ପୁରୀ, ୨/୯ : ଡ଼କାୟତ ଯୋଜନା କରିବା ପୂର୍ବରୁ ୫ଜଣ ଅଭିଯୁକ୍ତକୁ ବାନ୍ଧିଲା ତାଳବଣିଆ ଥାନା ପୁଲିସ l ତାଙ୍କ ନିକଟରୁ ମାରଣାସ୍ତ୍ର ସହ ବୋମା ଜବତ ହୋଇଛି l ଅଭିଯୁକ୍ତମାନଙ୍କ ମଧ୍ୟରୁ ବିଦେଶୀ ବେହେରା, ରାଜ କିଶୋର ନାୟକ, ଅଜିତ ନାୟକ, ସୁଶାନ୍ତ କୁମାର ବିଶ୍ୱାଳ, କହ୍ନା ଭୋଇଙ୍କୁ ପୋଲିସ ଗିରଫ କରିଛି l ତାଙ୍କ ନିକଟରୁ ଦୁଇଟି ବଡ଼ ଲୁହା ରଡ଼, ଦୁଇଟି ଲୁହା ଖଣ୍ଡା, ଦୁଇଟି ଜୀବନ୍ତ ବୋମା, ବୋମାର ଅବଶିଷ୍ଟାଂଶ ଜବତ ହୋଇଛି l 

ସୂଚନା ଅନୁଯାୟୀ, କେତେକ ହାର୍ଡକୋର ଅପରାଧୀ ମାରଣାସ୍ତ୍ର ଧରି ସେଣ୍ଟ୍ରାଲ୍ ସ୍କୁଲର ପଛ ପାର୍ଶ୍ୱରେ ଏକ ପରିତ୍ୟକ୍ତ ଘରେ ଏକତ୍ରିତ ହୋଇ ମୋଟର ଚାଳକ ଏବଂ ପର୍ଯ୍ୟଟକଙ୍କ ଠାରୁ ଡ଼କାୟତି କରିବାକୁ ଯୋଜନା କରୁଥିଲେ। ଏ ବିଷୟରେ ସୂଚନା ପାଇ, ତାଳବଣିଆ ପୋଲିସ ସେହି ସ୍ଥାନରେ ଚଢାଉ କରିଥିଲା। ପୋଲିସ୍ ଗାଡି ଦେଖି ସେମାନେ ପୋଲିସ୍ ଉପରକୁ ଏକ ବୋମା ଫିଙ୍ଗି ଭୁଦାନ ଜଙ୍ଗଲ ଆଡକୁ ଦୌଡ଼ି ଖସି ଯିବାକୁ ଉଦ୍ୟମ କରୁଥିଲେ। ବହୁ କଷ୍ଟରେ ପୋଲିସ୍ ୫ଜଣଙ୍କୁ ଧରିବାରେ ସକ୍ଷମ ହୋଇଥିଲା। ତେବେ ଦୁଇ ଜଣ ଘଟଣାସ୍ଥଳରୁ ଚମ୍ପଟ ମାରିଛନ୍ତି। ଆଜି ସେମାନଙ୍କୁ ଗିରଫ କରାଯାଇଛି। ସେମାନଙ୍କୁ କୋର୍ଟ ଚାଲାଣ କରାଯିବ। ଏହା ସହ ଅନ୍ୟ ଦୁଇ ଅଭିଯୁକ୍ତଙ୍କୁ ଗିରଫ କରିବା ପାଇଁ ପୋଲିସ ଚଢାଉ ଜାରି ରଖିଛି।