ନୂଆଦିଲ୍ଲୀ,୧୧/୦୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆସନ୍ତା ୧୩ ତାରିଖରେ ଦୁଇଦିନିଆ ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ) ଗସ୍ତରେ ଯିବେ । ମୋଦିଙ୍କ ଏହି ଗସ୍ତ ବେଶ୍ ଚର୍ଚ୍ଚାରେ ରହିଛି । କାରଣ ମୋଦି ୟୁଏଇ ରାଜଧାନୀ ଆବୁଧାବିରେ ପ୍ରଥମ ହିନ୍ଦୁ ମନ୍ଦିର ଉଦ୍ଘାଟନ କରିବେ । ଏଥିସହ ଜାୟେଦ୍ ସ୍ପୋର୍ଟ୍ସ ସିଟିରେ ଏକ କାର୍ଯ୍ୟକ୍ରମରେ ସେଠାରେ ଥିବା ଭାରତୀୟ ସମୁଦାୟକୁ ସମ୍ବୋଧିତ କରିବେ। ୨୦୧୫ ପରେ ଏହା ମୋଦିଙ୍କ ସପ୍ତମ ଏବଂ ଗତ ୮ ମାସରେ ତୃତୀୟ ୟୁଏଇ ଗସ୍ତ ହେବ । ଏହି ଅବସରରେ ୟୁଏଇ ରାଷ୍ଟ୍ରପତି ଶେଖ ମହମ୍ମଦ ବିନ୍ ଜାୟେଦ୍ ଅଲ୍ ନାହାନ୍ଙ୍କ ସହ ମୋଦି ଦ୍ୱିପାକ୍ଷିକ ବୈଠକ କରିବେ ।
ଫେବ୍ରୁଆରୀ ୧୪ରେ ପ୍ରଧାନମନ୍ତ୍ରୀ ବୋଚାସନ୍ୱାସି ଅକ୍ଷର ପୁରୁଷୋତ୍ତମ ସ୍ୱାମୀନାରାୟଣନ୍ ସଂସ୍ଥା(ବିଏପିଏସ୍) ଉଦ୍ଘାଟନ କରିବେ । ଏହି ମନ୍ଦିର ଭଗବାନ ନାରାୟଣ ସ୍ୱାମୀଙ୍କୁ ସମର୍ପିତ । ମାର୍ଚ୍ଚ ୧ରେ ଏହା ସର୍ବସାଧାରଣଙ୍କ ଦର୍ଶନ ଲାଗି ଖୋଲାଯିବ । ଏହି ମନ୍ଦିର ପ୍ରାୟ ୨୦ ହଜାର ବର୍ଗ ମିଟର ଜାଗାରେ ନିର୍ମାଣ ହୋଇଛି । ରାଜପଥରେ ସଟା ଅଲ୍ ୱାକବା ରାଜଧାନୀ ଆବୁଧାବିରୁ ପ୍ରାୟ ୩୦ ମିନିଟ୍ ଦୂର । ମନ୍ଦିର ପରିସରରେ ଏକ ପର୍ଯ୍ୟଟକ କେନ୍ଦ୍ର, ପ୍ରାର୍ଥନା ହଲ୍, ପ୍ରଦର୍ଶନୀ, ଶିକ୍ଷା ସ୍ଥାନ, ପିଲା ଏବଂ ଯୁବବର୍ଗଙ୍କ ପାଇଁ ସ୍ପୋର୍ଟସ ଏରିଆ, ଫୁଡ୍କୋର୍ଟ ଏବଂ ଅନ୍ୟାନ୍ୟ ଦୋକାନ ରହିଛି । ଏଠାକୁ ସବୁ ଧର୍ମାବଲମ୍ବୀର ଲୋକ ଯାଇ ହିନ୍ଦୁ ସଂସ୍କୃତି ଏବଂ ଆଧ୍ୟାତ୍ମିକ ପରିବେଶର ଅନୁଭୂତି ନେଇପାରିବେ ବୋଲି ବିଏପିଏସ୍ ପକ୍ଷରୁ କୁହାଯାଇଛି ।
୧୯୯୭ରୁ ବୋଚାସନ୍ୱାସି ଅକ୍ଷର ପୁରୁଷୋତ୍ତମ ସ୍ୱାମୀନାରାୟଣନ୍ ସଂସ୍ଥା(ବିଏପିଏସ୍) ପକ୍ଷରୁ ଏହି ମନ୍ଦିର ପାଇଁ ଉଦ୍ୟମ ହୋଇଆସୁଥିଲା। ଦୀର୍ଘ ୨ ଦଶନ୍ଧିରୁ ଅଧିକ ସମୟ ଧରି ବିଏପିଏସ୍ ସାଧୁ ଏବଂ ଶ୍ରଦ୍ଧାଳୁମାନେ ବିଭିନ୍ନ କମ୍ୟୁନିଟି ଓ ସରକାରୀ ଅଧିକାରୀଙ୍କୁ ଭେଟି ମନ୍ଦିର ନିର୍ମାଣ ଲାଗି ଜମି ପ୍ରଦାନ ନିମନ୍ତେ ଦାବି କରି ଆସୁଥିଲେ । ୨୦୧୫ରେ ୟୁଏଇ ସରକାର ଏହି ମନ୍ଦିର ପାଇଁ ଜମି ପ୍ରଦାନ କରିଥିଲେ । ଏଥିପାଇଁ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ୟୁଏଇ ସରକାରଙ୍କୁ ପ୍ରଶଂସା କରିଥିଲେ । ବିଏପିଏସ୍ ସ୍ୱାମୀ ନାରାୟଣ ସଂସ୍ଥା ଏବଂ ମନ୍ଦିର ଲିମିଟେଡ୍କୁ ସରକାରଙ୍କ ପକ୍ଷରୁ ମନ୍ଦିର ପ୍ରୋଜେକ୍ଟ ପାଇଁ ମଞ୍ଜୁରି ମିଳିଥିଲା ।
ଦୀର୍ଘ ବର୍ଷର ପରିଶ୍ରମ ପରେ ୟୁଏଇରେ ମନ୍ଦିର ସ୍ୱପ୍ନ ବାସ୍ତବ ହୋଇଛି । ଏହି ମନ୍ଦିର ଇତାଲବୀ ମାର୍ବଲରେ ନିର୍ମାଣ ହୋଇଛି । ଏହାର ଉଚ୍ଚତା ୧୦୮ ଫୁଟ । ମନ୍ଦିରରେ ଭଗବାନ ନାରାୟଣ ସ୍ୱାମୀ, ଭଗବାନ ଶିବ, ଗଣେଶ, କୃଷ୍ଣ ଏବଂ ଦେବୀ ରାଧାଙ୍କ ମୂର୍ତ୍ତି ରହିଛି । ଏହା ହିନ୍ଦୁ ଧର୍ମ ଏବଂ ସଂସ୍କୃତିକୁ ପ୍ରତିଫଳିତ କରୁଛି । ଭାରତ ଏବଂ ୟୁଏଇ ମଧ୍ୟରେ ଏହାଦ୍ୱାରା ସମ୍ପର୍କ ଆହୁରି ମଜଭୁତ ହେବ ବୋଲି କୁହାଯାଇଛି ।
