ସାଲେପୁର, ୦୨/୦୨ : ବୃଦ୍ଧ ଦମ୍ପତିଙ୍କୁ ଆକ୍ରମଣ। ଟାଟାଏସି ଗାଡିରୁ ଧୂଆଁ ବାହାରିବାକୁ କେନ୍ଦ୍ରକରି ବୃଦ୍ଧ ଦମ୍ପତିଙ୍କୁ ଟାଙ୍ଗିଆରେ ହାଣି ଗୁରୁତର। ସାଲେପୁର ଥାନା ଅନ୍ତର୍ଗତ ଧୂଆଁସାହି ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ଦୁଇ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି।
ସୂଚନାନୁଯାୟୀ, ସାଲେପୁର ଥାନା ଅନ୍ତର୍ଗତ ଧୂଆଁସାହି ଗ୍ରାମର ବିଜୟ ସ୍ବାଇଁଙ୍କ ଟାଟାଏସି ଗାଡ଼ି ଘର ନିକଟରେ ଥୁଆ ହୋଇଥିଲା। ଆଜି ସକାଳୁ ଉକ୍ତ ଗାଡ଼ିଟିକୁ ତାଙ୍କ ଡ୍ରାଇଭର ଷ୍ଟାର୍ଟ କରିବା ସମୟରେ ଗାଡିରୁ ଧୂଆଁ ବାହାରିଥିଲା। ଏଥିରେ ପଡୋଶୀ ବିଜୟ ଭୂୟାଁ ହଠାତ୍ ଉତକ୍ଷିପ୍ତ ବୃଦ୍ଧ ଦମ୍ପତିଙ୍କୁ ଅଶ୍ଳୀଳ ଭାଷାରେ ଗାଳିଗୁଲଜ କରିବା ସହ ତାଙ୍କ ଘରେ ପଶି ଟାଙ୍ଗିଆରେ ମରଣାନ୍ତକ ଆକ୍ରମଣ କରିଥିଲେ। ବୃଦ୍ଧ ବିଜୟ ସ୍ବାଇଁ (୬୫ ବର୍ଷ)ଙ୍କ ମୁଣ୍ଡରେ ଗଭୀର ଆଘାତ ଲାଗିଥିବା ବେଳେ ତାଙ୍କ ପତ୍ନୀ ବିଦୁଲତା ସ୍ବାଇଁ (୬୦ ବର୍ଷ)ଙ୍କ ହାତରେ ଗଭୀର ଆଘାତ ଲାଗିଛି । ଉଭୟ ଗୁରୁତର ଆହତ ହୋଇ ସାଲେପୁର ଡାକ୍ତରଖାନାରେ ଚିକିତ୍ସିତ ହେଉଛନ୍ତି।