ପାଟନା: ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) କାର୍ଯ୍ୟାଳୟରୁ ବାହାରିଲେ ରାଷ୍ଟ୍ରୀୟ ଜନତା ଦଳ (ଆରଜେଡି) ନେତା ତେଜସ୍ବୀ ଯାଦବ । ଚାକିରି ପାଇଁ ଜମି ମାମଲାରେ ତାଙ୍କୁ ତଦନ୍ତ ଏଜେନ୍ସି ଦୀର୍ଘ ୮ ଘଣ୍ଟା ଜେରା କରିଛି । ଗତକାଲି ତାଙ୍କ ବାପା ଲାଲୁ ଯାଦବଙ୍କୁ ଇଡି ଜେରା କରିଥିଲା । ଆଉ ଆଜି ପ୍ରବର୍ତ୍ତନ ନିର୍ଦ୍ଦେଶାଳୟରେ ପହଞ୍ଚିଥିଲେ ତେଜସ୍ବୀ । ଲାଲୁ ପ୍ରସାଦ ଯାଦବଙ୍କୁ ଚାକିରି ପାଇଁ ଜମି ମାମଲାରେ ଇଡି ୧୦ ଘଣ୍ଟା ଜେରା କରିଥିଲା ।
ସେପଟେ ଇଡି କାର୍ଯ୍ୟାଳୟରୁ ବାହାରିବା ବେଳକୁ ତେଜସ୍ବୀଙ୍କ ଲାଗି ଶତାଧିକ ଆରଜେଡି ନେତା ଛିଡ଼ା ହୋଇଥିଲେ । ତେଜସ୍ବୀ ଯାଦବ ହାତ ହଲାଇ ବାହାରକୁ ଆସିବା ସହ ବିଜୟର ଚିହ୍ନ ଦେଖାଇଥିଲେ । ଆଜି ଦିନ ୧୧ଟା ୩୫ରେ ତେଜସ୍ବୀ ଯାଦବ ଇଡି କାର୍ଯ୍ୟାଳୟରେ ପହଞ୍ଚିଥିଲେ । ଏହି ସମୟରେ ଆରଜେଡି ସମର୍ଥକମାନେ ତେଜସ୍ବୀଙ୍କ ସମର୍ଥନରେ ନାରାବାଜି କରିଥିଲେ ।
ଲାଲୁ ଯାଦବ ରେଳ ମନ୍ତ୍ରୀ ଥିବା ବେଳେ ଚାକିରି ବଦଳରେ ଜମି ଦୁର୍ନୀତି ମାମଲା ସାମ୍ନାକୁ ଆସିଥିଲା । ୨୦୦୪ରୁ ୨୦୦୯ ମଧ୍ୟରେ ଅନେକ ଲୋକ ଜମି ଦେଇ ରେଳବାଇରେ ଗ୍ରୁପ୍ ଡି ଚାକିରି କରିଥିଲେ । ଚାକିରି କରାଇଦେବାକୁ ଯାଦବ ପରିବାରକୁ ଲୋକେ ଜମି ଦେଇଥିଲେ । ଲାଲୁଙ୍କ ସମେତ ତାଙ୍କ ସହ ସଂପର୍କିତ ଏକ କମ୍ପାନି ଏକେ ଇନଫୋସିଷ୍ଟମ ଲିମିଟେଡ୍କୁ ଏହି ଜମି ଲାଞ୍ଚ ଆକାରରେ ଦିଆଯାଇଥିଲା ।
ସିବିଆଇ ଦ୍ବାରା ପଞ୍ଜିକୃତ ମାମଲା ଆଧାରରେ ଚାକିରି ପାଇଁ ଜମି ଦୁର୍ନୀତି ମାମଲାରେ ଇଡି ତତ୍କାଳୀନ ରେଳ ମନ୍ତ୍ରୀ ଲାଲୁ ଯାଦବ ଏବଂ ପରିବା ସଦସ୍ୟଙ୍କ ସଂପୃକ୍ତି ଥିବା ବିଶ୍ବାସ କରୁଛି । ଏହା ପୂର୍ବରୁ ସର୍ଚ୍ଚ ଅପରେସନ୍ କରି କୋଟିଏ ଟଙ୍କା ଜବତ କରିବା ସହ ଏକ କୋଟି ୨୫ ଲକ୍ଷ ଟଙ୍କାର ଜିନିଷପତ୍ର ଜବତ କରିଥିଲା ଇଡି । ଏହା ସହ ୬ କୋଟି ଟଙ୍କାର ସ୍ଥାବର ସଂପତ୍ତିକୁ ଆଟାଚ୍ କରିଥିଲା ପ୍ରବର୍ତ୍ତନ ନିର୍ଦ୍ଦେଶାଳୟ ।
