ନୂଆଦିଲ୍ଲୀ, ୧୯।୯: ଭାରତୀୟ ମହାକାଶ ଗବେଷଣା ପ୍ରତିଷ୍ଠାନ (ଇସ୍ରୋ)ର ସୂର୍ଯ୍ୟ ଅଭିଯାନ ଆଦିତ୍ୟ ଏଲ୍-୧ ବୈଜ୍ଞାନିକ ତଥ୍ୟ ସଂଗ୍ରହ କରିବା ଆରମ୍ଭ କରିଦେଇଛି । ଏଣିକି ମହାକାଶର ପାଣିପାଗ ବାବଦରେ ତଥ୍ୟ ମିଳିପାରିବ । ଇସ୍ରୋ ସୋମବାର କହିଛି ଯେ ମହାକାଶ ଯାନ ଆଦିତ୍ୟ ଏଲ୍-୧ରେ ଲାଗିଥିବା ସୁପ୍ରା ଥର୍ମାଲ୍ ଏବଂ ଏନର୍ଜେଟିକ୍ ପାର୍ଟିକଲ୍ ସ୍ପେକ୍ଟ୍ରୋମିଟର ବା ‘ଷ୍ଟେପ୍ସ’ ଉପକରଣକୁ ସେପ୍ଟେମ୍ବର ୧୦ରେ ପୃଥିବୀଠାରୁ ୫୦ ହଜାର କିଲୋମିଟର ଦୂରରୁ ସକ୍ରିୟ କରାଯାଇଥିଲା । ଏଥିରୁ ମିଳିବାକୁ ଥିବା ଡାଟା ଦ୍ୱାରା ସୂର୍ଯ୍ୟରୁ ଉଠୁଥିବା ଝଡ଼ ଏବଂ ମହାକାଶର ପାଣିପାଗ ନେଇ ସୂଚନା ମିଳିପାରିବ ।
ଷ୍ଟେପ୍ସ ଉପକରଣ ଆଦିତ୍ୟ ସୋଲାର୍ ୱିଣ୍ଡ (ସୌର ଝଡ଼) ପାର୍ଟିକଲ୍ ଏକ୍ସପେରିମେଣ୍ଟ ବା ‘ଆସ୍ପେକ୍ସ’ ପେଲୋଡ୍ର ଅଂଶବିଶେଷ । ଷ୍ଟେପ୍ସରେ ୬ଟି ସେନ୍ସର ଲାଗିଛି । ପ୍ରତ୍ୟେକ ସେନ୍ସର ପୃଥକ୍ ପୃଥକ୍ ଦିଗରେ ନିରୀକ୍ଷଣ କରିବ ଏବଂ ୧ ଏମ୍ଇଭିରୁ ଅଧିକ ଇଲେକ୍ଟ୍ରନ୍ ବ୍ୟତୀତ ୨୦ କେଇଭି/ନ୍ୟୁକ୍ଲିୟନ୍ରୁ ଆରମ୍ଭ କରି ୫ ଏମ୍ଇଭି/ନ୍ୟୁକ୍ଲିୟନ୍ ପର୍ଯ୍ୟନ୍ତ ସୁପ୍ରା-ଥର୍ମାଲ୍ ଏବଂ ଏନର୍ଜେଟିକ୍ ଆୟନ୍କୁ ମାପିବ । ଇସ୍ରୋ ଆଜି ମହାକାଶ ଯାନକୁ ରାତି ପ୍ରାୟ ୨ଟାରେ ଟ୍ରାନ୍ସଲାଙ୍ଗ୍ରାଞ୍ଜିୟନ୍ ପଏଣ୍ଟ ୧ରେ ପ୍ରବେଶ କରାଇଛି । ଏଥିଲାଗି ଯାନର ଥ୍ରଷ୍ଟର୍କୁ କିଛି ସମୟ ପାଇଁ ଫାୟାର କରାଯାଇଥିଲା ।
ଟ୍ରାନ୍ସ ଲାଙ୍ଗରାଞ୍ଜିୟନ୍ ପଏଣ୍ଟ ୧ ପ୍ରବେଶ ଅର୍ଥ ମହାକାଶ ଯାନକୁ ପୃଥିବୀର କକ୍ଷପଥରୁ ଲାଙ୍ଗ୍ରାଞ୍ଜିୟନ୍ ପଏଣ୍ଟ ୧ ବା ଏଲ୍-୧ ପଏଣ୍ଟ ଅଭିମୁଖେ ପଠାଇବା । ଏଠାରୁ ଆଦିତ୍ୟ ଏଲ୍-୧ ନିଜ ୧୫ ଲକ୍ଷ କିଲୋମିଟର ଯାତ୍ରା ଆରମ୍ଭ କରିବ । ୪ ମାସ ପରେ ବା ୨୦୨୪ ଜାନୁଆରୀରେ ଏହା ଏଲ୍-୧ ପଏଣ୍ଟରେ ପହଞ୍ଚିବ । ସୂର୍ଯ୍ୟ ଅଭିଯାନ ଆଦିତ୍ୟ ଏଲ୍-୧କୁ ସେପ୍ଟେମ୍ବର ୨ ପୂର୍ବାହ୍ନ ୧୧ଟା ୫୦ରେ ପିଏସ୍ଏଲ୍ଭି-ସି୫୭ର ଏକ୍ସଏଲ୍ ଭର୍ସନ୍ ରକେଟ୍ ଜରିଆରେ ପ୍ରକ୍ଷେପଣ କରାଯାଇଥିଲା ।
