ମଧ୍ୟପ୍ରଦେଶ୨୫/୦୮: ମଧ୍ୟପ୍ରଦେଶର ଧାର୍‌ରୁ ଏକ ଅଜବ ମାମଲା ସାମ୍ନାକୁ ଆସିଛି, ଯାହାର ଭିଡିଓକୁ ଲୋକେ ଖୁବ୍‌ ପସନ୍ଦ କରୁଛନ୍ତି । ଭିଡିଓରେ ଜଣେ ୫ ବର୍ଷୀୟ ଶିଶୁ ଥାନାରେ ପହଞ୍ଚି ବାପାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଦାବି କରିଛି । ତା’ର ଅଭିଯୋଗ ଶୁଣି ପୁଲିସ ମଧ୍ୟ ଚକିତ ହୋଇଛି । ଶିଶୁଟି ଥାନାବାବୁଙ୍କ ସାମ୍ନାରେ ବସି ନିଜର ଅଭିଯୋଗ ଶୁଣାଉଥିବା ନଜର ଆସିଛି । ଥାନାଧିକାରୀ ପଚାରିବାରୁ ସେ ନିଜ ନାଁ ହସନାନ୍‌ ବୋଲି କହିଛି । ଇକବାଲ ନାମକ ନିଜ ବାପାଙ୍କ ବିରୋଧରେ ଅଭିଯୋଗ ନେଇ ସେ ଥାନାରେ ପହଞ୍ଚିଥିବା କହିଛି । 

ତା’ର ଅଭିଯୋଗ ଅନୁସାରେ, ବାପା ତାକୁ ରାସ୍ତାରେ ବୁଲିବାକୁ ଦେଉନାହାନ୍ତି । ନଦୀ କୂଳକୁ ଯିବାକୁ ଦେଉନାହାନ୍ତି । ସେଥିପାଇଁ ସେ ତାଙ୍କ ଉପରେ ରାଗି ଥାନାରେ ପହଞ୍ଚିଛି । ସେତିକି ନୁହେଁ, ବାପାଙ୍କୁ ଜେଲରେ ବନ୍ଦ କରିବାକୁ ସେ ଥାନାଧିକାରୀଙ୍କୁ କହିଛି । ଏହା ଶୁଣି ଥାନାରେ ଉପସ୍ଥିତ ସମସ୍ତ କର୍ମଚାରୀ ହସି ହସି ବେଦମ୍‌ ହୋଇଛନ୍ତି । ଶିଶୁର ଭିଡିଓ ଏବେ ସୋସିଆଲ ମିଡିଆରେ ସଭିଁଙ୍କ ଧ୍ୟାନ ଆକର୍ଷଣ କରିଛି । ସେପଟେ ଶିଶୁର ଅଭିଯୋଗ ପରେ ଇକବାଲଙ୍କୁ ଲୋକେ ଫୋନ୍‌ କରି ପଚାରୁଛନ୍ତି, ସବୁ ଠିକ୍‌ ଅଛି ତ? ଲୋକଙ୍କୁ ଜବାବ ଦେଇ ଇକବାଲ ଥକି ପଡ଼ିଲେଣି । ପୁଲିସ ସାମ୍ନାରେ ବସି ନିଜ ବାପାଙ୍କ ବିରୋଧରେ ଅଭିଯୋଗ କରୁଥିବା ପିଲାର ସାହାସକୁ ୟୁଜର୍‌ ପ୍ରଶଂସା କରିଛନ୍ତି ।