ବେଙ୍ଗଲୁରୁ, ୦୩/୦୯: ପୃଥିବୀ ଠାରୁ ଆଦିତ୍ୟ ଏଲ୍-୧ର ଦୂରତା ବଢ଼ୁଛି । ଆଜି ଇସ୍ରୋ ବୈଜ୍ଞାନିକ ଆଦିତ୍ୟ ଏଲ୍-୧ ମହାକାଶ ଯାନର କକ୍ଷପଥ ପରିବର୍ତ୍ତନ କରିଛନ୍ତି । ଏବେ ଆଦିତ୍ୟ ଏଲ୍-୧ ପୃଥିବୀ ଠାରୁ ସର୍ବନିମ୍ନ ୨୪୫ କିଲୋମିଟର ଏବଂ ସର୍ବାଧିକ ୨୨୪୫୯ କିଲୋମିଟର କକ୍ଷରେ ରହିଛି ।
ସେପ୍ଟେମ୍ବର ୫ ତାରିଖ ଅପରାହ୍ଣ ୩ଟାରେ ପୁଣି ଥରେ କକ୍ଷପଥ ପରିବର୍ତ୍ତନ କରାଯିବ ବୋଲି ସୂଚନା ଦେଇଛି ଇସ୍ରୋ । ଏଥିପାଇଁ କିଛି ସମୟ ଇଞ୍ଜିନ୍ ଥ୍ରଷ୍ଟର୍ସ ଅନ୍ କରାଯିବ । ଶନିବାର ପିଏସଏଲଭି-ସି୫୭ ରକେଟରେ ଶ୍ରୀହରିକୋଟାର ଶତୀଶ ଧାୱନ ମହାକାଶ କେନ୍ଦ୍ରରୁ ଆଦିତ୍ୟ ଏଲ୍-୧ର ଉତକ୍ଷେପଣ କରାଯାଇଥିଲା । ଉତକ୍ଷେପଣର ୬୩ ମିନିଟ୍ ୧୯ ସେକେଣ୍ଡରେ ଆଦିତ୍ୟ ଏଲ୍-୧କୁ ପୃଥିବୀର ୨୩୫ କିଲୋମିଟର X ୧୯୫୦୦ କିଲୋମିଟର କକ୍ଷରେ ରଖା ଯାଇଥିଲା ।
ଇସ୍ରୋ ସୂର୍ଯ୍ୟ ମିଶନ୍ର ଉଦ୍ଦେଶ୍ୟ କ’ଣ ? ଜାଣନ୍ତୁ...
ଆଦିତ୍ୟ ଏଲ୍-୧ ମହକାଶଯାନ ୧୬ ଦିନ ପର୍ଯ୍ୟନ୍ତ ପୃଥିବୀର କକ୍ଷପଥରେ ପରିକ୍ରମା କରିବ । ଏହି ସମୟରେ ୫ଥର ତାର କକ୍ଷପଥ ବଦଳାଯିବ । ଏହା ପରେ ମହାକାଶଯାନରେ ଥିବା ଥ୍ରଷ୍ଟରକୁ ଚାଲୁ କରାଯିବ ଏବଂ ଏହାକୁ ସୂର୍ଯ୍ୟ ଅଭିମୁଖେ ପଠାଯିବ । ସେଠାରୁ ୧୧୦ ଦିନର ଯାତ୍ରା କରିବା ପରେ ଅର୍ଥାତ ଆସନ୍ତା ୨୦୨୪ ଜାନୁଆରୀ ୬ ତାରିଖ ବେଳକୁ ଏହା ପୃଥିବୀ ଠାରୁ ୧୫ ଲକ୍ଷ କି.ମି ଦୂରରେ ଅବସ୍ଥିତ ଲଗରେଞ୍ଜ ପଏଣ୍ଟ-୧ରେ ପହଞ୍ଚିବ ।
ସେଠାରେ ହେଲୋ ଅର୍ବିଟରେ ଏହାକୁ ଅବସ୍ଥାପିତ କରାଯିବ । ସେହି ପଏଣ୍ଟରେ ସୂର୍ଯ୍ୟ ଗ୍ରହଣର ପ୍ରଭାବ ପଡେ ନାହିଁ । ଯାହାଫଳରେ ସେଠାରେ ରହି ଏହି ମହାକାଶଯାନ ସୂର୍ଯ୍ୟ ଉପରେ ଗବେଷଣା କରିବା ସହଜ ହେବ । ପୃଥିବୀ ଠାରୁ ସୂର୍ଯ୍ୟ ମଧ୍ୟରେ ଏଭଳି ୫ଟି ଲଗରେଞ୍ଜ ପଏଣ୍ଟ ରହିଛି ।
ଚନ୍ଦ୍ରପୃଷ୍ଠରେ ବିଯୁକ୍ତ ୨୩୮ ଡିଗ୍ରୀ ତାପମାତ୍ରା କେମିତି ସହିବ ରୋଭର ‘ପ୍ରଜ୍ଞାନ’ ?
