ଭୁବନେଶ୍ୱର, ୨୮/୦୮ : ସାମୁଦ୍ରିକ ଖାଦ୍ୟ ସାମଗ୍ରୀ ଏବଂ ମତ୍ସ୍ୟ ସମ୍ପଦ କ୍ଷେତ୍ରକୁ ପ୍ରୋତ୍ସାହିତ କରିବା ଦିଗରେ ରାଜ୍ୟ ସରକାର ବିଭିନ୍ନ କାର୍ଯ୍ୟକ୍ରମ ଗ୍ରହଣ କରୁଛନ୍ତି । ଏ ଦିଗରେ ଶିଳ୍ପକୁ ପ୍ରୋତ୍ସାହିତ କରିବା ଲାଗି ଯୋଡ଼ି ହେବାକୁ ଯାଉଛି ନୂଆ ପଦକ୍ଷେପ । ସାମୁଦ୍ରିକ ଖାଦ୍ୟ ରପ୍ତାନି ବୃଦ୍ଧି ଦିଗରେ ଆସିବାକୁ ଯାଉଛି ୩ ପ୍ରାଥମିକ ପ୍ରକ୍ରିୟାକରଣ ସେଣ୍ଟର (ପିପିସି) । ଜଗତସିଂହପୁର, ବାଲେଶ୍ୱର ଏବଂ ଗଞ୍ଜାମର ଛତ୍ରପୁର ଭଳି ସ୍ଥାନ ଗୁଡିକରେ ଏହା ସ୍ଥାପନ ହେଉଛି । ଏଥିରେ ପ୍ରାଥମିକ ପର୍ଯ୍ୟାୟରେ ମୋଟ ୧୮ କୋଟି ଟଙ୍କା ବିନିଯୋଗ କରାଯାଉଛି । ଛତ୍ରପୁରର ବସନ୍ତପୁଟିରେ ୧.୫ ଏକର ପରିମିତ ସ୍ଥାନରେ ଆସୁଥିବା ପିପିସିରେ ୬ କୋଟି ଟଙ୍କା ବିନିଯୋଗ ହେଉଛି । ଏଥିରେ ୧୫୦ ଜଣଙ୍କ ଲାଗି ପ୍ରତ୍ୟକ୍ଷ ନିଯୁକ୍ତି ସୁଯୋଗ ସୃଷ୍ଟି ଲକ୍ଷ୍ୟ ରହିଛି। ସେହିଭଳି ଜଗତସିଂହପୁରର କିମିଲୋରେ ମଧ୍ୟ ୧.୫ ଏକର ଏବଂ ୬ କୋଟି ବିନିଯୋଗ ହେଉଛି ।
ଏହାବାଦ ବାଲେଶ୍ୱର ଶ୍ରୀକୋଣାରେ ଆସୁଥିବା ୟୁନିଟ୍ ମଧ୍ୟ ଦେଢ଼ ଏକର ଓ ୬ କୋଟି ଟଙ୍କା ବିନିଯୋଗରେ ସ୍ଥାପନ କରାଯାଉଛି । ଏହି ୨ ୟୁନିଟ୍ରେ ମଧ୍ୟ ପ୍ରାୟ ୩୦୦ ଲୋକଙ୍କ ପାଇଁ ନିଯୁକ୍ତି ସୃଷ୍ଟି ହେବ ବୋଲି ରାଜ୍ୟ ଶିଳ୍ପ ବିଭାଗ ପକ୍ଷରୁ ଆକଳନ କରାଯାଇଛି । ଏହି ପ୍ରକ୍ରିୟାକରଣ ୟୁନିଟ୍ଗୁଡିକ ଦ୍ୱାରା ସ୍ଥାନୀୟ ଅର୍ଥନୀତିକୁ ବଳ ମିଳିବ ବୋଲି କହିଛନ୍ତି ବିଶେଷଜ୍ଞ । ସେହିଭଳି ଘରୋଇ ଏବଂ ଅନ୍ତର୍ଜାତୀୟ ବଜାରକୁ ଗୁଣବତ୍ତା ସାମୁଦ୍ରିକ ଖାଦ୍ୟ ରପ୍ତାନି ଲାଗି ଏହା ବିଶେଷ ଯୋଗଦାନ ଦେବ । ଏହି ସେଣ୍ଟର୍ଗୁଡିକ ଆଗକୁ ସମ୍ପ୍ରସାରଣ ହେଲେ ଅଧିକ ନିଯୁକ୍ତି ଯୋଡ଼ିବ ବୋଲି ଆକଳନ କରାଯାଇଛି । ରାଜ୍ୟର ପାରାଦୀପ, ବାଲେଶ୍ୱର, ଗୋପାଳପୁର ଏବଂ ଚିଲିକା ଭଳି ସ୍ଥାନଗୁଡିକରୁ ଚିଙ୍ଗୁଡି ସହ ଅନ୍ୟ ସାମୁଦ୍ରିକ ମାଛ ଏବଂ କଙ୍କଡା ବିଶେଷ ଭାବେ ସଂଗୃହୀତ ଏବଂ ପ୍ରୋସେସିଂ ହୋଇଥାଏ । ସାମୁଦ୍ରିକ ଖାଦ୍ୟ ପ୍ରୋସେସିଂ ଏବଂ ରପ୍ତାନି କ୍ଷେତ୍ରରେ ପାରାଦୀପ ବନ୍ଦର ଏକ ପ୍ରମୁଖ ସ୍ଥଳ ଭାବେ ଉଭା ହୋଇଛି । ବାଲେଶ୍ୱର ମତ୍ସ୍ୟ ଉତ୍ପାଦନ ଏବଂ ପ୍ରୋସେସିଂ କ୍ଷେତ୍ର ମଧ୍ୟ ପ୍ରମୁଖ ସ୍ଥାନରେ ରହିଛି । ସାମୁଦ୍ରିକ ମାଛ ଉତ୍ପାଦନ କ୍ଷେତ୍ରରେ ଗୋପାଳପୁର ଏକ ଗୁରୁତ୍ୱପୂର୍ଣ୍ଣ ସ୍ଥଳ ।
ସେହିଭଳି ଚିଲିକା ଏହାର ବିବିଧ ସାମୁଦ୍ରିକ ପ୍ରଜାତି ପାଇଁ ନିବେଶକଙ୍କ ଲାଗି ଏକ ଭରସାଯୋଗ୍ୟ ସ୍ଥଳ ହୋଇପାରିଛି । ପିପିସିଗୁଡିକ ବଙ୍ଗୋପସାଗର, ପୋଖରୀ ଏବଂ ଜଳ ଉତ୍ସଗୁଡିକରୁ ଉତ୍ପାଦିତ ମାଛକୁ ସଂଗ୍ରହ କରି ଏହାର ପ୍ରାଥମିକ ପରୀକ୍ଷା ପରେ ବହୁସ୍ତରୀୟ କ୍ଲିନିଂ ଏବଂ ୱାଶିଂ ବ୍ୟବସ୍ଥା କରିଥାନ୍ତି । ସେହିଭଳି ଆକାର, ଓଜନ ଏବଂ ଗୁଣବତ୍ତା ଅନୁସାରେ ମାଛ, ଚିଙ୍ଗୁଡି ଏବଂ କଙ୍କଡା ଭଳି କ୍ଷେତ୍ରରେ ଏଗୁଡିକୁ ବର୍ଗୀକରଣ କରାଯାଇଥାଏ । ସେହିଭଳି ଚିଲିଂ, ଫ୍ରିଜିଂ, ପ୍ୟାକେଜିଂ, ଲେବଲ, ଷ୍ଟୋରେଜ, ଗୁଣବତ୍ତା, ପରୀକ୍ଷଣ ପରେ ବିଭିନ୍ନ ସ୍ଥାନକୁ ସ୍ଥାନାନ୍ତରଣ ଏବଂ ବିତରଣ ଭଳି ଦିଗ ଗୁଡିକୁ ଧ୍ୟାନରେ ରଖାଯାଇଥାଏ । ଇପିକଲର ଜଣେ ବରିଷ୍ଠ ଅଧିକାରୀ କହିଛନ୍ତି, ପିପିସିଗୁଡିକ ବିକଶିତ କରିବା ଦିଗରେ ମତ୍ସ୍ୟ ସମ୍ପଦ ନିର୍ଦ୍ଦେଶାଳୟ, ଓଡ଼ିଶା ଷ୍ଟେଟ୍ କୋଅପରେଟିଭ ଫିସ ମାର୍କେଟିଂ ଫେଡେରେସନ (ଫିସ୍ଫେଡ) ସବୁ ପ୍ରକାର ସହାୟତା ଯୋଗାଇ ଦେଉଛି । ଉଭୟ ଭିତ୍ତିଭୂମି ବିକାଶ ଏବଂ ଗୁଣବତ୍ତା ରକ୍ଷା ଲାଗି ନୂଆ ଟେକ୍ନୋଲୋଜି ବ୍ୟବହାର ଉପରେ କାର୍ଯ୍ୟପନ୍ଥା ଗ୍ରହଣ କରାଯାଉଛି । ଭାରତୀୟ ସାମୁଦ୍ରିକ ଖାଦ୍ୟ ରପ୍ତାନିଂ ସଂଘ ସୂଚନା ମୁତାବକ, ୨୦୦୮-୦୯ରେ ରାଜ୍ୟର ସାମୁଦ୍ରିକ ଉତ୍ପାଦ ରପ୍ତାନି ୩୫୮ କୋଟି ଥିଲା ବେଳେ ଏହା ୨୦୨୨-୨୩ରେ ୪୫୪୬.୪୭ କୋଟିକୁ ବୃଦ୍ଧି ହୋଇଛି । ମାଛ ପ୍ରକ୍ରିୟାକରଣ ଏବଂ ଶୀତଳ ଭଣ୍ଡାର କାର୍ଯ୍ୟକଳାପ ଦୈନିକ ୨୧୬୦.୮୯ ଟନ୍ ଛୁଇଁଛି । ସେହିଭଳି ଶୀତଳ ଭଣ୍ଡାର କ୍ଷମତା ୫୬୯୪୨ ଟନ୍ । ଏହି କ୍ଷେତ୍ର ୧୬ ଲକ୍ଷ ନିଯୁକ୍ତି ଯୋଡିଛି ।
