ପୁନେ: ନେଦରଲାଣ୍ଡସ୍କୁ ୧୬୦ ରନ୍ ବ୍ୟବଧାନରେ ପରାସ୍ତ କରିଛି ଇଂଲଣ୍ଡ । ମାତ୍ର ୩୭.୨ ଓଭରରେ ପରାଜୟ ବରଣ କରିଛି ନେଦରଲ୍ୟାଣ୍ଡସ୍ । ଆଜିର ମ୍ୟାଚ୍ରେ ନେଦରଲାଣ୍ଡସ୍ର ତେଜା ନିଦାମାନୁରୁ ସର୍ବାଧିକ ୪୧ ରନ୍ କରିଥିବା ବେଳେ ଅନ୍ୟମାନେ ବହୁତ କମ୍ ରନ୍ ସ୍କୋର କରିଛନ୍ତି । ତାଙ୍କ ପରେ ଅଧିନାୟକ ଦ୍ବିତୀୟ ସର୍ବାଧିକ ୩୮ ରନ୍ ସ୍କୋର କରିଛନ୍ତି । ଏହା ସହ ଦଳ ସମସ୍ତ ଓ୍ବିକେଟ ବିନିମୟରେ ମାତ୍ର ୧୭୯ ରନ୍ ସଂଗ୍ରହ କରିଛି ନେଦରଲାଣ୍ଡସ । ଇଂଲଣ୍ଡ ପକ୍ଷରୁ ମୋଇନ ଅଲି ଏବଂ ଆଦିଲ ରଶିଦ ୩ଟି ଲେଖାଏଁ ଓ୍ବିକେଟ ଅକ୍ତିଆର କରିଛନ୍ତି । ଡେଭିଡ ଓ୍ବିଲି ୨ଟି ଏବଂ କ୍ରିସ ଓ୍ବକ୍ସ ଗୋଟିଏ ଓ୍ବିକେଟ ନେଇଛନ୍ତି ।
ନେଦରଲାଣ୍ଡ ବିପକ୍ଷରେ ଇଂଲଣ୍ଡ ଆଜି ବିସ୍ଫୋରକ ବ୍ୟାଟିଂ କରିଥିଲା । ନେଦରଲାଣ୍ଡସକୁ ୩୩୯ ରନ୍ର ବିଶାଳ ଟାର୍ଗେଟ୍ ଦେଇଥିଲା ଇଂଲଣ୍ଡ । ପୁନେରେ ଖେଳାଯାଇଥିବା ଏହି ବିଶ୍ୱକପ୍ ମ୍ୟାଚ୍ରେ ଇଂଲଣ୍ଡ ଟସ୍ ଜିତି ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା । ବେନ୍ ଷ୍ଟୋକ୍ସଙ୍କ ଧୂଆଁଦାର ଶତକ ଓ ଡେଭିଡ୍ ମଲାନଙ୍କ ୮୭ ରନ ବଳରେ ଇଂଲଣ୍ଡ ୯ ଓ୍ବିକେଟ ହରାଇ ୩୩୯ ରନ୍ କରିଥିଲା ।
କ୍ରିସ୍ ୱକ୍ସ ମଧ୍ୟ ଜବରଦସ୍ତ ବ୍ୟାଟିଂ କରି ଅର୍ଦ୍ଧଶତକ ହାସଲ କରିଥିଲେ । ଫଳରେ ଦଳ ନିର୍ଦ୍ଧାରିତ ୫୦ ଓଭରରେ ୯ ୱିକେଟ୍ ହରାଇ ଏତେ ବଡ଼ ସ୍କୋର କରିପାରିଥିଲା । କ୍ରିସ୍ ୱକ୍ସ, ବେନ୍ ଷ୍ଟୋକ୍ସଙ୍କ ସହ ମିଶି ସପ୍ତମ ୱିକେଟ୍ ପାଇଁ ୧୨୯ ରନ୍ କରିଥିଲେ । ନେଦରଲ୍ୟାଣ୍ଡସ ପକ୍ଷରୁ ବାସ୍ ଡି ଲିଡେ ସର୍ବାଧିକ ୩ ୱିକେଟ୍ ନେଇଥିଲେ ।
ଆର୍ଯ୍ୟନ ଦତ୍ତ ୨ଟି ଓ୍ବିକେଟ ନେଇଥିବା ବେଳେ ଭାନ ବିକ୍ ମଧ୍ୟ ୨ଟି ଓ୍ବିକେଟ ଅକ୍ତିଆର କରିଥିଲେ । ଭାନ ମିକେରେନ୍ ଗୋଟିଏ ଓ୍ବିକେଟ ନେଇଥିଲେ । ଇଂଲଣ୍ଡର ବ୍ୟାଟିଂ କଥା କହିଲେ ୪୮ରନ୍ରେ ପ୍ରଥମ ଓ୍ବିକେଟ ହରାଇଥିଲା ଦଳ । ତାପରେ ୧୩୩ ରନ୍ରେ ଜୋ ରୁଟଙ୍କୁ ହରାଇଥିଲା ଦଳ । ରୁଟ୍ ୨୮ ରନ୍ର ପାଳି ଖେଳି ପାଭିଲିୟନ ଫେରିଥିଲେ । ତେବେ ଦଳୀୟ ସ୍କୋର ୧୯୨ରୁ ୩୨୧ ମଧ୍ୟରେ ଗୋଟିଏ ଓ୍ବିକେଟ ହରାଇଥିଲା ଦଳ । ଶେଷରେ ଦଳ ୯ ଓ୍ବିକେଟ ହରାଇ ୩୩୯ ରନ୍ କରିପାରିଥିଲା । ହେଲେ ନେଦରଲ୍ୟାଣ୍ଡସକୁ ୧୬୦ ରନ୍ରେ ପରାସ୍ତ କରିଛି ଇଂଲଣ୍ଡ ।
