ମାଲକାନଗିରି, ୨।୨ : ମାଲକାନଗିରି ଜିଲ୍ଲା ସୀମାନ୍ତରେ ମାଓବାଦୀଙ୍କ ଲଙ୍କାକାଣ୍ଡ ଦେଖିବାକୁ ମିଳିଛି । ସୀମାନ୍ତ ଛତିଶଗଡ ରାଜ୍ୟର ନାରାୟଣପୁର ଜିଲ୍ଲାରେ ମୁଖ୍ୟମନ୍ତ୍ରୀଙ୍କ ଗସ୍ତ ପୂର୍ବରୁ ନକ୍ସଲମାନେ ଏକ ବଡ଼ ଧରଣର ଅଗ୍ନିକାଣ୍ଡ ଘଟାଇଛନ୍ତି। ପୋଲ ନିର୍ମାଣ କାର୍ଯ୍ୟରେ ନିୟୋଜିତ ଥିବା ୪ଟି ଗାଡିରେ ନିଆଁ ଲଗାଇ ପୁଣି ନିଜର ସ୍ଥିତି ଜାହିର କରିଛନ୍ତି ନକ୍ସଲ । ସୂଚନା ଅନୁଯାୟୀ ଛତିଶଗଡ଼ ରାଜ୍ୟ ନାରାୟଣପୁର ଜିଲ୍ଲାର ଅବୁଜମାଡ ଅଞ୍ଚଳ ମାଓପ୍ରବଣ ଅଞ୍ଚଳ । ଦୀର୍ଘ ଦିନ ବ୍ୟବଧାନ ପରେ ଏହି ଅଞ୍ଚଳରେ ପୋଲ, ରାସ୍ତା ଭଳି ବିଭିନ୍ନ ବିକାଶ କାର୍ଯ୍ୟ ଚାଲୁ ରହିଛି । ଆଗକୁ ନାରାୟଣପୁର ଜିଲ୍ଲାକୁ ମୁଖ୍ୟମନ୍ତ୍ରୀଙ୍କ ଗସ୍ତ ଯୋଜନା ରହିଥିବା ବେଳେ ଏହାର ଠିକ ପୂର୍ବରୁ ନକ୍ସଲମାନେ ଏକ ବଡ଼ ଧରଣର ଅଗ୍ନିକାଣ୍ଡ ଘଟାଇଛନ୍ତି । ସୂଚନାନୁସାରେ ମାଓ ସଂଗଠନର ପାଖାପାଖୀ ୫୦ ରୁ ଉର୍ଦ୍ଧ ମାଓବାଦୀ ଘଟଣା ସ୍ଥଳରେ ପହଞ୍ଚି ଜିବଲାପଦର ଗ୍ରାମରେ ପୋଲ ନିର୍ମାଣ କାର୍ଯ୍ୟରେ ନିୟୋଜିତ ଥିବା ଯାନବାହାନରେ ନିଆଁ ଲଗାଇ ଦେଇଥିଲେ । ବହୁ ସଂଖ୍ୟାରେ ଆସିଥିବା ନକ୍ସଲମାନେ ୱାଟର ଟ୍ୟାଙ୍କର୍, ମିକ୍ସର୍ ମେସିନ, ଟ୍ରାକ୍ଟର ଗାଡିରେ ନିଆଁ ଲଗାଇ ଦେଇଥିଲେ । ସେତୁ ନିର୍ମାଣ କାର୍ଯ୍ୟରେ ନିୟୋଜିତ ଶ୍ରମିକଙ୍କ ଏକ ମୋଟର ସାଇକେଲକୁ ମଧ୍ଯ ନକ୍ସଲ ମାନେ ସାଙ୍ଗରେ ନେଇ ଯାଇଥିବା କୁହାଯାଉଛି । ତେବେ ଏହାପରେ ଘଟଣା ସ୍ଥଳରେ ପୋଲିସ ଦମକଳ ବାହିନୀ ପହଁଚି ନିଆଁ ଉପରେ ଆୟତ୍ତ କରିବା ସହ ଘଟଣାର ତଦନ୍ତ ଜାରି ରଖି ସୁରକ୍ଷା ବ୍ୟବସ୍ଥାକୁ କଡାକଡି କରିଛି ।