ନୂଆଦିଲ୍ଲୀ,୦୭/୧୧: ସୂଚନା କମିଶନର ହୀରାଲାଲ ସମରିୟା ସୋମବାର ଦେଶର ନୂଆ ମୁଖ୍ୟ ସୂଚନା କମିଶନର(ସିଆଇସି) ଭାବେ ନିଯୁକ୍ତ ହୋଇଛନ୍ତି । ଦେଶର ପ୍ରଥମ ଦଳିତ ସିଆଇସି ହେବାର ଗୌରବ ତାଙ୍କୁ ପ୍ରାପ୍ତ ହୋଇଛି । ରାଷ୍ଟ୍ରପତି ଭବନରେ ଅନୁଷ୍ଠିତ ଏକ ସମାରୋହରେ ରାଷ୍ଟ୍ରପତି ଶ୍ରୀମତୀ ଦ୍ରୌପଦୀ ମୁର୍ମୁ ତାଙ୍କୁ ଶପଥପାଠ କରାଇଥିଲେ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସମେତ କେନ୍ଦ୍ର ରାଷ୍ଟ୍ରମନ୍ତ୍ରୀ ଜିତେନ୍ଦ୍ର ସିଂହ ଏବଂ ଉପରାଷ୍ଟ୍ରପତି ଜଗଦୀପ ଧନଖଡ୍‌ ସମରିୟାଙ୍କ ଶପଥଗ୍ରହଣରେ ଉପସ୍ଥିତ ଥିଲେ । ଅକ୍ଟୋବର ୩ରେ ୱାଇ.କେ.ସିହ୍ନାଙ୍କ କାର୍ଯ୍ୟକାଳ ଶେଷ ହେବା ପରେ ଏହି ପଦ ଖାଲି ପଡିଥିଲା । 

ସିଆଇସି ଭାବେ ସମରିୟା ଶପଥ ନେବାପରେ କେନ୍ଦ୍ରୀୟ ସୂଚନା ଆୟୋଗରେ ଆହୁରି ୮ଟି ସୂଚନା କମିଶନରଙ୍କ ପଦ ଖାଲି ପଡ଼ିଛି । ବର୍ତ୍ତମାନ ଆୟୋଗରେ ମାତ୍ର ଦୁଇ ଜଣ ସୂଚନା କମିଶନର ଅଛନ୍ତି । କେନ୍ଦ୍ରୀୟ ସୂଚନା ଆୟୋଗରେ ଜଣେ ମୁଖ୍ୟ ସୂଚନା କମିଶନର ଏବଂ  ଅତି ବେଶୀରେ ୧୦ ଜଣ ସୂଚନା କମିଶନର ରହିପାରିବେ । ଅକ୍ଟୋବର ୩୦ ତାରିଖରେ ସୁପ୍ରିମକୋର୍ଟ କେନ୍ଦ୍ରୀୟ ସୂଚନା ଆୟୋଗ (ସିଆଇସି)ଏବଂ ରାଜ୍ୟ ସୂଚନା ଆୟୋଗ(ଏସଆଇସି)ରେ ଖାଲି ପଡିଥିବା ପଦବିର ପୂରଣ ଲାଗି ପଦକ୍ଷେପ ନେବାକୁ କେନ୍ଦ୍ର ଓ ରାଜ୍ୟ ସରକାରଗୁଡି଼କୁ ନିର୍ଦ୍ଦେଶ ଦେଇଥିଲେ । ଏଭଳି ନହେଲେ ସୂଚନା ଅଧିକାର ଆଇନ ପ୍ରଭାବହୀନ ହୋଇପଡିବ ବୋଲି କହିଥିଲେ । ତା’ ପରେ ସମାରିୟାଙ୍କ ଏହି ନିଯୁକ୍ତି ହୋଇଛି । ରାଜସ୍ଥାନରେ ଜନ୍ମିତ ୧୯୮୫ ବ୍ୟାଚ୍‌ର ଆଇଏଏସ୍‌ ଅଧିକାରୀ ସମରିୟା ନିଜର କାର୍ଯ୍ୟକାଳ ସମୟରେ ଅନେକ ଗୁରୁତ୍ୱପୂର୍ଣ୍ଣ ଦାୟିତ୍ୱ ନିର୍ବାହ କରିଛନ୍ତି । ସେ ଶ୍ରମ ଏବଂ ରୋଜଗାର ସଚିବ ଭାବେ ମଧ୍ୟ କାମ କରିଛନ୍ତି । ଏହା ପୂର୍ବରୁ ୨୦୨୦ ନଭେମ୍ବର ୭ରେ ସେ କେନ୍ଦ୍ରୀୟ ସୂଚନା ଆୟୋଗରେ ସୂଚନା କମିଶନର ଭାବେ ଶପଥ ନେଇଥିଲେ ।