ଅନୁଗୁଳ/ରାଜକିଶୋରନଗର, ୧୭/୧୧ : ଟ୍ରକ୍ ଧକ୍କାରେ ୩ ମୃତ ଜଣେ ଗୁରୁତର। ଅନୁଗୁଳ ଜିଲ୍ଲା କିଶୋରନଗର ବୈରାଗୀପାଲିରେ ଗୁରୁବାର ରାତିରେ ଏଭଳି ମର୍ମନ୍ତୁଦ ଦୁର୍ଘଟଣା ଘଟିଛି।

ସୂଚନା ଅନୁସାରେ, ପ୍ରାଚୀ ନାମକ ଏକ ଘରୋଇ ବସ୍ ଝାରସୁଗୁଡ଼ାରୁ ଯାତ୍ରୀମାନଙ୍କୁ ନେଇ ଭୁବନେଶ୍ୱର ଆସୁଥିଲା। ରେଢ଼ାଖୋଲ ଓ କିଶୋରନଗର ମଝିରେ ଥିବା ବୈରାଗୀପାଲି ନିକଟରେ ବସ୍‌ର ଚକା ପଙ୍କଚର ହୋଇଯାଇଥିଲା। ଏହାପରେ ଯାତ୍ରୀମାନେ ବସରୁ ଓହ୍ଲାଇ ପଡ଼ିଥିଲେ । ବସ୍ ଡ୍ରାଇଭର, ହେଲପର ଓ ଦୁଇ ଜଣ ଯାତ୍ରୀ ଚକା ପାଖରେ ଠିଆ ହୋଇ ସ୍ଥିତି ଅନୁଧ୍ୟାନ କରୁଥିବା ବେଳେ ଏକ ଟ୍ରକ୍ ଦ୍ରୁତ ଗତିରେ ଆସି ଧକ୍କା ଦେଇଥିଲା। ଚାରି ଗୁରୁତରଙ୍କୁ ମେଡ଼ିକାଲ ନିଆଯାଇଥିଲା। ସେମାନଙ୍କ ମଧ୍ଯରୁ ଦୁଇ ଯାତ୍ରୀଙ୍କ ସମେତ ବସ୍ ଡ୍ରାଇଭରଙ୍କ ମୃତ୍ୟୁ ଘଟିଥିଲା। ଏବେ ମଧ୍ଯ ଜଣଙ୍କ ଅବସ୍ଥା ଗୁରୁତର ରହିଛି । ୩ ମୃତକ ହେଲେ ବସ୍ ଯାତ୍ରୀ ଘନଶ୍ୟାମ ବାରିକ (ବ୍ରଜରାଜନଗର), ଆନନ୍ଦ ପ୍ରଧାନ (ସୁନ୍ଦରଗଡ଼) ଏବଂ ଡ୍ରାଇଭର ନୟନ କୁମାର ନାଏକ (ଲାଇକେରା, ଝାରସୁଗୁଡ଼ା)। ଖବର ପାଇ କିଶୋରନଗର ପୁଲିସ ଘଟଣାର ତଦନ୍ତ କରୁଛି । ଏପଟେ ଦୁର୍ଘଟଣା କର୍ରିଥିବା ଟ୍ରକଟି ଘଟଣାସ୍ଥଳରୁ ଫେରାର ହୋଇଯାଇଛି ।