ତେହରାନ୍: ଇସ୍ରାଏଲ ଲାଗି ଗୁଇନ୍ଦାଗିରି କରୁଥିବା ଅଭିଯୋଗରେ ନିଜର ୪ ଜଣ ନାଗରିକଙ୍କୁ ଫାଶୀ ଦେଇଛି ଇରାନ୍ । ଇରାନର ଡିଫେନ୍ସ ସାଇଟକୁ ନଷ୍ଟ କରିବା ଲାଗି ଇସ୍ରାଏଲର ଯୋଜନା ଲାଗି ଏମାନେ ତଥ୍ୟ ଦେଉଥିବା ନେଇ ଅଭିଯୋଗ ହୋଇଥିଲା । କୋର୍ଟଙ୍କ ଅନୁସାରେ, ମହମ୍ମଦ ଫରମରଜୀ, ମୋହସିନ୍ ମଜଲୁମ୍, ବଫା ଅଜରବାର ଏବଂ ପେଜମ୍ୟାନ୍ ଫତେହିକୁ ଜୁଲାଇ ୨୦୨୨ରେ ଗିରଫ କରାଯାଇଥିଲା । କେନ୍ଦ୍ର ବିରୁଦ୍ଧରେ ଷଡ଼ଯନ୍ତ୍ର ରଚିଥିବା ନେଇ ଏହି ୪ ନାଗରିକଙ୍କ ଉପରେ ଅଭିଯୋଗ ରହିଥିଲା ।
ଏହି ମାଲାରେ ସେମାନଙ୍କୁ ଦୋଷୀ ସାବ୍ୟସ୍ତ କରାଯିବ ସହ ତରବରିଆ ଭାବେ ଫାଶୀ ଦେଇଛନ୍ତି ଇରାନ୍ ସରକାର । ଦେଶର ସର୍ବୋଚ୍ଚ ଅଦାଲତ ତଳ କୋର୍ଟଙ୍କ ଫାଶୀ ଦଣ୍ଡାଦେଶକୁ କାଏମ ରଖିଥିଲେ । ଏହା ପରେ ସେମାନଙ୍କୁ ସୋମବାର ଫାଶୀ ଦିଆଯାଇଛି । ଏହା ପୂର୍ବରୁ ଇସ୍ରାଏଲର ଗୁଇନ୍ଦା ସଂସ୍ଥା ମୋସାଦ ସହ ସଂପର୍କ ରଖିଥିବା ଏକ ଗୋଷ୍ଠୀକୁ ଧରିଥିଲେ ଇରାନ୍ ସରକାର । ଗୋଷ୍ଠୀର ସମସ୍ତ ସଦସ୍ୟଙ୍କୁ ଗିରଫ କରାଯିବା ସହ ସେମାନଙ୍କ ପାଖରୁ ବିପୁଳ ପରିମାଣରେ ଅସ୍ତ୍ରଶସ୍ତ୍ର ଜବତ ହୋଇଥିଲା ।
ସେହି ସମୟରେ ଏହି ୪ ଅଭିଯୁକ୍ତଙ୍କୁ ମଧ୍ୟ ଗିରଫ କରାଯାଇଥିଲା । ଇସ୍ରାଏଲ ଏବଂ ମୋସାଦ ଉପରେ ବିଭିନ୍ନ ସମୟରେ ଇରାନ ଅଭିଯୋଗ କରିଆସିଛି । ଇରାନ ଏବଂ ଇସ୍ରାଏଲ ପରଷ୍ପର ବିରୁଦ୍ଧରେ ଗୁଇନ୍ଦାଗିରି କରୁଥିବା ଅଭିଯୋଗ କରିଆସିଛନ୍ତି । ଇରାନ୍ ମାଟିରେ ଅଶାନ୍ତି ଜାରି ରହିଛି ବୋଲି ଇସ୍ରାଏଲ ଅଭିଯୋଗ କରୁଥିବା ବେଳେ ପାଲେଷ୍ଟାଇନ୍ରେ ଇସ୍ରାଏଲ ନରସଂହାର କରୁଛି ବୋଲି ଦାବି କରିଆସିଛି ଇରାନ୍ ।
