୍କାର ରାଜିନାମା ହେବା ନେଇ ସମ୍ଭାବନା ରହିଛି । ଏଥିରେ ଫ୍ରାନ୍ସ ପକ୍ଷରୁ ଭାରତକୁ ରାଫେଲ-ଏମ୍ ଯୁଦ୍ଧ ବିମାନ ସହ ଅସ୍ତ୍ରଶସ୍ତ୍ର, ସିମୁଲେଟର, କ୍ରୁ ନିମନ୍ତେ ତାଲିମ ଏବଂ ଲଜିଷ୍ଟିକ୍ସ ସପୋର୍ଟ ଆଦି ଅନ୍ତର୍ଭୁକ୍ତ ।
ଗୁରୁବାର ହେବାକୁ ଥିବା ବୈଠକରେ ନୌସେନା ଅଧିକାରୀ ବି ସାମିଲ ହେବେ । ସେମାନଙ୍କ ଆବଶ୍ୟକତା ଅନୁସାରେ ବିମାନ ଅର୍ଡର ଦିଆଯିବ । ଚଳିତ ଆର୍ଥିକବର୍ଷ ଶେଷ ସୁଦ୍ଧା ଆଲୋଚନା ଶେଷ ହେବ ଏବଂ ବୁଝାମଣା ସ୍ୱାକ୍ଷର ଲାଗି ଉଦ୍ୟମ କରାଯିବ । ତେବେ ଚୀନ୍ ସହ ମୁକାବିଲା ନିମନ୍ତେ ଭାରତ ମହାସାଗରରେ ରାଫେଲ୍-ଏମ୍ ଜେଟ୍ଗୁଡ଼ିକୁ ମୁତୟନ କରାଯିବା ନେଇ ଲକ୍ଷ୍ୟ ରହିଛି । ନୌସେନା ନିମନ୍ତେ କିଣାଯିବାକୁ ଥିବା ୨୨ ସିଙ୍ଗଲ୍ ସିଟ୍ବିଶିଷ୍ଟ ରାଫେଲ୍-ଏମ୍ ଏବଂ ୪ ଡବଲ୍ ଟ୍ରେନର୍ ସିଟ୍ବିଶିଷ୍ଟ ରାଫେଲ୍-ଏମ୍ ଜେଟ୍ ଭାରତ ମହାସାଗରରେ ଆଇଏନ୍ଏସ୍ ବିକ୍ରାନ୍ତରେ ମୁତୟନ କରାଯିବ ।
ଗତବର୍ଷ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଫ୍ରାନ୍ସ ଗସ୍ତ ବେଳେ ଏହି ଖବର ସାମ୍ନାକୁ ଆସିଥିଲା । ଏହାପରେ ପ୍ରତିରକ୍ଷା ମନ୍ତ୍ରଣାଳୟ ଏ ବାବଦରେ ଏଲ୍ଓଆଇ ଜାରି କରିଥିଲା, ଯାହାକୁ ଫ୍ରାନ୍ସ ୨୦୨୩ ଡିସେମ୍ବରରେ ସ୍ୱୀକାର କରିଥିଲା । ଏହା ପୂର୍ବରୁ ୨୦୧୬ ସେପ୍ଟେମ୍ବରରେ ୫୯ ହଜାର କୋଟି ଟଙ୍କାର ଚୁକ୍ତିସ୍ୱରୂପ ବାୟୁସେନା ନିମନ୍ତେ ଭାରତ ସରକାର ୩୬ ରାଫେଲ ଯୁଦ୍ଧ ବିମାନ କିଣିଥିଲେ ।