ନୂଆଦିଲ୍ଲୀ, ୩୧।୧: ଉଭୟ ୨୦୨୪ ଏବଂ ୨୦୨୫ରେ ଭାରତର ଅର୍ଥନୈତିକ ବିକାଶ ହାର ୬.୫% ରହିବ । ଘରୋଇ ବଜାରରେ ଚାହିଦା ବୃଦ୍ଧି ଅର୍ଥନୀତିକୁ ବଳୁଆ କରିବ ବୋଲି ଅନ୍ତର୍ଜାତୀୟ ମୁଦ୍ରା ପାଣ୍ଠି(ଆଇଏମ୍ଏଫ୍) ଏହାର ଜାନୁଆରୀ ରିପୋର୍ଟରେ ଉଲ୍ଲେଖ କରିଛି । ପୂର୍ବ ଅନୁମାନ ତୁଳନାରେ ସଂଶୋଧିତ ଅନୁମାନ ୦.୨% ଅଧିକ । ପ୍ରକାଶଯୋଗ୍ୟ, ଦେଶର ଅର୍ଥ ମନ୍ତ୍ରାଳୟ ବଜେଟ୍ ପୂର୍ବରୁ ଏହାର ଅର୍ଥନୈତିକ ସମୀକ୍ଷା ରିପୋର୍ଟରେ ଉଲ୍ଲେଖ କରିଛି ଯେ, ୨୦୨୪-୨୫ ଆର୍ଥିକବର୍ଷରେ ଭାରତୀୟ ଅର୍ଥବ୍ୟବସ୍ଥା ପାଖାପାଖି ୭% ବଢ଼ିବ । ୨୦୨୩-୨୪ରେ ଭାରତୀୟ ଅର୍ଥନୀତି ୬.୭% ଅଭିବୃଦ୍ଧି ହାସଲ କରିବ ବୋଲି ଆଇଏମ୍ଏଫ୍ ପ୍ରକାଶ କରିଛି ।
ଆଲୋଚ୍ୟ ଆର୍ଥିକବର୍ଷରେ ଦେଶ ୭.୩% ବଢ଼ିବ ବୋଲି କେନ୍ଦ୍ର ସରକାର ଚଳିତ ଆର୍ଥିକବର୍ଷ ନିଜର ପ୍ରଥମ ଅଗ୍ରିମ ଆକଳନରେ ପ୍ରକାଶ କରିଥିଲେ । ତେବେ ୨୦୨୪ରେ ବିଶ୍ୱ ଅର୍ଥବ୍ୟବସ୍ଥା ୩.୧% ବଢ଼ିବ ବୋଲି ଆଇଏମ୍ଏଫ୍ ପ୍ରକାଶ କରିଛି । ପୂର୍ବରୁ ଏଥିପାଇଁ ଆଇଏମ୍ଏଫ୍ର ଆକଳନ ରହିଥିଲା ୨.୯% । ୨୦୨୫ରେ ଏହା ୩.୨% ରହିବ ବୋଲି ଅନୁମାନ ରହିଛି ।
