ଭୁବନେଶ୍ୱର, ୨୦/୦୨ : ତେଲେଙ୍ଗାନା ଭଳି ଓଡ଼ିଶାରେ କଂଗ୍ରେସର ଚାହିଦା ବଢିବାରେ ଲାଗିଛି । ସେଠାରେ ତୃତୀୟ ସ୍ଥାନରେ ଥିବା କଂଗ୍ରେସ ଶାସନ କ୍ଷମତାକୁ ଆସିଲା ଭଳି ଓଡ଼ିଶାରେ ବି କଂଗ୍ରେସ ଦିନକୁ ଦିନ ଲୋକପ୍ରିୟ ହେବାରେ ଲାଗିଛି । ଯାହା କଂଗ୍ରେସ ଟିକଟ ପାଇଁ ଆବେଦନକାରୀଙ୍କ ସଂଖ୍ୟାରୁ ସ୍ପଷ୍ଟ ବାରି ହୋଇଛି । ଏଭଳି ଯୁକ୍ତି ବାଢୁଛନ୍ତି କଂଗ୍ରେସ ପ୍ରଭାରୀ ଡ. ଅଜୟ କୁମାର । ପିସିସି ସଭାପତି ଶରତ ପଟ୍ଟନାୟକ କହିଛନ୍ତି ରାଜ୍ୟରେ କଂଗ୍ରେସ ଟିକଟ୍ ପାଇଁ ୩୭ଶହରୁ ଅଧିକ ଲୋକ ଆବେଦନ କରିଛନ୍ତି । ୧୪୭ ବିଧାନସଭା ସିଟ୍ ପାଇଁ ୩ ହଜାରରୁ ଅଧିକ ଆବେଦନ ଓ ୨୧ ଲୋକସଭା ପାଇଁ ୭ ଶହରୁ ଅଧିକ ଆବେଦନ ହୋଇଛି ।
ପ୍ରଦେଶ ନିର୍ବାଚନ କମିଟି ବୈଠକ ପରେ ପିସିସି ସଭାପତି ଶରତ କହିଛନ୍ତି, ରାଜ୍ୟରେ କଂଗ୍ରେସ ଆଗୁଆ ଟିକଟ୍ ଦେବ । ବର୍ତ୍ତମାନ ସୁଦ୍ଧା ପ୍ରଗମନ୍ ଆପ୍ରେ ୩୭ ଶହରୁ ଅଧିକ ଆବେଦନ ହୋଇଛି । ପ୍ରାର୍ଥୀଙ୍କ ଯୋଗ୍ୟତା ନେଇ ପିଇସି କମିଟିରେ ଆଲୋଚନା ହୋଇଥିଲା । ସଭ୍ୟମାନେ ନିଜ ମତ ଦେଇଥିଲେ । ଜିତିବା ସମ୍ଭାବନାକୁ ପ୍ରାଥମିକତା ଦିଆଯାଇ ଟିକେଟ ଦିଆଯିବ । ଛାତ୍ର ଯୁବ ଓ ମହିଳାଙ୍କୁ ପ୍ରାଧାନ୍ୟ ଦେଇ ଟିକେଟ ବଣ୍ଟନ ହେବ । ତେବେ ଦ୍ୱିତୀୟ ପର୍ଯ୍ୟାୟରେ କୋର କମିଟି ବୈଠକ ପରେ ସ୍କ୍ରିନିଙ୍ଗ କମିଟିକୁ ତାଲିକା ପଠାଯିବ । ପ୍ରଥମ ପର୍ଯ୍ୟାୟ ତାଲିକା ମାର୍ଚ୍ଚରେ ପ୍ରକାଶ ପାଇବ । ୭୦ରୁ ଅଧିକ ସିଟ୍ ଘୋଷଣା ହେବ । ଆଜିର ବୈଠକରେ କମିଟିର ୨୩ ଜଣ ସଦସ୍ୟ ଯୋଗ ଦେଇଥିଲେ । ପୂର୍ବତନ ପିସିସି ସଭାପତି ଜୟଦେବ ଜେନା, ପ୍ରସାଦ ହରିଚନ୍ଦନ, ପ୍ରଚାର କମିଟି ଅଧ୍ୟକ୍ଷ ବିଜୟ ପଟ୍ଟନାୟକ, କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର, ସାଂସଦ ସପ୍ତଗିରି ଉଲାକା ପ୍ରମୁଖ ଉପସ୍ଥିତ ଥିଲେ ।
ବୈଠକ ପରେ ସାଂସଦ ସପ୍ତଗିରି କହିଛନ୍ତି, ପ୍ରଗମନ୍ ଆପରେ ପ୍ରାର୍ଥୀ ଅନଲାଇନ୍ରେ ଆବେଦନ କରିଥିଲେ । ଶୀଘ୍ର ପ୍ରାର୍ଥୀ ତାଲିକା ପ୍ରସ୍ତୁତ କରିବାକୁ ଆମେ ପ୍ରସ୍ତୁତ ହେଉଛୁ । ମଧ୍ୟପ୍ରଦେଶ, କର୍ଣ୍ଣାଟକ, ଛତିଶଗଡ଼ ନିର୍ବାଚନ ପରିଚାଳନା ନୀତିରେ କାର୍ଯ୍ୟ କରିବାକୁ ମୁଁ ମତ ଦେଇଛି । ମୁଁ ମଧ୍ୟ କୋରାପୁଟ ସାଂସଦ ପାଇଁ ଆବେଦନ କରିଛି । ଆଶା ଅଛି ଦଳ ମୋତେ ଟିକଟ ଦେବ । ମୁଁ ଲଢ଼ିବି, ଦେଖାଯାଉ ଦଳର ସଭାପତି କି ନିଷ୍ପତ୍ତି ନେଉଛନ୍ତି ।
