ନୂଆଦିଲ୍ଲୀ ୧୨/୦୨: କ୍ୟୁବାର ରାଜଧାନୀ ହାଭାନାରେ ଥିବା ଏକ ସରକାରୀ ମାଂସ କାରଖାନାରୁ ୧୩୩ଟନ୍ ଚିକେନ୍ ଚୋରି ହୋଇଥିବା ମାମଲା ସାମ୍ନାକୁ ଆସିଛି । ତାକୁ ୧୬୬୦ଟି ଧଳା ବକ୍ସରେ ପ୍ୟାକ୍ କରି ରଖାଯାଇଥିବାବେଳେ ଲୋକମାନଙ୍କୁ ରିହାତି ଦାମ୍ରେ ପ୍ରଦାନ କରାଯାଇଥାନ୍ତା । ଏହି ମାମଲାରେ ଅତି କମ୍ରେ ୩୦ ଜଣଙ୍କ ବିରୋଧରେ ଅଭିଯୋଗ ଦାଖଲ ହୋଇଛି । ଚିକେନ୍ ଚୋରି କରିବା ପରେ ଅଭିଯୁକ୍ତମାନେ ସେହି ଅର୍ଥରେ ଲାପଟପ୍, ଫ୍ରିଜ୍, ଟିଭି, ଏସି ପ୍ରଭୃତି କିଣିଛନ୍ତି । ଅଭିଯୁକ୍ତଙ୍କ ମଧ୍ୟରେ କଂପାନିର ଶିଫ୍ଟ ଇନ୍ଚାର୍ଜ, ଆଇଟି କର୍ମଚାରୀ, ସୁରକ୍ଷାକର୍ମୀ ଓ କିଛି ବାହାର ଲୋକେ ସାମିଲ ।
ଶୁକ୍ରବାର ସରକାରୀ ଟେଲିଭିଜନ୍ରେ ଖବରଟି ପ୍ରସାରିତ ହୋଇଥିଲା । ଅବଶ୍ୟ ଚିକେନ୍ ଚୋରି କେବେ ହୋଇଥିଲା ସେ ନେଇ ସରକାରୀ ଅଧିକାରୀମାନେ କିଛି କହିନାହାନ୍ତି । ତେବେ ବିଳମ୍ବିତ ରାତି ପ୍ରାୟ ୨ଟା ସମୟରେ ଏହି ଅଘଟଣ ଘଟିଥିବା ସୂଚନା ମିଳିଛି । ଅଭିଯୁକ୍ତମାନେ ଚିକେନ୍ ଚୋରି କରିବା ପରେ ତାକୁ ବାହାରେ ବିକ୍ରି କରିଦେଇଥିଲେ । ଆର୍ଥିକ ସଂକଟର ସାମ୍ନା କରୁଥିବା କ୍ୟୁବାରେ ଲୋକଙ୍କ ନିକଟରେ ଖାଦ୍ୟ, ଔଷଧ ଓ ଇନ୍ଧନ କିଣିବାକୁ ଟଙ୍କା ନାହିଁ । ଏଭଳିସ୍ଥିତିରେ ଯେତିକି ଚିକେନ୍ ଚୋରି ହୋଇଛି ତାହା ଗୋଟିଏ ଛୋଟ ପ୍ରଦେଶର ମାସେ ଯାଏ ଚଳିବା ଭଳି ପରିମାଣର ବୋଲି ଜଣାପଡି଼ଛି । ଅବଶ୍ୟ ଦେଶରେ ଏହା ଏଭଳି ପ୍ରଥମ ଘଟଣା ନୁହେଁ । ପୂର୍ବରୁ ବି ଏହିଭଳି ଚୋରିର ଅନେକ ମାମଲା ସାମ୍ନାକୁ ଆସିଛି । କରୋନା ମହାମାରୀ ପରେ ଏଭଳି ମାମଲା ଅଧିକ ସଂଖ୍ୟାରେ ଦେଖିବାକୁ ମିଳୁଛି । ଯଦି ଅଭିଯୁକ୍ତମାନଙ୍କର ଦୋଷ ପ୍ରମାଣିତ ହୁଏ ତା’ହେଲେ ସେମାନଙ୍କୁ ଅତି କମ୍ରେ ୨୦ ବର୍ଷ ଜେଲ୍ଦଣ୍ଡ ମିଳିବ ବୋଲି କୁହାଯାଉଛି ।
