ଫିରିଙ୍ଗିଆ, ୨୫।୫-କନ୍ଧମାଳ ଜିଲା ଫିରିଙ୍ଗିଆ ବ୍ଲକ ଗୋଚ୍ଛାପଡା ପଂଚାୟତ ଲୁହୁରାସାହିରେ ଶୁକ୍ରବାର ରାତିରେ ଗାଁରେ ଗୁଣି ଗାରେଡିକୁ ସନ୍ଦେହ କରି ଏକ ଦମ୍ପତିଙ୍କୁ ମରଣାନ୍ତକ ଆକ୍ରମଣ କରାଯାଇଛି । ଏଥିରେ ଜଣଙ୍କ ଅବସ୍ଥା ଗୁରୁତର ରହିଛି । ସମ୍ପୃକ୍ତ ବ୍ୟକ୍ତିଙ୍କୁ ଗ୍ରାମର କିଛି ଲୋକେ ପ୍ରଥମେ ଗୋଚ୍ଛାପଡା ମେଡିକାଲ ନେଇଥିଲେ । ଅବସ୍ଥା ଗୁରୁତର ଥିବାରୁ ତାଙ୍କୁ ଫୁଲବାଣୀ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଗୁରୁତର ବ୍ୟକ୍ତି ଜଣକ ହେଲେ ଅପି ବିନ୍ଧାଣୀ(୫୦) । ଏ ନେଇ ଅପିଙ୍କ ସ୍ତ୍ରୀ ରଙ୍ଗାଇ ଗୋଚ୍ଛାପଡା ଥାନାରେ ଏତଲା ଦେଇଛନ୍ତି । ପୋଲିସ ଏହି ଘଟଣାରେ ବର୍ତ୍ତମାନ ସୁଦ୍ଧା ୩ ଜଣଙ୍କୁ ଗିରଫ କରି ଶନିବାର କୋର୍ଟ ଚାଲାଣ କରିଛି । ଅନ୍ୟମାନେ ଫେରାର ଅଛନ୍ତି । ଗିରଫ ଯୁବକମାନେ ହେଲେ ଲୁହୁରାସାହିର ଶିବ ବିନ୍ଧାଣି, ପୈଠ ବିନ୍ଧାଣି ଓ ମିଲୁ ବିନ୍ଧାଣି ।
ଗୁଣିଗାରେଡି ସନ୍ଦେହରେ ଲୁହୁରୁସାହିର କିଛି ଲୋକ କାସିନିପଦର ପଂଚାୟତ ଭାଲୁରୁ ଗାଁରୁ ଖଟ ଦେବତା ଡକାଇ ଥିଲେ । ୪ ଜଣ ଏକ ଖଟ ଧରି ଆସି ଗ୍ରାମରେ ପହଂଚି ଖଟ ବୁଲାଇଥିଲେ । ଗ୍ରାମର ଅପି ବିନ୍ଧାଣି ଗୁଣି କରୁଥିବା ନେଇ ସେମାନେ କହିଥିଲେ । ଫଳରେ ଖଟ ଡକାଇ ଥିବା ଲୋକେ ଉତ୍ତ୍ୟକ୍ତ ହୋଇ ଅପି ବିନ୍ଧାଣି ଏବଂ ତାଙ୍କ ସ୍ତ୍ରୀ ରଙ୍ଗାଇଙ୍କୁ ମରଣାନ୍ତକ ଆକ୍ରମଣ କରିଥିଲେ । ଗୁରୁତର ଅବସ୍ଥାରେ ଅପି ଏବେ ଫୁଲବାଣୀ ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି । ଏତଲାରେ ମୋଟ ୧୭ ଜଣଙ୍କ ନାମ ରହିଛି । ସେମାନଙ୍କ ମଧ୍ୟରୁ ୩ ଜଣଙ୍କୁ ଗିରଫ କରାଯାଇଛି । ଅନ୍ୟମାନେ ଫେରାର ଅଛନ୍ତି । ଫେରାର ଲୋକେ ଏବଂ ଖଟ ବୁଲାଇ ଥିବା ଲୋକଙ୍କୁ ଖୁବ୍ଶୀଘ୍ର ଗିରଫ କରାଯିବ ବୋଲି ତଦନ୍ତକାରୀ ଅଧିକାରୀ ରୁପକ କୁମାର ଦଳେଇ ପ୍ରକାଶ କରିଛନ୍ତି ।
ଗୁଣିଗାରେଡିକୁ ନେଇ ଖଟ ଦେବତା ଅଣାଯାଇଥିବା ଖବର ପାଇ ସଲାଗୁଡା ସରପଂଚ ରୋହିତ କହଁର ଏ ସଂପର୍କରେ ଗୋଛାପଡା ଥାନା କୁ ଖବର ଦେଇଥିଲେ । ପୋଲିସ ଗ୍ରାମରେ ପହଂଚି ତଦନ୍ତ ଆରମ୍ଭ କରିଥିଲା । ପ୍ରକାଶ ଥାଉକି ଚଳିତ ବର୍ଷ ମାର୍ଚ୍ଚ ୯ ତାରିଖରେ ଗୁଣିଗାରେଡି ସନ୍ଦେହରେ ଗୋଛାପଡା ଥାନା ଅଧୀନରେ ଥିବା ଲୁଇ ସିଂ ପଂଚାୟତ ଗୁମାଲଦଣି ଗ୍ରାମର ୱ୍ୟାଡ୍ ମେମ୍ବର ଦମ୍ପତିଙ୍କୁ ଅତି ନିର୍ମମ ଭାବେ ହତ୍ୟା କରା ଯାଇଥିଲା।
ଆହୁରି ପଢନ୍ତୁ : ରାଜ୍ୟରେ ୩ୟ ପର୍ଯ୍ୟାୟ ମତଦାନ, ଅପରାହ୍ନ ୫ଟା ସୁଦ୍ଧା ୫୯.୬୦ ପ୍ରତିଶତ ଭୋଟିଂ
