ତିରୁଅନନ୍ତପୁରମ,୨୮/୧୧: ପ୍ରେମିକ ମାଧ୍ୟମରେ ନିଜର ୭ ବର୍ଷୀୟ ନାବାଳିକା ଝିଅକୁ ଦୁଷ୍କର୍ମ କରାଇବା ଅଭିଯୋଗରେ କେରଳର ଏକ ଫାଷ୍ଟଟ୍ରାକ ସ୍ୱତନ୍ତ୍ର ପୋକ୍ସୋ କୋର୍ଟ ଜଣେ ମା’ଙ୍କୁ ଦୋଷୀ ସାବ୍ୟସ୍ତ କରି ୪୦ ବର୍ଷ ଜେଲ୍ଦଣ୍ଡରେ ଦଣ୍ଡିତ କରିଛନ୍ତି । ଏଥିସହ ୨୦ ହଜାର ଟଙ୍କାର ଜରିମାନା କରିଛନ୍ତି । ଜରିମାନା ଅନାଦେୟ ଅଧିକ ୬ମାସ ଜେଲଦଣ୍ଡ ଭୋଗିବେ ବୋଲି କୋର୍ଟ ତାଙ୍କ ରାୟରେ ସ୍ପଷ୍ଟ କରିଦେଇଛନ୍ତି । ୨୦୧୮ ମାର୍ଚ୍ଚରୁ ୨୦୧୯ ସେପ୍ଟେମ୍ବର ମଧ୍ୟରେ ଏହି ଦୁଷ୍କର୍ମ ଘଟଣା ଘଟିଥିଲା ।
ଅଭିଯୋଗ ଅନୁସାରେ ୪୨ ବର୍ଷୀୟା ଏହି ମହିଳାଙ୍କର ୧୧ ବର୍ଷୀୟ ଓ ୭ ବର୍ଷୀୟ ଦୁଇ ଝିଅ ଥିଲେ । ମହିଳାଙ୍କ ସ୍ୱାମୀ ମାନସିକ ଭିନ୍ନକ୍ଷମ ଥିଲେ । କିନ୍ତୁ ପରବର୍ତ୍ତୀ ସମୟରେ ସେମାନଙ୍କର ବିଚ୍ଛେଦ ଘଟିଥିଲା । ବଡଝିଅକୁ ସ୍ୱାମୀଙ୍କ ପାଖରେ ଛାଡି ମା ସାନ ଝିଅଙ୍କୁ ଧରି ନିଜର ପ୍ରେମିକ ପାଖରେ ଆସି ରହିଥିଲେ । କିଛିଦିନ ରହିବା ପରେ ପ୍ରେମିକ ଜଣକ ନାବାଳିକା ଝିଅକୁ ଦୁଷ୍କର୍ମ କରିଥିଲା । ନାବାଳିକା ଏକଥା ମା’ଙ୍କୁ କହିବାରୁ ମା ତାଙ୍କୁ ଚୁପ୍ କରାଇ ଦେଇଥିଲେ । ଏକଥା କାହା ଆଗରେ ନ କହିବାକୁ ମଧ୍ୟ ତାଗିଦ୍ କରିଥିଲେ । ଦିନେ ଏକଥା ସେ ନିଜର ୧୧ ବର୍ଷୀୟ ବଡ ଭଉଣୀଙ୍କୁ କହିଥିଲେ । ହେଲେ ବଡଭଉଣୀ ମଧ୍ୟ ମା’ଙ୍କ ପ୍ରେମିକଙ୍କ ଦ୍ୱାରା ଦୁଷ୍କର୍ମର ଶିକାର ହୋଇଥିବା ଜାଣିବାକୁ ପାଇଥିଲେ ।
ଉଭୟେ ନାବାଳିକା ନିଜର ଜେଜେମାଙ୍କ ପାଖକୁ ପଳାଇଥିଲେ ଏବଂ ସେଠାରେ ସବୁ କଥା କହିଥିଲେ। ଜେଜେ ମା ପୁଲିସରେ ଅଭିଯୋଗ କରିଥିଲେ । ପୁଲିସ ନାବାଳିକାଙ୍କ ମା ଓ ତାଙ୍କ ପ୍ରେମିକଙ୍କ ବିରୋଧରେ ମାମଲା ରୁଜୁ କରିଥିଲା । ତେବେ ମାମଲା ବିଚାରାଧୀନ ଥିବା ବେଳେ ପ୍ରେମିକ ଜଣକ ଆତ୍ମହତ୍ୟା କରିଥିଲେ । ଏହା ପରେ ମହିଳା ଜଣକ ଅନ୍ୟଜଣେ ପ୍ରେମିକାଙ୍କ ପାଖରେ ରହିବାକୁ ଲାଗିଲେ । ନାବାଳିକା ଦ୍ୱୟ ସେଠାକୁ ଯାଇଥିଲା ବେଳେ ସେ ମଧ୍ୟ ସେମାନଙ୍କୁ ଦୁଷ୍କର୍ମ କରିଥିଲେ । ଶେଷରେ ନାବାଳିକା ଦ୍ୱୟ ପୁଲିସର ଦ୍ୱାରସ୍ଥ ହେବା ପରେ ପୁଲିସ ସେମାନଙ୍କୁ ଚିଲଡ୍ରେନ ହୋମ୍ରେ ନେଇ ଛାଡିଥିଲା । ତେବେ ପ୍ରେମିକର ମୃତ୍ୟୁ ଘଟିଥିବାରୁ ତିରୁଅନନ୍ତପୁରମ୍ର ପୋକ୍ସୋ କୋର୍ଟ ଆଜି ମହିଳାଙ୍କୁ ଦଣ୍ଡିତ କରିଛନ୍ତି ।
Also Read :-
