ନୂଆଦିଲ୍ଲୀ: ୩ ରାଜ୍ୟରେ ବିଜୟ ସହ ବିଜେପି ଏବେ ଦେଶର ୧୨ ରାଜ୍ୟରେ ନିଜ ସରକାର ଗଢ଼ିବାରେ ସଫଳ ହେବାକୁ ଯାଉଛି । ଅର୍ଥାତ ଦେଶର ୧୨ଟି ରାଜ୍ୟରେ କେବଳ ବିଜେପି ସରକାର ଥିବା ବେଳେ ଦ୍ବିତୀୟ ବୃହତ୍ତ ଦଳ କଂଗ୍ରେସ ଛତିଶଗଡ଼ ଏବଂ ରାଜସ୍ଥାନରେ ପରାସ୍ତ ହେବା ସହ କେବଳ ୩ଟି ରାଜ୍ୟରେ ଶାସନରେ ରହିବ । ସେହିଭଳି ଦିଲ୍ଲୀ ଏବଂ ପଞ୍ଜାବରେ ବିଜୟ ସହ ଆମ ଆଦମୀ ପାର୍ଟି (ଆପ୍) ତୃତୀୟ ବୃହତ୍ତ ଜାତୀୟ ଦଳର ମାନ୍ୟତା ହାସଲ କରିଛି ।
ଦେଶର ଶାସନରେ ଥିବା ବିଜେପି ଉତ୍ତରାଖଣ୍ଡ, ହରିୟାଣା, ଉତ୍ତର ପ୍ରଦେଶ, ଗୁଜରାଟ, ଗୋଆ, ଆସାମ, ତ୍ରିପୁରା, ମଣିପୁର, ଅରୁଣାଚଳ ପ୍ରଦେଶ ଏବଂ ଭୋଟ ଗଣିତି ଚାଲିଥିବା ରାଜ୍ୟ ମଧ୍ୟପ୍ରଦେଶ, ଛତିଶଗଡ଼ ଏବଂ ରାଜସ୍ଥାନରେ ସରକାର ଗଢ଼ିବାକୁ ଯାଉଛି । ଏହା ସହ ବିଜେପି ମହାରାଷ୍ଟ୍ର, ମେଘାଳୟ, ନାଗାଲାଣ୍ଡ ଏବଂ ସିକ୍କିମ ସରକାରରେ ଭାଗିଦାରୀ ରହିଛି । ଏଠାରେ ଶାସକ ମେଣ୍ଟ ସରକାରରେ ରହିଛିି ବିଜେପି । ତେବେ ୧୬ଟି ରାଜ୍ୟରେ ବିଜେପି ସରକାର ରହିଛି ବୋଲି କହିଲେ ଭୁଲ ହେବ ନାହିଁ ।
ବିଜେପି ପରେ କଂଗ୍ରେସ ନିଜ ଦମରେ ୩ଟି ରାଜ୍ୟ କର୍ଣ୍ଣାଟକ, ହିମାଚଳ ପ୍ରଦେଶ ଏବଂ ତେଲେଙ୍ଗାନାରେ କ୍ଷମତା ହାତେଇବାରେ ସକ୍ଷମ ହୋଇଛି । ତେଲେଙ୍ଗାନାରେ ଆଜି ଭୋଟ ଗଣତି ଚାଲିଥିବା ବେଳେ ବିଆରଏସକୁ ପଛରେ ପକାଇ କଂଗ୍ରେସ ଏଠାରେ ସରକାର ଗଢ଼ିବାକୁ ଯାଉଛି । ସେହିଭଳି ବିହାର ଏବଂ ଝାଡ଼ଖଣ୍ଡ ମେଣ୍ଟ ସରକାରରେ କଂଗ୍ରେସର ଭାଗିଦାରୀ ରହିଛି । ତେବେ ତାମିଲନାଡୁରେ ଡିମଏମକେ ସରକାର କରିଥିବା ବେଳେ କଂଗ୍ରେସ ମଧ୍ୟ ଏକ ସହଯୋଗୀ ଦଳ ।
ସେପଟେ ଦେଶର ତୃତୀୟ ବୃହତ୍ତ ଜାତୀୟ ଦଳ ଆପ୍ ଦୁଇଟି ରାଜ୍ୟରେ କେନ୍ଦ୍ର ସରକାରଙ୍କ ସବୁଠୁ ବଡ଼ ବିରୋଧୀ ଦଳ । କାରଣ ଏହି ରାଜ୍ୟରେ କଂଗ୍ରେସର ଭୋଟ ସେୟାର ଖୁବ କମିଛି । ଆଜି ନିର୍ବାଚନ ରେଜଲ୍ଟ ଘୋଷଣା ହେବା ପରେ ଉତ୍ତର ଭାରତର ସବୁଠୁ ବଡ଼ ବିରୋଧୀ ଦଳ ଆପ ହେବ ବୋଲି ଏକ୍ସରେ ଦଳର ନେତ୍ରୀ ଜାସମିନ୍ ଶାହ ଏକ୍ସରେ ପୋଷ୍ଟ କରିଛନ୍ତି । ଭାରତରେ ଏବେ ୬ଟି ଜାତୀୟ ଦଳ ବିଜେପି, କଂଗ୍ରେସ, ବିଏସପି, ସିପିଆଇ(ଏମ), ଏନପିପି ଏବଂ ଆପ୍ ରହିଛି ।
୨୦୨୪ରେ ସିକ୍କିମ, ଅରୁଣାଚଳ ପ୍ରଦେଶ, ଓଡ଼ିଶା ଏବଂ ଆନ୍ଧ୍ରପ୍ରଦେଶରେ ବିଧାନସଭା ନିର୍ବାଚନ ହେବାକୁ ଅଛି । ଏପରିକି ଜାମ୍ମୁକାଶ୍ମୀରରେ ମଧ୍ୟ ବିଧାନସଭା ନିର୍ବାଚନ ବାକି ଅଛି । ସେପଟେ ଅନେକ ସାଂସଦ ବିଧାନସଭା ନିର୍ବାଚନ ଲଢ଼ିଥିବା ବେଳେ ଅନେକ ପଦବୀ ଖାଲି ରହିଛି । ହେଲେ ୨୦୨୪ ସାଧାରଣ ନିର୍ବାଚନ ପୂର୍ବରୁ ଏହି ସବୁ ଆସନରେ ଉପନିର୍ବାଚନ ହେବ ନାହିଁ ।
