ଦଶମନ୍ତପୁର,୨୯/୦୨: ମାଟ୍ରିକ୍ ପରୀକ୍ଷା ଦେଇ ଘରକୁ ଫେରିଥିଲେ ଛାତ୍ର । ସେତେବେଳକୁ ଘରେ ଚାଲିଥିଲା ଭୋଜିଭାତର ଆସର । ଛାତ୍ର ଜଣକୁ ବରସାଜି ବସିବାକୁ ପଡ଼ିଥିଲା ବାହା ବେଦିରେ । କିଛି ସମୟ ପରେ ପଡ଼ିଥାନ୍ତା ହାତଗଣ୍ଠି । ତା’ ପୂର୍ବରୁ ପ୍ରଶାସନ ଓ ପୁଲିସ୍ ଗାଁରେ ପହଞ୍ଚି ରୋକିଲେ ଏହି ବାଲ୍ୟ ବିବାହ । ବେଦିରୁ ନାବାଳକ ବରକନ୍ୟାକୁ ଉଠାଇ ଆଣିଥିଲେ ଥାନାକୁ । ବୁଧବାର ଏଭଳି ଦୃଶ୍ୟ ଦେଖିବାକୁ ମିଳିଥିଲା କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ୍ ଲୁଲା ପଞ୍ଚାୟତର ଶୁକ୍ରାପୁଟ ଗାଁରେ । ଏ ସମ୍ପର୍କରେ ଥାନାରେ ଏକ ମାମଲା ରୁଜୁ ହୋଇଛି। ତଦନ୍ତ ଚାଲୁ ରହିଥିବା ଏଏସ୍ଆଇ ଲକ୍ଷ୍ମୀକାନ୍ତ ପଣ୍ଡା କହିଛନ୍ତି ।
ପୁଲିସ୍ ସୂଚନା ଅନୁଯାୟୀ, ଛୋଟ ଥିବା ବେଳେ ନିଜ ପୁଅ-ଝିଅଙ୍କୁ ବିବାହ ଦେବାଲାଗି ଶୁକ୍ରାପୁଟ ଓ ନାରଗାଁର ଦୁଇ ବନ୍ଧୁ ପରିବାର ପରସ୍ପରକୁ କଥା ଦେଇଥିଲେ । ସେହି ଅନୁସାରେ ଗାଁ ଦିଶାରୀ ବିବାହ ଲାଗି ଯୋଗ ସ୍ଥିର କରିଥିଲେ । ଭୋଜିଭାତର ଆୟୋଜନ କରାଯାଇଥିଲା । ଗାଁରେ ନାଚଗୀତର ଆସର ଜମିଥିଲା । ବୁଧବାର ଅପରାହ୍ଣରେ ଥିଲା ବାହାଘର । ଶୁକ୍ରାପୁଟର ୧୫ ବର୍ଷର ନାବାଳକ ଛାତ୍ର ଜଣକ ମାଟ୍ରିକ୍ ପରୀକ୍ଷା ଦେଇ ମଧ୍ୟାହ୍ନରେ ଘରକୁ ଫେରିଥିଲେ । ବର ସାଜି ୧୪ ବର୍ଷୀୟା କନ୍ୟା ସହ ବେଦିରେ ବସିଥିଲେ । ଏ ସଂପର୍କରେ କୌଣସି ସୂତ୍ରରୁ ଖବର ପାଇ ପୁଲିସ୍ ସହାୟତାରେ ଗାଁରେ ପହଞ୍ଚିଥିଲା ପ୍ରଶାସନ । ଅଙ୍ଗନବାଡ଼ି ସୁପରଭାଇଜର ଅଖବତୀ ମୁସ୍କା, ଲୁଲା ପିଇଓ କେତନ ହଲବା, ଅଙ୍ଗନବାଡ଼ି କର୍ମୀ ବାଡ଼ ମୁଦୁଲି, ଏଏସ୍ଆଇ ଶ୍ରୀ ପଣ୍ଡାଙ୍କ ସମେତ ଅନ୍ୟ ପୁଲିସ୍ କର୍ମଚାରୀ ବରକନ୍ୟାଙ୍କୁ ବେଦିରୁ ଉଠାଇ ଆଣିଥିଲେ ଥାନାକୁ । ପରେ ଉଭୟଙ୍କ ପରିବାରକୁ ଥାନାକୁ ଡକାଇଥିଲେ । ବାଲ୍ୟବିବାହ କରିବା ଆଇନତଃ ଅପରାଧ ବୋଲି ପ୍ରଶାସନ ଓ ପୁଲିସ୍ ପକ୍ଷରୁ ବୁଝାଯାଇଥିଲା । ପୁଅଝିଅଙ୍କୁ ୧୮ ବର୍ଷ ହେବା ପରେ ବିବାହ ଦେବାକୁ ଶପଥପାଠ କରାଇ ଲିଖିତ ରାଜିନାମା ରଖିଥିଲେ । ଏହାପରେ ବରକନ୍ୟାଙ୍କୁଛଡ଼ାଯାଇଥିବା ଏଏସ୍ଆଇ ଶ୍ରୀ ପଣ୍ଡା କହିଛନ୍ତି ।
