ନୂଆଦିଲ୍ଲୀ,୦୧/୦୩: ଉତ୍ତରାଖଣ୍ଡର ସିଲକ୍ୟାରା ଟନେଲରେ ଗତବର୍ଷ ନଭେମ୍ବରରେ  ୪୧ ଜଣ ଶ୍ରମିକ ଫସିରହିଥିଲେ । ସେହି ଶ୍ରମିକମାନଙ୍କୁ ର‌୍ୟାଟ ମାଇନର୍ସଙ୍କ ସହାୟତାରେ ଉଦ୍ଧାର  କରାଯାଇଥିଲା । ସେହି ର‌୍ୟାଟ ମାଇନର୍ସଙ୍କ ମଧ୍ୟରେ ସାମିଲ ଥିବା ଦିଲ୍ଲୀର ଓକିଲ ହସନଙ୍କ ଘରକୁ ଫେବ୍ରୁଆରୀ ୨୮ରେ ପ୍ରଶାସନ ଭାଙ୍ଗି ଦେଇଥିବା ସେ ଅଭିଯୋଗ କରିଛନ୍ତି । 

ରିପୋର୍ଟ  ଅନୁସାରେ, ଦିଲ୍ଲୀ ବିକାଶ ପ୍ରାଧିକରଣ (ଡିଡିଏ)ବୁଧବାର ପୂର୍ବୋତ୍ତର ଦିଲ୍ଲୀର ଖଜୁରୀ ଖାସ୍‌ ଅଞ୍ଚଳରେ ଜବରଦଖଲ ହଟାଇବା ଅଭିଯାନ ଚଳାଇଥିଲା । ସେ ଅନୁସାରେ ହସନ୍‌ଙ୍କ ଘର ବି ଭଙ୍ଗା  ଯାଇଥିଲା । 

ହସନ୍‌ଙ୍କ ଅନୁସାରେ, ଘର ଭାଙ୍ଗିବା ପୂର୍ବରୁ ଆମକୁ କୌଣସି ନୋଟିସ୍‌ ଦିଆଯାଇଥିଲା । ଆମେ ସିଲକ୍ୟାରା ସୁଡ଼ଙ୍ଗରୁ ୪୧ ଜଣଙ୍କୁ ଉଦ୍ଧାର କରିଥିଲୁ ଓ ବଦଳରେ ଏହା ମିଳିଛି । ପୂର୍ବରୁ ଏହି ଘରକୁ ମୋତେ ଦେବାକୁ ମୁଁ ଅଧିକାରୀ ଓ ସରକାରଙ୍କୁ ଅନୁରୋଧ କରିଥିଲି । କିନ୍ତୁ କିଛି ଲାଭ ମିଳିଲା ନାହିଁ । ବିଳମ୍ବିତ ରାତିରେ ଡିଡିଏର କିଛି ଅଧିକାରୀ ଆସି ଆମ ପରିବାରକୁ  ବସନ୍ତକୁଞ୍ଜସ୍ଥିତ ଏକ ଗେଷ୍ଟ ହାଉସ୍‌କୁ ଯିବାକୁ କହିଥିଲେ । ଏଥିସହ ଗୋବିନ୍ଦପୁରୀ ଅଞ୍ଚଳରେ ଶୀଘ୍ର ଏକ ଘର ଉପଲବ୍ଧ କରାଯିବାକୁ ପ୍ରସ୍ତାବ ଦେଇଥିଲେ । କିନ୍ତୁ ପ୍ରସ୍ତାବ ମୌଖିକ ଥିବାରୁ ମୁଁ  ସେଥିଲାଗି ମନା କରିଥିଲି । ପରେ ଆମ ଘରକୁ ଭଙ୍ଗାଯାଇଥିଲା । ଏହି ଘଟଣାକୁ ନେଇ ରାଜନୀତି  ଆରମ୍ଭ ହେବା ପରେ ବିଜେପି ସାଂସଦ ମନୋଜ ତିୱାରୀ କହିଛନ୍ତି, ଆଇନ ଅନୁସାରେ ହସନଙ୍କ  ଘର ଭଙ୍ଗାଯାଇଛି । ତାଙ୍କୁ ପ୍ରଧାନମନ୍ତ୍ରୀ ଆବାସ ଯୋଜନା ଅନୁସାରେ ବହୁତ ଶୀଘ୍ର ଘର ଦିଆଯିବ ।