ଭୁବନେଶ୍ଵର, ୦୩/୦୩ : ନିର୍ବାଚନ ପୂର୍ବରୁ ଅସନ୍ତୁଷ୍ଟ ନେତାଙ୍କ ଚାଲିଛି ଦଳ ଡିଆଁ କାର୍ଯ୍ୟକ୍ରମ। ଏହାକୁ ନେଇ ବର୍ଷିଲେ ବିଜେଡି ମୁଖପାତ୍ର ସ୍ୱୟଂ ପ୍ରକାଶ ମହାପାତ୍ର। ବିଜେଡି ମୁଖପାତ୍ର କହିଛନ୍ତି ଯେ, ୨୦୧୯ ମସିହାରେ ଯେଉଁ ନେତାମାନଙ୍କୁ ବିଜେଡି ଟିକେଟ ଦେବା ସମ୍ଭାବନା ନଥିଲା କି ବିଜେଡିରେ ସ୍ଥାନ ନଥିଲା, ସେମାନଙ୍କୁ ବିଜେପି କୋଳେଇ ନେଇଥିଲା। ହେଲେ ବିଜେପିର ପ୍ରଦର୍ଶନ କଥା ସମସ୍ତେ ଜାଣି ପାରିଲେ। 

୨୦୨୪ରେ ବି ସମାନ କାର୍ଯ୍ୟ କରି ପାଦେ ଆଗକୁ ଯାଇଛି ବିଜେପି। ଜଘନ୍ୟ ଅପରାଧୀ, ଜନବିରୋଧୀ, ଟିକେଟ ନପାଇବା ନେତାଙ୍କୁ ବିଜେପି ପାଛୋଟି ନେଉଛି। ଏଥିରୁ ଗୋଟେ କଥା ସ୍ପଷ୍ଟ ହେଉଛି, ନୂଆ ନେତା ସୃଷ୍ଟି କରିବାରେ ବିଜେପି ଅସମର୍ଥ। ଏହା ବିଜେପିର ଅପାରଗତକୁ ସ୍ପଷ୍ଟ କରୁଛି। ବିଜେପି ଆହୁରି ନୈରାଶ୍ୟଜନକ ପ୍ରଦର୍ଶନ କରିବାକୁ ଯାଉଛି। ଏପରି ନେତାଙ୍କୁ ରାଜ୍ୟବାସୀ କେବେ ବି ଗ୍ରହଣ କରିବେ ନାହଁ। ମେ ମାସରେ ଏହା ସ୍ପଷ୍ଟ ହୋଇଯିବ। ୨୦୧୯ରେ ମଧ୍ୟ ରାଜ୍ୟବାସୀ ସମାନ ଜବାବ ଦେଇଥିଲେ।