ପ୍ରଥମ ଲଗରେଞ୍ଜ ପଏଣ୍ଟ ପୃଥିବୀ ଠାରୁ ୧୫ ଲକ୍ଷ କିମି. ଦୂରରେ ଅବସ୍ଥିତ । ସେଠାରେ ଯଦି କୌଣସି ବସ୍ତୁ ରଖାଯାଏ ତାହା ସେହି ପଏଣ୍ଟକୁ ଚକ୍କର କାଟିବା ଆରମ୍ଭ କରିବ । ସୂର୍ଯ୍ୟର ବିଭିନ୍ନ ଗତିବିଧି, ସୌରଝଡ ଓ ମହାକାଶର ପାଣିପାଗ ସମ୍ପର୍କରେ ଆଦିତ୍ୟ ଏଲ୍-୧ ଅଧ୍ୟୟନ କରିବ । ସେହିଭଳି ସୂର୍ଯ୍ୟ ପୃଷ୍ଠରେ ହେଉଥିବା ଉତ୍ତପ୍ତ, ସୌରଝଡ଼ ବା କମ୍ପନ ଓ ତାର ତାପମାତ୍ରା, ସୂର୍ଯ୍ୟ ବାୟୁମଣ୍ଡଳ, ସୂର୍ଯ୍ୟଠାରୁ ପୃଥିବୀକୁ ଆସୁଥିବା କିରଣ ଯୋଗୁ ପରିବେଶ ଉପରେ ପଡୁଥିବା ପ୍ରଭାବ ଆଦି ସମ୍ପର୍କରେ ଏହି ମହକାଶ ଯାନ ଅଧ୍ୟୟନ କରିବ ।
ଯେଉଁ ସୌରଜଗତରେ ଆମର ପୃଥିବୀ ରହିଛି ତାର କେନ୍ଦ୍ର ହେଉଛି ସୂର୍ଯ୍ୟ । ସେଥିପାଇଁ କୁହାଯାଏ ସୂର୍ଯ୍ୟ ହିଁ ସକଳ ଶକ୍ତିର ଆଧାର । ପୃଥିବୀ ସମେତ ସମସ୍ତ ୮ଟି ଯାକ ଗ୍ରହ ସୂର୍ଯ୍ୟକୁ ପରିକ୍ରମା କରୁଛନ୍ତି। ସୂର୍ଯ୍ୟ ଯୋଗୁ ହିଁ ପୃଥିବୀରେ ଜୀବଜଗତ ସମ୍ଭବ ହୋଇପାରିଛି ।
ଗଞ୍ଜାମ ରାଜନୀତି କ୍ରାଇସିସ୍ ମ୍ୟାନେଜର, ପ୍ରଥମ ଇନିଂସ କରିଥିଲେ ଓମ୍ଫେଡ୍ ଷ୍ଟଲ୍ ପ୍ରତିଷ୍ଠା
