କଲମ୍ବୋ,୧୭/୦୯: ଚଳିତ ଏସିଆ କପ୍ରେ ଫାଇନାଲକୁ ଯୋଗ୍ୟତା ଅର୍ଜନ କରିପାରି ନଥିବା ପାକିସ୍ତାନ ଦଳରେ ବିବାଦ ଆରମ୍ଭ ହୋଇଯାଇଥିବା ଖବର ସମ୍ପ୍ରତି ଚର୍ଚ୍ଚାର ବିଷୟ ହୋଇଛି । ଶ୍ରୀଲଙ୍କା ବିପକ୍ଷ ସୁପର-୪ ରାଉଣ୍ଡ୍ର ଏକ ମ୍ୟାଚ୍ରେ ପରାଜିତ ହେବା ପରେ ପାକିସ୍ତାନ ଦଳର ଖେଳାଳିମାନଙ୍କ ମଧ୍ୟରେ ଯୁକ୍ତି ତର୍କ ଓ ବାକ୍ୟ ବିନିମୟ ହୋଇଥିବା ଜଣାପଡ଼ିଛି । ଡ୍ରେସିଂ ରୁମ୍ ଭିତରେ ଅଧିନାୟକ ବାବାର ଆଜମ ଓ ପେସ୍ ବୋଲର ସହିନ ଆଫ୍ରିଦିଙ୍କ ମଧ୍ୟରେ ଯୁକ୍ତି ତର୍କ ହୋଇଥିଲା । ଖେଳାଳିମାନେ ଦାୟିତ୍ୱ ତୁଲାଇବାରେ ଅବହେଳା କରିଥିଲେ ବୋଲି ବାବର ଅଭିଯୋଗ କରିଥିଲେ ।
ଏହାର ବିରୋଧ କରି ସହିନ କହିଥିଲେ, ଅତି କମ୍ରେ ଭଲ ବୋଲିଂ କିମ୍ବା ବ୍ୟାଟିଂ କରିଥିବା ଖେଳାଳିଙ୍କୁ ପ୍ରଶଂସା କରିବା ଆବଶ୍ୟକ । ସହିନଙ୍କ ପ୍ରତ୍ୟୁତ୍ତରରେ ଖପ୍ପା ବାବର କହିଥିଲେ, ତୁମେ ଚୁପ୍ ରୁହ, କିଏ କେତେ ଭଲ ଖେଳିଛି ମୁଁ ତାହା ଯାଣିଛି । ମାହୋଲ ଗରମ ହେବା ଦେଖି ମହମ୍ମଦ ରିଜୱାନ ହସ୍ତକ୍ଷେପ କରିଥିଲେ ଓ ଉଭୟଙ୍କୁ ବାକ ଯୁଦ୍ଧରୁ ବିରତ ରଖିଥିଲେ ।
ସୂଚନାଯୋଗ୍ୟ, ଉକ୍ତ ମ୍ୟାଚ୍ରେ ପାକିସ୍ତାନ ୨ ୱିକେଟ୍ରେ ଶ୍ରୀଲଙ୍କା ଠାରୁ ପରାଜିତ ହୋଇ ଫାଇନାଲ୍ରୁ ବଞ୍ଚିତ ହୋଇଥିଲା ।