ଅଗରତାଲା, ୧୭/୧୧ : ତ୍ରିପୁରାରେ ଓଡ଼ିଆ ଯବାନ ଶହୀଦ। ଅଗରତାଲା ଲଙ୍କାମୁରା ଆଇରନ ବ୍ରିଜ୍ ନିକଟରୁ ବିଏସଏଫ୍ ଯବାନଙ୍କ ସନ୍ଦେହଜନକ ଅବସ୍ଥାରେ ମୃତଦେହ ଉଦ୍ଧାର ହୋଇଛି। ମୃତକ ଜଣଙ୍କ ହେଉଛନ୍ତି କଳାହାଣ୍ଡି ଜିଲ୍ଲା କେସିଙ୍ଗା ଥାନା ବେଲଖଣ୍ଡି ଗ୍ରାମର ଈଶ୍ଵର ଚନ୍ଦ୍ର ଡୋରା। ସେ କିଛି ବର୍ଷ ତଳେ ବିବାହ କରିଥିଲେ। ତାଙ୍କର ଏକ କନ୍ୟା ସନ୍ତାନ ରହିଛି। ତାଙ୍କର ମୃତ୍ୟୁ ଖବର ପ୍ରସାରିତ ହେବା ପରେ ତାଙ୍କ ପରିବାରରେ ଶୋକର ଛାୟା ଖେଳିଯାଇଛି। 

ସୂଚନାନୁଯାୟୀ, ବିଏସଏଫର ୪୨ତମ ବାଟାଲିୟନର ଯବାନ ଈଶ୍ଵର ଚନ୍ଦ୍ର ଡୋରା ତ୍ରିପୁରାର ଲଙ୍କାମୁରା ବର୍ଡର ଆଉଟପୋଷ୍ଟରେ ଅବସ୍ଥାପିତ ଥିଲେ। ଲଙ୍କାମୁରା ଆଇରନ ବ୍ରିଜ୍ ନିକଟରୁ ଆଜି ସନ୍ଦେହଜନକ ଅବସ୍ଥାରେ ତାଙ୍କର ମୃତଦେହ ଉଦ୍ଧାର ହୋଇଛି। ଏକ କଲଭର୍ଟରୁ ଖସି ପଡ଼ିବା ଯୋଗୁଁ ତାଙ୍କର ମୃତ୍ୟୁ ହୋଇଥିବା ପ୍ରାରମ୍ଭିକ ତଦନ୍ତରୁ ଜଣାପଡ଼ିଛି। 

ତାଙ୍କ ରାଇଫଲ ଉଦ୍ଧାର ହୋଇଛି। ତାଙ୍କ ଦେହରେ ଗୁଳି ବାଜିଥିବାର କୌଣସି ଚିହ୍ନ ନାହିଁ। ତ୍ରିପୁରା ପୋଲିସ ଏନେଇ ଅଧିକ ତଦନ୍ତ ଆରମ୍ଭ କରିଛି।