କୋରାପୁଟ,୦୩/୧୨: କୋରାପୁଟ ଜିଲ୍ଲା ପଟାଙ୍ଗୀ ବ୍ଲକ୍ର କୋଟିଆ ପଞ୍ଚାୟତରେ ପୁଣି ଅନୁପ୍ରବେଶ କରିଛି ଆନ୍ଧ୍ର । କିଛିଦିନ ତଳେ ଉପରସେମ୍ବି ଗାଁରେ ମୋବାଇଲ୍ ଟାୱାର ସ୍ଥାପନ କରିଥିବା ବେଳେ ଏବେ ଏକ ବିଜୁ ପକ୍କା ଘରେ ଆରମ୍ଭ କରିଛି ଡାକସେବା । ଏ ସମ୍ପର୍କରେ ଜାଣିବା ପରେ ରାଜସ୍ୱ ବିଭାଗ ପକ୍ଷରୁ ସମ୍ପୃକ୍ତ ଡାକଘରକୁ ବନ୍ଦ କରାଯାଇଛି । ଜିଲ୍ଲା ପ୍ରଶାସନର ବାରମ୍ବାର ତାଗିଦ୍ ସତ୍ତେ୍ୱ ବିବାଦ ସୃଷ୍ଟି କରୁଛି ଆନ୍ଧ୍ର ।
କୋଟିଆରେ ଦୀର୍ଘ ୪୫ବର୍ଷ ହେବ ଡାକଘର ରହିଛି । ଏଠାରେ ଦ୍ୱିତୀୟ ଡାକଘର ଖୋଲିବାର କୌଣସି ଯଥାର୍ଥ ନାହିଁ । ତଥାପି ଆନ୍ଧ୍ର ବାରମ୍ବାର ଏଭଳି ବିଶୃଙ୍ଖଳା ସୃଷ୍ଟି କରୁଛି । ସ୍ଥାନୀୟ ପ୍ରଶାସନ କିମ୍ବା ରାଜ୍ୟ ସରକାର କଡ଼ା ଜବାବ୍ ଦେଉନଥିବାରୁ ଏଭଳି ସ୍ଥିତି ସୃଷ୍ଟି ହେଉଥିବା ବୁଦ୍ଧିଜୀବୀ କହିଛନ୍ତି । କୋଟିଆରେ ପଟ୍ଟାଙ୍ଗି ଉପଡାକଘର ଅଧୀନରେ ଦୀର୍ଘ ୪୫ବର୍ଷ ହେବ ଏକ ଡାକଘର ରହିଛି । ଅଞ୍ଚଳବାସୀଙ୍କୁ ଏହା ସେବା ଯୋଗାଇ ଆସୁଛି । ଅଞ୍ଚଳର ପିନ୍କୋର୍ଡ ହେଉଛି-୭୬୪୦୩୯ ।
କୋଟିଆର ପୋଷ୍ଟଲ୍ ଇଣ୍ଡେକ୍ସ କୋର୍ଡ ଅନୁସାରେ ଏହି ଅଞ୍ଚଳ ଓଡ଼ିଶାର ବୋଲି କେନ୍ଦ୍ର ସରକାର ସ୍ୱୀକୃତି ପ୍ରଦାନ କରିଛନ୍ତି । ଅଥଚ ଆନ୍ଧ୍ର ଅଧିକାରୀମାନେ କୋଟିଆ ପଞ୍ଚାୟତର ଉପରସେମ୍ବି ଗାଁର ରୂପା ଗେମେଲ୍ଙ୍କ ବିଜୁ ପକ୍କା ଘରେ ଗତ ଗୁରୁବାର ଏକ ଡାକଘର ଖୋଲିବାକୁ ଉଦ୍ୟମ କରିଥିଲେ । ସମ୍ପୃକ୍ତ ଘରକୁ ରଙ୍ଗମାରି ଡାକଘରର ରୂପ ଦେଇଥିଲେ । ତେଲୁଗୁ ଭାଷାରେ ଡାକଘର ବୋଲି ଉଲ୍ଲେଖ କରିଥିଲେ । ଖବର ପାଇ ସଙ୍ଗେ ସଙ୍ଗେ ସ୍ଥାନୀୟ ରାଜସ୍ୱ ଅଧିକାରୀମାନେ ସେଠାରେ ପହଞ୍ଚିଥିଲେ । ବିରୋଧ କରି ଆନ୍ଧ୍ରର କର୍ମଚାରୀଙ୍କୁ ଘଉଡ଼ାଇ ଦେଇଥିଲେ । ପୁଣିଥରେ ସମ୍ପୃକ୍ତ ଘରକୁ ଧଳାରଙ୍ଗ ମାରିଥିଲେ ।
ଏହି ଅଞ୍ଚଳ ଓଡ଼ିଶା ସରକାରଙ୍କ ଅଧୀନରେ ଥିବା ବେଳେ ଲୋକେ ମଧ୍ୟ ରାଜ୍ୟ ସରକାରଙ୍କ ସମସ୍ତ ସୁବିଧା ପାଉଛନ୍ତି । ତଥାପି ଆନ୍ଧ୍ର ଏଠାରେ ଅନୁପ୍ରବେଶ କରିବାକୁ ବାରମ୍ବାର ଉଦ୍ୟମ କରୁଛି । ପୂର୍ବରୁ ମେଗା ହେଲ୍ଥ କ୍ୟାମ୍ପ୍ କରିବା ସହ ଏକ ମୋବାଇଲ୍ ଟାୱାର ନିର୍ମାଣ କରିଛି । ବର୍ତ୍ତମାନ ଆନ୍ଧ୍ର କେବଳ ଉପରସେମ୍ବି ଓ ତଳସେମ୍ବିଗାଁକୁ ଗୁରୁତ୍ୱ ଦେଉଛି । ଅଧିକାରୀମାନେ ପୂର୍ବଭଳି ଆଉ କୋଟିଆ ପଞ୍ଚାୟତ ମୁଖ୍ୟାଳୟକୁ ଆସୁନାହାନ୍ତି । ଉପରୋକ୍ତ ଦୁଇ ଗାଁ ସମେତ ଧୂଳିପଦର, ଆରଜୁବାଲାସା, ତାଡ଼ିବାଲାସା ଓ ନେରେଡିବାଲାସା ଗାଁରେ ବହୁ ସମୟରେ ଆନ୍ଧ୍ର ଅଧିକାରୀମାନେ ରହୁଛନ୍ତି । ତେଣୁ ରାଜ୍ୟ ସରକାର ଏଥିପ୍ରତି ତୀକ୍ଷ୍ଣ ନଜର ରଖିବା ଆବଶ୍ୟକ ବୋଲି ବୁଦ୍ଧିଜୀବୀ ମହଲରେ ମତ ପ୍ରକାଶ ପାଇଛି ।