ବେଙ୍ଗାଲୁରୁ: ଚଳିତ ବିଶ୍ବକପର ଶେଷ ଲିଗ୍ ମ୍ୟାଚ୍ରେ ଟିମ୍ ଇଣ୍ଡିଆ ରନ୍ ବର୍ଷା କରିଛି । ଶ୍ରେୟସ ଆୟର ଏବଂ କେଏଲ ରାହୁଲଙ୍କ ଦମଦାର ଶତକ ଭାରତୀୟ ଟିମ୍କୁ ଏକ ବିଶାଳ ସ୍କୋର କରିବାରେ ସହାୟତା ହୋଇଛି । ବେଙ୍ଗାଲୁରୁର ଏନ ଚିନ୍ନାସ୍ଵାମୀ ଷ୍ଟାଡିୟମରେ ଛକା-ଚୌକାର ରନ ବର୍ଷା ହୋଇଛି । ନେଦରଲ୍ୟାଣ୍ଡସ ବିପକ୍ଷ ମ୍ୟାଚରେ ରୋହିତ ଶର୍ମାଙ୍କ ୬୧ ରନ, ଶୁଭମନ ଗିଲ୍ ୫୧ ରନ ଓ ବିରାଟ କୋହଲିଙ୍କ ୫୧ ରନ ପରେ ଶ୍ରେୟସ ଆୟରଙ୍କ ବିସ୍ଫୋରକ ଅପରାଜିତ ୧୨୮ ରନ ଓ କେଏଲ ରାହୁଲଙ୍କ ୧୦୨ ରନ ବଳରେ ଭାରତ ନିର୍ଦ୍ଧାରିତ ଓଭରରେ ୪ ଓ୍ଵିକେଟ୍ ହରାଇ ୪୧୦ ରନ କରିଛି ।
ନେଦରଲ୍ୟାଣ୍ଡସ ସମ୍ମୁଖରେ ୪୧୧ ରନର ବିଶାଳ ବିଜୟ ଲକ୍ଷ୍ୟ ରହିଛି । ୪୧୦ ସ୍କୋର ବିଶ୍ଵକପରେ ଭାରତର ଦ୍ଵିତୀୟ ସର୍ବାଧିକ ସ୍କୋର । ମୋଟ୍ ଉପରେ ବିଶ୍ଵକପ୍ ଇତିହାସରେ ଏହା ଚତୁର୍ଥ ବଡ଼ ସ୍କୋର । ଏହି ମୁକାବିଲା ହାରିଲେ ନେଦରଲ୍ୟାଣ୍ଡସ ୨୦୨୫ ଚାମ୍ପିଅନ୍ସ ଟ୍ରଫି ପାଇଁ ମଧ୍ୟ ଯୋଗ୍ୟତା ଅର୍ଜନ କରିପାରିବ ନାହିଁ।
ଆଜିର ମ୍ୟାଚ୍ରେ ଭାରତୀୟ ବ୍ୟାଟରଙ୍କ ସାମ୍ନାରେ ନେଦରଲ୍ୟାଣ୍ଡସ ବୋଲର ନିଜକୁ ଅସହାୟ ମନେ କରିଥିଲେ । ଲୋଗାନ ଭାନ ବିକ୍ ୧୦ ଓଭରରେ ସର୍ବାଧିକ ୧୦୭ ରନ୍ ଦେଇଛନ୍ତି । ପଲ ଭାନ ମିକେରେନ୍ ୯୦ ରନ୍ ଦେଇ ଗୋଟିଏ ଓ୍ବିକେଟ ନେଇଛନ୍ତି । ବାସ ଦେ ଲିଡେ ୮୨ ରନ୍ ଦେଇ ଦୁଇଟି ଓ୍ବେକଟ ଅକ୍ତିଆର କରିଥିବା ବେଳେ ରୋଲଫ ଡେର ମରଓ୍ବେ ୫୩ ରନ୍ ବିନିମୟରେ ଗୋଟିଏ ଓ୍ବିକେଟ ଅକ୍ତିଆର କରିଛନ୍ତି । ମୋଟ ୪ଟି ଓ୍ବିକେଟ ଯାଇଥିବା ବେଳେ ଭାରତ ୪୧୦ ରନ୍ ସ୍କୋର କରିଛି ।
