ଭୁବନେଶ୍ୱର,୧୦/୦୯: ଆୟୁଷ୍ମାନ ଆକାଶ ସହ ଆୟୁଷ୍ମତୀ ବର୍ଷାର ଶୁଭ ପରିଣୟ ହୁଏ ଏକ ଅଶୁଭ  ମୁହୂର୍ତ୍ତରେ । କାରଣ ଏ ବିବାହରେ ଉଭୟଙ୍କର ସହମତି  ନଥିଲା । ପ୍ରକୃତରେ ଉଭୟ ପରିବାରଙ୍କ ସମ୍ମତି କ୍ରମେ  ବର୍ଷାର ବଡ଼ ଭଉଣୀକୁ ଆକାଶ ବିବାହ କରିବାର ଥିଲା । କିନ୍ତୁ ବିବାହ ଦିନ ସେ ତା’ ପ୍ରେମିକ ସହ ଫେରାର ହୋଇଯିବାରୁ  ବାଧ୍ୟ ହେଇ ପରିବାରର ଇଜତ୍‌ ବଞ୍ଚାଇବାକୁ ବର୍ଷା ପରୀକ୍ଷା  ଅଧାରୁ ବିବାହ କରିଥିଲା ଆକାଶକୁ । ଯିଏକି ଅବଶୋଷରେ  ମନଦୁଃଖରେ ରହୁଥିଲା । ବିବାହ ଯୋଗୁ ପାଠ ଅଧା ରହିଗଲା । ବର୍ଷାର ବଡ଼ ଭଉଣୀକୁ ଦେଖି ପସନ୍ଦ କରିଥିବା ଆକାଶ ମଧ୍ୟ  ବର୍ଷା ସହ ସହଜରେ ମିଶି ପାରୁନଥିଲା । ଦୁଇ ଜଣଙ୍କ ମତ  ପାର୍ଥକ୍ୟ ଶେଷରେ ହାତ ଉଠା ଉଠି ଯାଏଁ ଯାଇ ଛାଡ଼ପତ୍ରରେ  ପହଞ୍ଚିଥିଲା । କିନ୍ତୁ ଉଭୟଙ୍କ ପରିବାର ମିଶି ଏହି ବିବାହକୁ  କେମିତି ବଞ୍ଚେଇ ପାରିଛନ୍ତି ତାହାହିଁ ନୂଆ ଟେଲି ସିନେମା ‘ଆୟୁଷ୍ମାନ ଆକାଶ ଓ ଆୟୁଷ୍ମତୀ ବର୍ଷା’ର ବିଷୟବସ୍ତୁ ।  

ତରଙ୍ଗ ସିନେ ପ୍ରଡକ୍ସନ୍ସ ପ୍ରଯୋଜିତ ଏହି ଟେଲି ସିନେମାଟି  ରବିବାର ସନ୍ଧ୍ୟା ୬ଟାରେ ତରଙ୍ଗ ଟିଭିରେ ୱାର୍ଲ୍ଡ ଟେଲିଭିଜନ  ପ୍ରିମିୟର ହେବ । ଏହାର ମୁଖ୍ୟ ଭୂମିକାରେ ଜ୍ୟୋତି ଓ କେଟି  ଥିବାବେଳେ ଅନ୍ୟମାନଙ୍କ ମଧ୍ୟରେ ପ୍ରଦ୍ୟୁମ୍ନ ଲେଙ୍କା, ନମ୍ରତା  ଦାସ, ଶୁଭ୍ରାଂଶୁ, ଦୀପ୍ତି, ଅଶୋକ, ତ୍ରିଭୁବନ ପଣ୍ଡା, କାଳିଆ  ପ୍ରମୁଖ ରହିଛନ୍ତି । ସିନେମାର କାହାଣୀ ସନ୍ତୋଷ ନାରାୟଣ  ଦାଶ ଲେଖିଥିବାବେଳେ ଚିତ୍ରନାଟ୍ୟ ଓ ସଂଳାପ ଲେଖିଛନ୍ତି  ବି. ଚନ୍ଦନ କୁମାର । ନିର୍ଦ୍ଦେଶନା ଦେଇଛନ୍ତି ରାଶେଷ ମହାନ୍ତି। ଗୀତ ରଚନା ସଂଗ୍ରାମଜିତ୍‌ ଓ ବ୍ରଜକିଶୋର କରିଥିବାବେଳେ ସଙ୍ଗୀତ ନିର୍ଦ୍ଦେଶନା ଦେଇଛନ୍ତି ଦୀପ୍ତିମାନ ଷଡ଼ଙ୍ଗୀ, ରୁଦ୍ର  ପ୍ରସାଦ ନାୟକ। ଗୀତଗୁଡ଼ିକୁ ଗାଇଛନ୍ତି ସତ୍ୟଜିତ୍‌ ପ୍ରଧାନ,  ତାରିକ୍‌ ଅଜିଜ୍‌, ଜ୍ୟୋର୍ତିମୟୀ ନାୟକ, ଦୀପ୍ତିମାନ ଷଡ଼ଙ୍ଗୀ  ଓ ଶୀତଲ କବି । କୋରିଓଗ୍ରାଫି କରିଛନ୍ତି ଲୁବୁନ-ଟୁବୁନ। ଡିଓପିରେ ଆରିଫ୍‌ ୟୁସୁଫ୍‌ ଶେଖ୍‌ ଓ ସମ୍ପାଦନା ପିଣ୍ଟୁ ନାୟକ  କରିଛନ୍ତି । ପ୍ରଯୋଜିକା ରହିଛନ୍ତି ଦେବିପ୍ରଭା ପାତ୍ର।