ନୂଆଦିଲ୍ଲୀ,୨୦/୧୧: ଖୁଚୁରା ବଜାରରେ ଏବେ ଗହମ ଦର ଅନିୟନ୍ତ୍ରିତ । ଦର ନିୟନ୍ତ୍ରଣ କରିବା ଲାଗି ଖୋଲା ବଜାରକୁ କେନ୍ଦ୍ର ସରକାର ନିଲାମ ଜରିଆରେ ଗହମ ଯୋଗାଇ ଦେଉଛନ୍ତି । ଏହା ଅଧିନରେ ୨.୮୪ ଲକ୍ଷ ଟନ୍ ଗହମ ଏବଂ ୫୮୩୦ ଟନ୍ ଚାଉଳ ବଜାରକୁ ଛାଡିଛନ୍ତି କେନ୍ଦ୍ର ସରକାର । ଇ-ନିଲାମ ଦ୍ୱାରା ୨,୩୩୪ ବିଡରଙ୍କୁ ମିଳିଛି ଏହି ଖାଦ୍ୟ ସାମଗ୍ରୀ ।
ଖାଦ୍ୟ ମନ୍ତ୍ରଣାଳୟ ଏକ ବିବୃତ୍ତିରେ କହିଛି ଯେ, ନଭେମ୍ବର ୧୫ରେ ଅନୁଷ୍ଠିତ ହୋଇଥିବା ୨୧ ତମ ଇ-ନିଲାମ ଜରିଆରେ ୩ ଲକ୍ଷ ଟନ୍ ଗହମ ଏବଂ ୧.୭୯ ଲକ୍ଷ ଟନ୍ ଚାଉଳ ଖୋଲା ବଜାରକୁ ଓପନ ମାର୍କେଟ ସେଲ୍ ସ୍କିମ (ଓଏମ୍ଏସ୍ଏସ୍) ଜରିଆରେ ଯୋଗାଇ ଦିଆଯାଇଛି।
ବିଡରଙ୍କୁ ୨.୮୪ ଲକ୍ଷ ଟନ୍ ଗହମ ଓ ୫୮୩୦ ଟନ୍ ଚାଉଳ ବିକ୍ରି କରାଯାଇଥିବା ମନ୍ତ୍ରଣାଳୟ ଉଲ୍ଲେଖ କରିଛି । ଦରଦାମ ସ୍ୱାଭାବିକ ସ୍ଥିତିକୁ ଆଣିବା ଲାଗି ପ୍ରତି ସପ୍ତାହରେ ଏଭଳି କାର୍ୟ୍ୟକ୍ରମ ହାତକୁ ନିଆଯାଉଛି । ଉଭୟ ଚାଉଳ ଏବଂ ଗହମ ନିଲାମ ହେଉଛି । କେନ୍ଦ୍ର ସରକାରଙ୍କ ନୋଡାଲ ଏଜେନ୍ସି ଭାରତୀୟ ଖାଦ୍ୟ ନିଗମ (ଏଫ୍ସିଆଇ) ପକ୍ଷରୁ ଓଏମ୍ଏସ୍ଏସ୍ ସ୍କିମ ଜରିଆରେ ଏହାର ଗଚ୍ଛିତ ଖାଦ୍ୟ ଶସ୍ୟ ମଧ୍ୟରୁ ଖୋଲା ବଜାରକୁ ଯୋଗାଣ ହେଉଛି ।
