ବେଜିଂ,୩୦/୦୧: ବାଂଲାଦେଶ ପ୍ରଧାନମନ୍ତ୍ରୀ ଶେଖ  ହାସିନାଙ୍କୁ ଏକ ଅଫିସିଆଲ ଗସ୍ତ ପାଇଁ ବେଜିଂ ଆସିବାକୁ ଚୀନ୍‌ ନିମନ୍ତ୍ରଣ କରିଛି । ବାଂଲାଦେଶର ନୂଆ ସରକାର ସହ ଦ୍ୱିପାକ୍ଷିକ ସହଯୋଗ ପାଇଁ ଇଚ୍ଛୁକ ଥିବା ଚୀନ୍‌  କହିଛି । 

ବାଂଲାଦେଶରେ ଅବସ୍ଥାପିତ ଚୀନ୍‌ ରାଷ୍ଟ୍ରଦୂତ ୟୋଓ ୱେନ୍‌ଙ୍କୁ ଭେଟିବା ପରେ ବାଂଲାଦେଶ ବିଦେଶ ମନ୍ତ୍ରୀ ହାସନ ମେହମୁଦ ରବିବାର  କହିଛନ୍ତି ଯେ, ଗସ୍ତ ପାଇଁ ଉପଯୁକ୍ତ  ସମୟ ଧାର୍ଯ୍ୟ କରାଯିବ । ଉଭୟ  ପକ୍ଷରୁ ଗସ୍ତର ଦିନ ଠିକ୍‌ କରାଯିବା ଲାଗି ଆଲୋଚନା ହେଉଛି । ହାସିନା  ୨୦୧୯ ଜୁଲାଇ ୧ରୁ ୬ ପର୍ଯ୍ୟନ୍ତ ଔପଚାରିକ ଭାବେ ଚୀନ୍‌ ଗସ୍ତ କରିଥିଲେ । 

ଏହି ଗସ୍ତବେଳେ ହାସିନା  ଚୀନ୍‌ ରାଷ୍ଟ୍ରପତି ଶି ଜିନ୍‌ପିଙ୍ଗଙ୍କୁ  ଭେଟିଥିଲେ । ଏଥିସହ ହାସିନା  ପ୍ରଧାନମନ୍ତ୍ରୀ ଭାବେ ପୁନଃନିର୍ବାଚିତ  ହେବା ପରେ ଜିନ୍‌ପିଙ୍ଗ୍‌ ତାଙ୍କୁ ଶୁଭେଚ୍ଛା  ମଧ୍ୟ ଜଣାଇଥିଲେ । କୌଣସି  କାରଣରୁ ବି ଭାରତ ସହ ସମ୍ପର୍କ ଖରାପ ହୋଇପାରିବ ନାହିଁ ବୋଲି  ବାଂଲାଦେଶ ସଡ଼କ ପରିବହନ  ମନ୍ତ୍ରୀ ଓବାଇଦୁଲ୍‌ କ୍ୱାଦର ନିକଟରେ କହିଥିଲେ । ଏହା ପରେ ଚୀନ୍‌  ହାସିନାଙ୍କୁ ଏପରି ନିମନ୍ତ୍ରଣ ଦେଇଛି ।