ୱାଶିଂଟନ୍: ପାଲେଷ୍ଟାଇନ ଅଞ୍ଚଳରେ ଇସ୍ରାଏଲ୍ ବସ୍ତି ନିର୍ମାଣ ବିରୋଧରେ ଭୋଟ୍ ଦେଇଛି ଭାରତ । ଇସ୍ରାଏଲର ପାଲେଷ୍ଟାଇନ ଅଞ୍ଚଳ ଦଖଲ କରିବାକୁ ନିନ୍ଦା କରି ଏକ ସଂକଳ୍ପ ଉପସ୍ଥାପନ କରିଥିଲା ମିଳିତ ଜାତିସଂଘ । ଯାହାକୁ ସମର୍ଥନ କରିଛି ଭାରତ । ପୂର୍ବ ଜେରୁସାଲେମ୍ ଏବଂ ସିରିଆ ଗୋଲାନ୍ ସମେତ ଅଧିକୃତ ପାଲେଷ୍ଟାଇନ ଅଞ୍ଚଳରେ ଇସ୍ରାଏଲ୍ ବସତିକୁ ନିନ୍ଦା କରୁଥିବା ଏହି ସଂକଳ୍ପକୁ ଭାରତ ସମେତ ୧୪୫ ଦେଶ ସମର୍ଥନ କରିଛନ୍ତି ।
ଯୁଦ୍ଧ ଆରମ୍ଭରୁ ଇସ୍ରାଏଲକୁ ସମର୍ଥନ ଜଣାଇଥିଲା ଭାରତ । ସେହିପରି ଜାତିସଂଘରେ ଆଗତ ହୋଇଥିବା ଅସ୍ତ୍ରବିରତି ପ୍ରସ୍ତାବରେ ଭୋଟ୍ ଦେବାରୁ ଦୂରେଇ ରହିଥିଲା ଭାରତ । ଆଉ ଏବେ ଇସ୍ରାଏଲ ବିରୋଧୀ ଏକ ପ୍ରସ୍ତାବକୁ ସମର୍ଥନ ଜଣାଇଛି ଭାରତ । ଇସ୍ରାଏଲ୍ ବ୍ୟତୀତ ମାତ୍ର ୬ଟି ଦେଶ କାନାଡା, ହଙ୍ଗେରୀ, ମାର୍ଶଲ ଆଇଲ୍ୟାଣ୍ଡ, ମାଇକ୍ରୋନେସିଆ ଏବଂ ନାଉରୁ ମିଳିତ ଜାତିସଂଘର ନିଷ୍ପତ୍ତିକୁ ସମର୍ଥନ କରିନଥିଲେ ଅର୍ଥାତ୍ ବିପକ୍ଷରେ ଭୋଟ୍ ଦେଇଥିଲେ । ଏହା ବ୍ୟତୀତ ୧୮ଟି ଦେଶ ଭୋଟ୍ ସମୟରେ ଅନୁପସ୍ଥିତ ରହିଥିଲେ ।
ଅକ୍ଟୋବରରେ ଜୋର୍ଡାନ ମିଳିତ ଜାତିସଂଘରେ ଏକ ପ୍ରସ୍ତାବ ଆଣିଥିଲା ଯେଉଁଥିରେ ଗାଜାରେ ଯୁଦ୍ଧକୁ ତୁରନ୍ତ ବନ୍ଦ କରିବାକୁ ଦାବି କରାଯାଇଥିଲା । ଏହି ସଂକଳ୍ପ ମଧ୍ୟ ବହୁ ସଂଖ୍ୟାରେ ପାରିତ ହୋଇଥିଲା କିନ୍ତୁ ଭାରତ ଏଥିରୁ ଦୂରେଇ ରହିଥିଲା । ଜାତିସଂଘରେ ଜୋର୍ଡାନ ଆଣିଥିବା ସଂକଳ୍ପକୁ ୧୨୦ ଦେଶ ସମର୍ଥନ କରି ଭୋଟ୍ ଦେଇଥିଲେ ଏବଂ ୧୪ଟି ଦେଶ ଏହାକୁ ବିରୋଧ କରିଥିଲେ । ୪୫ଟି ଦେଶ ମତଦାନରୁ ନିବୃତ୍ତ ରହିଥିଲେ । ଯେଉଁଥିରେ ଭାରତ ମଧ୍ୟ ସାମିଲ ଥିଲା ।
ଜୋର୍ଡାନର ପ୍ରସ୍ତାବରୁ ନିଜକୁ ଦୂରେଇ ରଖିଥିବା ଭାରତର ଆଭିମୁଖ୍ୟ ସ୍ପଷ୍ଟ ଭାବରେ ଇସ୍ରାଏଲ ସପକ୍ଷରେ ବିବେଚନା କରାଯାଉଥିଲା । କିନ୍ତୁ ବର୍ତ୍ତମାନ ଭାରତ ପାଲେଷ୍ଟାଇନ୍ର ଇସ୍ରାଏଲ ସେଟେଲମେଣ୍ଟ ବିରୋଧରେ ମତଦାନ କରିଛି । ଅନେକ ବିରୋଧୀ ଦଳ ମଧ୍ୟ ଭାରତ ସରକାରଙ୍କ ଆଭିମୁଖ୍ୟକୁ ପ୍ରଶଂସା କରିଛନ୍ତି । ଟିଏମସି ସାଂସଦ ସାକେତ ଗୋଖଲେ କହିଛନ୍ତି ଯେ ବସ୍ତିବାସିନ୍ଦାଙ୍କ ମାଧ୍ୟମରେ ଇସ୍ରାଏଲର ପାଲେଷ୍ଟାଇନ ଦଖଲ କରିବା ବେଆଇନ ।
