ଅନୁଗୁଳ,୩୦/୧୧: ଶିଳ୍ପନଗରୀ ଅନୁଗୁଳ ଜିଲ୍ଲାରେ ଉଦ୍ବେଗଜନକ ଭାବେ ବଢ଼ିଚାଲିଛି ଏଡ୍ସ ସଂକ୍ରମଣ । ଏହି ମାରାତ୍ମକ ବ୍ୟାଧିକୁ ରୋକିବାକୁ ସରକାରଙ୍କ ମାଳ ମାଳ ଯୋଜନା । ସଚେତନତା ଦିଗରେ ଗଣ୍ଡା ଗଣ୍ଡା ଏନ୍ଜିଓ କାମ କରୁଛନ୍ତି । ଏହାସତ୍ତେ୍ୱ ଜିଲ୍ଲାରେ ନିୟନ୍ତ୍ରଣକୁ ଆସିପାରୁନି ଭୟାନକ ଭୂତାଣୁ । ବରଂ ଦିନକୁ ଦିନ ଭୟଙ୍କର ରୂପ ନେବାରେ ଲାଗିଛି । ଗତ ୭ ମାସ ମଧ୍ୟରେ ସଂକ୍ରମଣର ଭୟବହତା ହିଁ ଏହି ରୋଗର ବେକାବୁ ଚିତ୍ରକୁ ବୟାନ କରୁଛି ।
ଗତ ଏପ୍ରିଲ୍ରୁ ଅକ୍ଟୋବର ମଧ୍ୟରେ ଜିଲ୍ଲାରୁ ୧୩୩ ଜଣ ଏଡ୍ସ ସଂକ୍ରମିତ ଚିହ୍ନଟ ହୋଇଛନ୍ତି । ସେମାନଙ୍କ ମଧ୍ୟରେ ୯୭ ଜଣ ପୁରୁଷ ଓ ୩୨ ଜଣ ମହିଳା ରହିଛନ୍ତି । ଉଦ୍ବେଗର ବିଷୟ, ଗଲା ୭ ମାସରେ ଏହି ମାରାତ୍ମକ ଭୂତାଣୁ ୩୫ ଜଣଙ୍କ ଜୀବନ ନେଇଥିବା ବେଳେ ୪ ଜଣ ନିଷ୍ପାପ ଶିଶୁଙ୍କୁ କବଳିତ କରିଛି । ରାଜ୍ୟରେ ଏଡ୍ସର ଭୟବହତା ବଢ଼ିଚାଲିଛି । ବ୍ୟାପକ ସଚେତନତା ସତ୍ତେ୍ୱ କାୟା ବିସ୍ତାରି ଚାଲିଛି ଏଡ୍ସ । ଆଉ ଏଥିରୁ ବାଦ୍ ପଡ଼ିନି ଶିଳ୍ପନଗରୀ ଅନୁଗୁଳ ଜିଲ୍ଲା । ମାଳ ମାଳ ଶିଳ୍ପସଂସ୍ଥା ଓ ଖଣି ଖାଦାନ ପାଇଁ ଏଡ୍ସ ଭଳି ଭୟାନକ ରୋଗକୁ ଏଠାରେ ରୋକ୍ ଦେଇ ହେଉନି । ଏଥିରେ ପ୍ରତିବନ୍ଧକ ସାଜିଛନ୍ତି ଦାଦନ ଶ୍ରମିକ, ଟ୍ରକ୍ ଡ୍ରାଇଭର ଓ ହେଲପର୍ ।
ଜିଲ୍ଲା ଏଡ୍ସ ପ୍ରତିକାର ଓ ନିୟନ୍ତ୍ରଣ ୟୁନିଟ୍(ଡାପ୍ସୁ)ପକ୍ଷରୁ ମିଳିଥିବା ସୂଚନା ମୁତାବକ, ଜିଲ୍ଲାରେ ୨୦୦୩ ମସିହାରୁ ଏଡ୍ସ ନମୁନା ସଂଗ୍ରହ ହେଉଛି । ଏଯାବତ୍ ୧୦ ଲକ୍ଷ ୧୭ ହଜାର ୯୧୧ ଜଣଙ୍କ ଏଡ୍ସ ପରୀକ୍ଷା କରାଯାଇଛି । ସେମାନଙ୍କ ମଧ୍ୟରୁ ୨୫୧୧ ଜଣ ପଜିଟିଭ୍ ଚିହ୍ନଟ ହୋଇଛନ୍ତି । ଏହି ଆକ୍ରାନ୍ତଙ୍କ ମଧ୍ୟରେ ୧୫୬୪ ଜଣ ପୁରୁଷ ଓ ୭୭୫ ଜଣ ମହିଳାଙ୍କୁ ଏଡ୍ସ ଗ୍ରାସିଛି । ଗତ ୨୦ ବର୍ଷ ମଧ୍ୟରେ ଏଡ୍ସରେ ଜିଲ୍ଲାର ୬୨୦ ଜଣଙ୍କ ଜୀବନ ଯାଇଛି । ଚିନ୍ତାର ବିଷୟ, ଏଡ୍ସ ଆଁ’ରେ ଗତ ୨୦ ବର୍ଷ ମଧ୍ୟରେ ୧୭୨ ଜଣ କଅଁଳ ଶିଶୁ କବଳିତ ହୋଇଛନ୍ତି । ସେମାନଙ୍କ ମଧ୍ୟରେ ୮୫ ଜଣ ଶିଶୁପୁତ୍ର ଥିବା ବେଳେ ୮୫ ଜଣ ଶିଶୁକନ୍ୟା ପଜିଟିଭ୍ ଚିହ୍ନଟ ହୋଇଛନ୍ତି । ଗତ କରୋନା କାଳରେ ଜିଲ୍ଲାରେ ଏଡ୍ସ ସଂକ୍ରମଣ କିଛି ମାତ୍ରାରେ ହ୍ରାସ ପାଇଥିଲେ ହେଁ ଗତ ଦୁଇ ବର୍ଷ ହେଲା ପୁଣି ଉପରମୁହାଁ ହୋଇଛି ।
ଗତବର୍ଷ ଜିଲ୍ଲାରେ ସଂକ୍ରମଣ ଶହେ ପାର୍ ହୋଇଥିବା ବେଳେ ଚଳିତ ବର୍ଷ ୭ ମାସରେ ଶହେ ଟପିଲାଣି । ଯାହାକୁ ନେଇ ଖୋଦ୍ ସ୍ୱାସ୍ଥ୍ୟ ବିଭାଗ ଉଦ୍ବେଗ ପ୍ରକାଶ କରିଛି । ଏଡ୍ସର ସମୂଳ ବିନାଶ ପାଇଁ କୌଣସି ଔଷଧ ନାହିଁ । ତେଣୁ ସଚେତନତାକୁ ଅଧିକ ଗୁରୁତ୍ୱ ଦିଆଯାଉଛି । ଲୋକଙ୍କୁ ବିଭିନ୍ନ ବାଟରେ ସଚେତନ କରାଯାଇ ଏହି ରୋଗରୁ ଦୂରେଇ ରହିବାକୁ ଚେଷ୍ଟା କରାଯାଉଛି । ସଚେତନତା ସୃଷ୍ଟି ପାଇଁ ଜିଲ୍ଲାରେ ୩ଟି ଏନ୍ଜିଓ କାମ କରୁଛି । ସରକାରୀ ସୁବିଧା ସୁଯୋଗରେ ଏଡ୍ସ ରୋଗୀଙ୍କୁ ଅଗ୍ରାଧିକାର ଦିଆଯାଉଛି । ସ୍କ୍ରିନିଂ ଓ ଟେଷ୍ଟିଂକୁ ଜୋରଦାର କରାଯାଉଛି । ଗତ ୭ ମାସରେ ଜିଲ୍ଲାର ୧ ଲକ୍ଷ ୧୭ ହଜାର ୫୫୫ ଜଣଙ୍କ ଟେଣ୍ଟିଂ କରାଯିବା ସହିତ କାଉନ୍ସେଲିଂ କରାଯାଇଛି । ସମସ୍ତ ସଂକ୍ରମିତଙ୍କୁ ଉପଯୁକ୍ତ ଚିକିତ୍ସା ଯୋଗାଇ ଦିଆଯାଉଥିବା ଜିଲ୍ଲା ଏଡ୍ସ ପ୍ରତିକାର ଓ ନିୟନ୍ତ୍ରଣ ୟୁନିଟ୍ ପକ୍ଷରୁ କୁହାଯାଇଛି।