ନୂଆଦିଲ୍ଲୀ, ୦୩/୦୯ : ଯୁବଗୋଷ୍ଠୀଙ୍କ ଦେଶ ହେଉଛି ଭାରତ। ଏଠାରେ ୬୦%ରୁ ଅଧିକ ଲୋକ ଯୁବ ବୟସର। କିନ୍ତୁ ଏବେ ଏହି ଦେଶରେ ପ୍ରତି ୪୦ ମିନିଟ୍ରେ ଜଣେ ଯୁବା ନିଜ ଜୀବନ ହାରୁଛି । ‘ଷ୍ଟୁଡେଣ୍ଟ ସୁସାଇଡ୍-ଆନ୍ ଏପିଡେମିକ୍ ସ୍ୱିପିଙ୍ଗ୍ ଇଣ୍ଡିଆ’ ରିପୋର୍ଟରୁ ଏହା ଜଣାପଡ଼ିଛି । ରିପୋର୍ଟ ମୁତାବକ, ଦେଶରେ ପ୍ରତିଦିନ ୩୫ରୁ ଅଧିକ ଛାତ୍ରଛାତ୍ରୀ ଆତ୍ମହତ୍ୟା କରୁଛନ୍ତି । ୨୦୧୮ରୁ ୨୦୨୨ ପର୍ଯ୍ୟନ୍ତ ଦେଶରେ ୫୯ ହଜାର ୧୫୩ ଛାତ୍ରଛାତ୍ରୀ ଆତ୍ମହତ୍ୟା କରିଛନ୍ତି । ଷ୍ଟୁଡେଣ୍ଟ ସୁସାଇଡ-ଆନ୍ ଏପିଡେମିକ୍ ସ୍ୱିପିଙ୍ଗ୍ ଇଣ୍ଡିଆ ରିପୋର୍ଟ ଆଇସି୩ର ବାର୍ଷିକ ସମ୍ମିଳନୀରେ ଉପସ୍ଥାପନ କରାଯାଇଥିଲା । ଏହାକୁ ପ୍ରସ୍ତୁତ କରିବା ପାଇଁ ଜାତୀୟ ଅପରାଧ ରେକର୍ଡ ବ୍ୟୁରୋ (ଏନ୍ସିଆର୍ବି)ର ତଥ୍ୟର ସହୟତା ନିଆଯାଇଥିଲା ।
ଆଇସି୩ ହେଉଛି ଏକ ଅଣ ଲାଭକରୀ ସଙ୍ଗଠନ, ଯାହା ସମଗ୍ର ବିଶ୍ୱରେ ଶିକ୍ଷା କ୍ଷେତ୍ରରେ କାମ କରୁଛି । ରିପୋର୍ଟରୁ ଜଣାପଡ଼ିଛି ଯେ ଭାରତରେ ଯେଉଁଠି ଆତ୍ମହତ୍ୟା ହାର ପ୍ରତି ବର୍ଷ ୨% ବୃଦ୍ଧି ପାଉଛି, ସେଠାରେ ଛାତ୍ରଛାତ୍ରୀଙ୍କ ମଧ୍ୟରେ ଆତ୍ମହତ୍ୟା ହାର ୪% ବଢ଼ୁଛି । ଅର୍ଥାତ୍ ଦେଶରେ ଆତ୍ମହତ୍ୟାର ଯେତେ ମାମଲା ପ୍ରତିବର୍ଷ ଆସୁଛି, ସେଥିରେ ଛାତ୍ରଛାତ୍ରୀଙ୍କ ସଂଖ୍ୟା ସର୍ବାଧିକ ରହୁଛି । ସଂଖ୍ୟା ଦୃଷ୍ଟିରୁ ୨୦୨୧ରେ ୧୩ ହଜାର ୮୯ ଛାତ୍ରଛାତ୍ରୀ ଆତ୍ମହତ୍ୟା କରିଥିଲେ । ୨୦୨୨ରେ ଏହି ସଂଖ୍ୟା ୧୩ ହଜାର ୪୪ ଥିଲା । ସେହିଭଳି ୨୦୧୮ରୁ ୨୦୨୦ ମଧ୍ୟରେ ମୋଟ ୩୩ ହଜାର ୨୦ ଛାତ୍ରଛାତ୍ରୀ ନିଜ ଜୀବନ ହାରିଥିଲେ ।
ଆତ୍ମହତ୍ୟା ପଛରେ ମାନସିକ ଚାପ ଛାତ୍ରଛାତ୍ରୀଙ୍କ ଆତ୍ମହତ୍ୟା ପ୍ରବଣତା ବୃଦ୍ଧି ପାଇବା ପଛରେ ପୃଥକ୍ ପୃଥକ୍ କାରଣ ରହିଛି । ତନ୍ମଧ୍ୟରୁ ସବୁଠୁ ବଡ଼ କାରଣ ହେଉଛି ମାନସିକ ଚାପ । ୟୁନିସେଫ୍ର ଏକ ରିପୋର୍ଟ ମୁତାବକ, ଭାରତରେ ୧୫ରୁ ୨୪ ବର୍ଷର ପ୍ରତ୍ୟେକ ୭ ଜଣରେ ଜଣେ ଖରାପ ମାନସିକ ସ୍ୱାସ୍ଥ୍ୟଜନିତ ସମସ୍ୟା ଦେଇ ଗତି କରୁଛି । ସବୁଠୁ ବଡ଼ କଥା ହେଉଛି ଲୋକମାନେ ନିଜ ମାନସିକ ଚାପକୁ ଗୁରୁତ୍ୱର ସହ ନେଉନାହାନ୍ତି । ଫଳରେ ଧୀରେ ଧୀରେ ଏହା ସେମାନଙ୍କୁ ମୃତ୍ୟୁ ଆଡ଼କୁ ଟାଣିନେଉଛି । ୟୁନିସେଫ୍ ପକ୍ଷରୁ ହୋଇଥିବା ଏକ ସର୍ଭେରେ ଯେତେ ଲୋକ ସାମିଲ ହୋଇଥିଲେ, ସେମାନଙ୍କ ମଧ୍ୟରୁ ମାତ୍ର ୪୧% ଲୋକ ନିଜ ମାନସିକ ସମସ୍ୟାର ସମାଧାନ ଲାଗି କାଉନ୍ସେଲରଙ୍କ ପାଖକୁ ଯାଇଥିବା କହିଥିଲେ । ଅର୍ଥାତ୍ ୫୯% ଲୋକ ନିଜ ମାନସିକ ଚାପଜନିତ ସମସ୍ୟାକୁ କମାଇବା ଲାଗି କୌଣସି ପଦକ୍ଷେପ ନେଇ ନ ଥିଲେ ।
