ଭୁବନେଶ୍ୱର ୦୯/୦୨: ଆଜିର ପରିବର୍ତ୍ତିତ ଜୀବନଶୈଳୀ ପ୍ରାୟ ଲୋକଙ୍କ ଜୀବନରେ ଚିନ୍ତା ଓ ଅବସାଦ ଭରିଚାଲିଛି । ଏସବୁର ମୁକ୍ତି ପାଇବା ପାଇଁ କେବଳ ଯୋଗ ଓ ବ୍ୟାୟାମର ସାହାଯ୍ୟ ନିଆଯାଇପାରିବ । ଯଦି ଆପଣ ସବୁବେଳେ ଥକ୍କା ଅନୁଭବ କରୁଥାନ୍ତି, ତେବେ ଶୋଇବା ପୂର୍ବରୁ ଶାରିରୀକ ଓ ମାନସିକ ଭାବେ ରିଲାକ୍ସ ହେବା ଖୁବ୍ ଜରୁରି । ଶରୀରକୁ ଆରାମ ଦେବା ପାଇଁ ଯୋଗଠାରୁ ଶ୍ରେଷ୍ଠ ବିକଳ୍ପ ଆଉ କିଛି ନାହିଁ ।
ବିପରୀତ କରନୀ ଆସନ :
ଏହି ଆସନ ବହୁ ସମସ୍ୟାର ସମାଧାନ କରିଥାଏ । ଏହି ଆସନକୁ ସକାଳେ ଖାଲି ପେଟରେ କରିବା ଦ୍ୱାରା ଅଧିକ ସୁଫଳ ମିଳିଥାଏ । ୫ରୁ ୧୦ ମିନିଟ୍ ଯାଏ ଏହି ଆସନ କରିବା ଆବଶ୍ୟକ । ଏହା ରକ୍ତ ସଞ୍ଚାଳନକୁ ନିୟମିତ କରିବା ସହ ଇନ୍ସୋମନିଆ ବା ଅନିଦ୍ରା ପରି ସମସ୍ୟାର ସମାଧାନ କରିଥାଏ । ସେହିପରି ଅବସାଦରୁ ମଧ୍ୟ ମୁକ୍ତି ଦେଇଥାଏ ।
ସୁପ୍ତ ମତ୍ସେନ୍ଦ୍ରାସନ :
ଏହି ଯୋଗ ଶିବଙ୍କ ଜଣେ ଉପାସକଙ୍କ ନାମ ଅନୁସାରେ ହୋଇଛି । ଏହି ଯୋଗ କରିବା ସମୟରେ ବିଭିନ୍ନ ପୋଜ୍ରେ ୨/୩ ମିନିଟ୍ ରହିବା ବହୁତ ଜରୁରି । ଏହି ଯୋଗ କରିବା ଦ୍ୱାରା ଶରୀରର ନିତମ୍ବ ଓ ଅଣ୍ଟାକୁ ମସାଜ୍ ମିଳିଥାଏ । ଏହା ଶରୀରରେ ଥିବା ସମସ୍ତ ବିଷାକ୍ତ ପଦାର୍ଥକୁ ବାହାର କରିବା ସହ ପାଚନ ତନ୍ତ୍ରକୁ ରକ୍ତ ସଞ୍ଚାଳନ ତୀବ୍ର କରାଇଥାଏ । ଫଳରେ ଶରୀରର ନମନୀୟତା ବଢିଥାଏ ।
ଶବାସନ :
ଏହା ସବୁଠାରୁ ଆରାମଦାୟକ ଆସନ । ଏହି ଆସନ ପାଇଁ ଭୂଇଁ ଉପରେ ପିଠି ମାଡି ସିଧା ହୋଇ ଶୋଇପଡନ୍ତୁ । ଏବେ କିଛି ନ କରି ଶାନ୍ତିରେ ସିଧା ହୋଇ ଶବ ପରି ଶୋଇ ରୁହନ୍ତୁ । ଏହି ଆସନକୁ ଦିନର କୌଣସି ସମୟ କରିପାରିବେ । ୫ରୁ ୧୦ ମିନିଟ୍ ଯାଏ ଶବାସନ କରିବା ବିଧେୟ । ଏହି ଆସନ କରିବା ଦ୍ୱାରା ରକ୍ତ ସଞ୍ଚାଳନ ଓ ସ୍ନାୟୁବିକ ସମସ୍ୟାରୁ ମୁକ୍ତି ମିଳିଥାଏ ।