ନୂଆଦିଲ୍ଲୀ ୨୭/୦୨: ଗଲ୍ଫ ଦେଶରେ ବ୍ୟାନ୍ ହୋଇଛି ୟାମି ଗୌତମ ଷ୍ଟାରର୍ ଆକ୍ସନ୍ ପଲିଟିକାଲ୍ ଥ୍ରିଲର୍ ‘ଆର୍ଟିକଲ୍- ୩୭୦’ । ବାହାରିନ, କୁଏତ, ଇରାକ, ଓମାନ, କାତାର, ସାଉଦି ଆରବ ଓ ସଂଯୁକ୍ତ ଆରବ ଏମିରେଟ୍ସରେ ଏହାର ରିଲିଜ୍ ଉପରେ କଟକଣା ଲାଗୁ ହୋଇଛି । ଏ ପ୍ରକାର ସେନ୍ସରସିପ୍ ସାମ୍ନା କରିଥିବା ବର୍ଷର ଏହା ୨ୟ ଫିଲ୍ମ । ଏହା ପୂର୍ବରୁ ଋତ୍ୱିକ ରୋଶନ ଓ ଦୀପିକା ପାଦୁକୋନ ଷ୍ଟାରର୍ ‘ଫାଇଟର୍’କୁ ସଂଯୁକ୍ତ ଆରବ ଏମିରେଟ୍ସ ବାଦ୍ ଦେଲେ ଅନ୍ୟ ସମସ୍ତ ଗଲ୍ଫ ଦେଶରେ ବ୍ୟାନ୍ କରାଯାଇଥିଲା ।
ଆଦିତ୍ୟ ସୁହାସ ଜାମଭଲେଙ୍କ ନିର୍ଦ୍ଦେଶିତ ଏହି ଫିଲ୍ମ ରାଜନୈତିକ ବିଷୟକୁ ପରଦାରେ ଉତାରିଛି । ଜାମ୍ମୁକାଶ୍ମୀରକୁ ମିଳିଥିବା ସ୍ୱତନ୍ତ୍ର ରାଜ୍ୟ ମାନ୍ୟତାକୁ ରଦ୍ଦ କରିବାର କେନ୍ଦ୍ର ସରକାରଙ୍କ ନିଷ୍ପତ୍ତି ଉପରେ ଏହା ପର୍ଯ୍ୟବସିତ । ଫିଲ୍ମରେ ଅନେକ ବିଷୟ ପ୍ରଦର୍ଶିତ ହୋଇଛି, ଯାହାକୁ ନେଇ ଲୋକେ ଆଜି ବି ଅଜ୍ଞ । ବକ୍ସଅଫିସ୍ରେ ଏହା ଭଲ ପ୍ରଦର୍ଶନ କରୁଛି । ‘ଆର୍ଟିକଲ୍- ୩୭୦’ରେ ୟାମି ଜୁନି ହକସର ନାମ୍ନୀ ଜଣେ ଇଣ୍ଟେଲିଜେନ୍ସ ଅଫିସର ଭୂମିକା ନିର୍ବାହ କରିଛନ୍ତି ।
ପ୍ରଧାନମନ୍ତ୍ରୀ ମୋଦି ନିକଟରେ ନିଜ ଭାଷଣରେ ଫିଲ୍ମ ବିଷୟରେ ଆଲୋଚନା କରିଥିଲେ । ସେ କହିଥିଲେ ‘ମୁଁ ଶୁଣିଛି ଏ ସପ୍ତାହରେ ‘ଆର୍ଟିକଲ୍-୩୭୦’ ଉପରେ ଏକ ଫିଲ୍ମ ରିଲିଜ୍ ହେବାକୁ ଯାଉଛି । ଏହା ଭଲ କଥା । କାରଣ ଏହା ଦ୍ୱାରା ଲୋକଙ୍କୁ ସଠିକ୍ ତଥ୍ୟ ମିଳିପାରିବ ।’ ଚଳିତ ମାସ ୨୩ ତାରିଖରେ ମୁକ୍ତିପ୍ରାପ୍ତ ଏହି ଫିଲ୍ମ ଦେଶରେ ୬ କୋଟି ୧୨ ଲକ୍ଷରୁ ଅଧିକ ବ୍ୟବସାୟ କରିଛି । ସପ୍ତାହାନ୍ତରେ ଏହା ବିଶ୍ୱସ୍ତରରେ ୩୪.୭୧ କୋଟି କଲେକ୍ସନ୍ କରିଛି ।