ଭୁବନେଶ୍ୱର,୦୩/୧୨: ଆୟ ପରିମାଣ ବଢ଼ି  ବଢ଼ି ଚାଲିଛି । ଧନ ବଢ଼ାଇ ଚାଲିଛନ୍ତି ଦେଶର ଆଞ୍ଚଳିକ  ଦଳ । ୨୦୨୦-୨୧ରେ ୧୦ ପ୍ରମୁଖ ଆଞ୍ଚଳିକ ଦଳର  ସମ୍ପତ୍ତି ପରିମାଣ ଯେତିକି ଥିଲା, ୨୦୨୧-୨୨ ଆର୍ଥିକ  ବର୍ଷରେ ସେଥିରେ ଅଧିକ ୪୮.୪୮ ପ୍ରତିଶତ ସମ୍ପତ୍ତି ଯୋଡ଼ିଛନ୍ତି । ସମାଜବାଦୀ ପାର୍ଟି ଦେଶର ସବୁଠୁ ଧନୀ  ଆଞ୍ଚଳିକ ଦଳ ହୋଇଥିଲା ବେଳେ ଦ୍ୱିତୀୟ ସ୍ଥାନରେ  ତେଲଙ୍ଗାନାର ବିଆରଏସ୍‌ ରହିଛି । ବିଜୁ ଜନତା ଦଳ  ଦେଶର ତୃତୀୟ ଧନୀ ଆଞ୍ଚଳିକ ଦଳ ହୋଇଛି ।  ଆସୋସିଏସନ ଫର ଡେମୋକ୍ରାଟିକ୍‌ ରିଫର୍ମସ  (ଏଡିଆର) ରିପୋର୍ଟ ଏହା କହୁଛି । 

ଏଡିଆର ରିପୋର୍ଟ ଦର୍ଶାଇଛି, ଦେଶର ପ୍ରମୁଖ ୪୪  ଆଞ୍ଚଳିକ ଦଳର ସତ୍ୟପାଠ କହୁଛି ଯେ, ୨୦୨୦- ୨୧ରେ ଏମାନଙ୍କର ମୋଟ ସମ୍ପତ୍ତି ପରିମାଣ ଥିଲା  ୨୨୪୯.୨୫ କୋଟି । ୨୦୨୧-୨୨ ରେ ଏହାର ପରିମାଣ  ୩୦୦୦.୬୨ କୋଟି ଟଙ୍କା (୩୭ ଦଳର) । ଦେଶର  ପ୍ରମୁଖ ୧୦ ଆଞ୍ଚଳିକ ଦଳର ସମ୍ପତ୍ତି ୨୦୨୦-୨୧ରେ  ୧୯୫୯.୩୫୧ କୋଟି ଥିଲା ବେଳେ ୨୦୨୧-୨୨ରେ  ଏହାର ପରିମାଣ ୨୯୦୯.୧୮୬ କୋଟି ଛୁଇଁଥିଲା । ଯାହାକି  ପୂର୍ବ ଆର୍ଥିକ ବର୍ଷ ତୁଳନାରେ ପ୍ରାୟ ୪୯% ଅଧିକ ।  ସମାଜବାଦୀ ପାର୍ଟିର ସମ୍ପତ୍ତି ପରିମାଣ ୫୬୧.୪୬  କୋଟି ଥିଲା ବେଳେ ବିଆରଏସ୍‌ର ୫୧୨.୨୪ କୋଟି ।  ସମାଜବାଦୀ ପାର୍ଟି ୨୦୨୦-୨୧ ତୁଳନାରେ ୧.୨୩%  ସମ୍ପତ୍ତି ବଢ଼ାଇଛି । ବିଆରଏସ୍‌ ନିଜ ସମ୍ପତ୍ତି ପରିମାଣ  ୬୦% ବୃଦ୍ଧି କରିପାରିଛି । ୨୦୨୧-୨୨ରେ ବିଜେଡିର  ସମ୍ପତ୍ତି ୪୭୪.୪୨ କୋଟି ଥିଲା, ଯାହାକି ୨୦୨୦-୨୧  ତୁଳନାରେ ୧୪୩.୯୨% ଅଧିକ । ୨୦୨୦-୨୧ରେ ଦଳର  ସମ୍ପତ୍ତି ପରିମାଣ ଥିଲା ୧୯୪.୪୯୫ କୋଟି ଟଙ୍କା ।  ସେହିଭଳି ଡିଏମକେ ନିଜ ସମ୍ପତ୍ତିରେ ଅଧିକ  ୨୪୪.୮୮% ଯୋଗ କରିଥିଲା ବେଳେ ଆପ୍‌ ୭୧.୭୬%  ସମ୍ପତ୍ତି ବୃଦ୍ଧି କରିବାରେ ସକ୍ଷମ ହୋଇଛି ।