ନୂଆଦିଲ୍ଲୀ,୦୧/୦୯: ଦକ୍ଷିଣପୂର୍ବ ଏସିଆ ଦେଶ  ଲାଓସରେ ସାଇବର ସ୍କାମ୍‌ରେ ୪୭ ଜଣ ଭାରତୀୟ ନାଗରିକ ଫସିଥିଲେ । ସେମାନଙ୍କୁ ଭାରତୀୟ ଦୂତାବାସ ଉଦ୍ଧାର କରିଛି । ଲାଓସର ବୋକିଓ ପ୍ରଦେଶଠାରେ ଗୋଲ୍‌ଡେନ୍‌ ଟ୍ରାଙ୍ଗେଲ୍‌ ସ୍ୱତନ୍ତ୍ର ଅର୍ଥନୈତିକ ଅଞ୍ଚଳ (ଏସ୍‌ଇଜେଡ୍‌)ରେ ଥିବା ସାଇବର ସ୍କାମ୍‌ କେନ୍ଦ୍ରଗୁଡ଼ିକରେ  ଭାରତୀୟମାନେ ଫସିଥିଲେ । ସେମାନଙ୍କୁ ବିଭିନ୍ନ  ସାଇବର ଅପରାଧରେ ସାମିଲ କରାଯାଉଥିଲା । ଲାଓସ  କର୍ତ୍ତୃପକ୍ଷ ଏହି ଏସ୍‌ଇଜେଡ୍‌ରେ ଚଢ଼ଉ କରିଥିଲେ । ଏହି ସମୟରେ ଭାରତୀୟମାନେ ସରକାରଙ୍କୁ ଘଟଣା  ବାବଦରେ ଜଣାଇଥିଲେ । ୨୯ ଜଣଙ୍କୁ ଭାରତୀୟ  ଦୂତାବାସକୁ ହସ୍ତାନ୍ତର କରାଯାଇଥିଲା । ବାକି ୧୮  ଜଣ ନିଜେ ଆସି ଦୂତାବାସ ନିକଟରେ ପହଞ୍ଚିଥିଲେ ।  ଗୋଲ୍‌ଡେନ୍‌ ଟ୍ରାଙ୍ଗେଲ୍‌ ଏସ୍‌ଇଜେଡ୍‌ ଥାଇଲାଣ୍ଡ,  ଲାଓସ ଓ ମ୍ୟାଁମାର ସୀମା ନିକଟରେ ରହିଛି । ଏହା  ବେଆଇନ କାର୍ଯ୍ୟକଳାପର ପେଣ୍ଠସ୍ଥଳ ପାଲଟିଥିଲା ।  ଭାରତୀୟଙ୍କ ଉଦ୍ଧାର ପାଇଁ ଦୂତାବାସ ଅଧିକାରୀମାନେ  ଭିଏନ୍‌ଟିଏନ୍‌ରୁ ବୋକିଓ ଯାତ୍ରା କରିଥିଲେ । ସେଠାରେ  ପହଞ୍ଚି ସିଧାସଳଖ ଭାବେ ସ୍ଥାନୀୟ ଅଧିକାରୀଙ୍କ  ସହାୟତା ଲୋଡ଼ିଥିଲେ । ଭାରତ ସହ ଲାଓସର ସୁସମ୍ପର୍କ  ଥିବାରୁ ସେମାନେ ପାରୁପର୍ଯ୍ୟନ୍ତ ସହଯୋଗ କରିଥିଲେ ।