ହାଇଦ୍ରାବାଦ: ଭାରତ ରାଷ୍ଟ୍ର ସମିତି (ବିଆରଏସ) ନେତ୍ରୀ ତଥା ତେଲେଙ୍ଗାନା ମୁଖ୍ୟମନ୍ତ୍ରୀ କେ. ଚନ୍ଦ୍ରଶେଖର ରାଓ (କେସିଆର)ଙ୍କ ଝିଅ କେ କବିତାଙ୍କ ମନ୍ତବ୍ୟକୁ ନେଇ ରାଜନୀତି ଜୋର ଧରିଛି । କେସିଆରଙ୍କୁ ବିରାଟ କୋହଲି ସହ ତୁଳନା କରିଛନ୍ତି କବିତା । ସେ ଟ୍ବିଟ କରି କହିଛନ୍ତି, କୋହଲିଙ୍କ ଭଳି କେସିଆର ବି ଅପରାଜେୟ । ଫିଲ୍ଡରେ ମାଷ୍ଟର ଥିଲେ ମ୍ୟାଜିକ ହୁଏ । ଆଉ ଏହା ପରେ କଂଗ୍ରେସ କବିତାଙ୍କୁ କଡ଼ା ଜବାବ ଦେଇଛି ।
କବିତାଙ୍କ ଟ୍ବିଟର ଜବାବ ଦେବାକୁ ଯାଇ ତେଲେଙ୍ଗାନା କଂଗ୍ରେସ ପକ୍ଷରୁ କୁହାଯାଇଛି ଯେ, ଦେଶ ପାଇଁ ଖେଳିବା ଏବଂ କମିଶନ ପାଇଁ ଖେଳିବା ଭିତରେ ପାର୍ଥକ୍ୟ ରହିଛି । ଅନ୍ୟ ଏକ ପୋଷ୍ଟରେ କଂଗ୍ରେସ ପକ୍ଷରୁ କୁହାଯାଇଛି ଯେ, କ୍ରିକେଟରେ ବିରାଟ କୋହଲିଙ୍କ ପାଇଁ କୌଣସି ପ୍ରତିଯୋଗୀତା ନାହିଁ । ସେହିଭଳି କାଳେଶ୍ବରମ ଦୁର୍ନୀତିରେ କେସିଆରଙ୍କଠୁ କେହି ଭଲ ନାହିଁ ।
ତେବେ ୨୦୨୩ ବିଶ୍ବକପ ସେମି ଫାଇନାଲ ମୁକାବିଲାରେ ବିରାଟ କୋହଲି ୧୧୭ ରନ୍ କରିଥିବା ବେଳେ ୫୦ ତମ ଶତକ ପୂରଣ କରିଛନ୍ତି । ଏହା ସହ ସେ ସଚିନ ତେନ୍ଦୁଲକର (୪୯ ଶତକ)ଙ୍କୁ ଟପିଯାଇଛନ୍ତି । ଆଉ ଏବେ ବିରାଟଙ୍କୁ ନେଇ ଭାରତ ସମେତ ସମଗ୍ର ବିଶ୍ବରେ ଚର୍ଚ୍ଚା ଲାଗିରହିଛି ।
ସେପଟେ ନେଭମ୍ବର ୩୦ରେ ତେଲେଙ୍ଗାନାରେ ବିଧାନସଭା ନିର୍ବାଚନ ହେବାକୁ ଯାଉଛି । ୧୧୯ଟି ଆସନ ପାଇଁ ପ୍ରାୟ ୨୨୯୦ ଜଣ ପ୍ରାର୍ଥୀ ନାମାଙ୍କନ ଭରିଛନ୍ତି । ସେଥିମଧ୍ୟରୁ ବିଆରଏସ ମୁଖ୍ୟ ନିର୍ବାଚନ ଲଢ଼ିବାକୁ ଥିବା ଗଜଓ୍ବେଲ ଏବଂ କାମାରେଡ୍ଡୀରେ ରେକର୍ଡ ସଂଖ୍ୟକ ପ୍ରାର୍ଥୀ ମୈଦାନକୁ ଓହ୍ଲାଇବେ । ଗଜଓ୍ବେଲରୁ ୪୪ ଏବଂ କାମାରେଡ୍ଡୀରୁ ୩୯ ପ୍ରାର୍ଥୀ ନାମାଙ୍କନ ଭରିଛନ୍ତି ।
ସେହିଭଳି ଏଲବି ନଗରରୁ ସର୍ବାଧିକ ୪୮ ଜଣ ପ୍ରାର୍ଥୀ ନିଜର ଭାଗ୍ୟ ପରୀକ୍ଷା କରିବାକୁ ଯାଉଛନ୍ତି । ହେଲେ ବଂଶଓ୍ବାଡା ଏବଂ ନାରାୟଣପେଟରେ ୭ ଜଣ ଲେଖାଏଁ ପ୍ରାର୍ଥୀ ନିର୍ବାଚନ ଲଢ଼ିବେ । ତେଲେଙ୍ଗାନାର ୧୧୯ ବିଧାନସଭା ଆସନ ଲାଗି ନଭେମ୍ବର ୩୦ରେ ଭୋଟ ପଡ଼ିବାକୁ ଥିବେଳେ ଡିସେମ୍ବର ୩ରେ ଫଳାଫଳ ଘୋଷଣା ହେବ ।
