କେସିଙ୍ଗା, ୨୨/୨ : ବେଆଇନ ଭାବେ ବିଦେଶୀ ମଦ ଚୋରା ଚାଲାଣ ବେଳେ ପୋଲିସର ଚଢ଼ାଉ। ସୋନପୁର ଡିପୋରୁ ମଦ ଉଠାଇ କଳାହାଣ୍ଡି ଜିଲ୍ଲାର ବିଭିନ୍ନ ସ୍ଥାନକୁ ଚାଲାଣ କରୁଥିବା ବେଳେ ଏକ ଟ୍ରକ୍ ଜବତ କରିଛି କେସିଙ୍ଗା ପୋଲିସ। ଏହା ସହ ୪ ଜଣଙ୍କୁ ଅଟକ ରଖି ପଚରାଉଚରା କରୁଛି ପୋଲିସ।

ସୂଚନାନୁଯାୟୀ, କେସିଙ୍ଗା ପୋଲିସ ବିଦେଶୀ ମଦ ବୋଝେଇ ହୋଇଥିବା ଏକ ୬ ଚକିଆ ଟ୍ରକ୍ ଜବତ କରିଛି। ଟ୍ରକ୍ ଡ୍ରାଇଭରଙ୍କ ସମେତ ଦୋକାନମାନଙ୍କୁ ମଦ ସପ୍ଲାଏ କରିବାରେ ସହଯୋଗ କରୁଥିବା ୪ ଜଣଙ୍କୁ ଥାନାରେ ଅଟକ ରଖି ପୋଲିସ ପଚରାଉଚରା କରୁଛି। କେସିଙ୍ଗା ଆଦର୍ଶ ଥାନା ଆଇଆଇସି ପ୍ରଦ୍ୟୁମ୍ନ କୁମାର ମହାପାତ୍ର ଓ ସ୍ଥାନୀୟ ଅବକାରୀ ବିଭାଗ ଅଧିକାରୀ ବିଶ୍ଵଜିତ ଆରୁଖଙ୍କ ଉପସ୍ଥିତିରେ କେସିଙ୍ଗା ଉପଖଣ୍ଡ ଆରକ୍ଷୀ ଅଧିକ୍ଷକ ବିନୋଦ ପାଟିଲ ଘଟଣାର ତଦନ୍ତ କରୁଥିବା ଜଣାପଡିଛି। 

ଖବର ସଂଗ୍ରହରୁ ପ୍ରକାଶ ଯେ, ସୋନପୁର ଡିପୋରୁ ବିଭିନ୍ନ ବ୍ରାଣ୍ଡର ବିଦେଶୀ ମଦ ନେଇ କଳାହାଣ୍ଡି ଜିଲ୍ଲାର ବିଭିନ୍ନ ଦୋକାନକୁ ସପ୍ଲାଏ କରିବା ପାଇଁ ଉକ୍ତ ଗାଡିଟି ଆସିଥିଲା। ହେଲେ ତାହା ବେଆଇନ ହୋଇଥିବା ନେଇ କେସିଙ୍ଗା ପୁଲିସ କୌଣସି ସୂତ୍ରରୁ ଖବର ପାଇ ଚଢାଉ କରିଥିଲା। ମଦ ବୋଝେଇ ହୋଇଥିବା ଟ୍ରକ୍‌ର କାଗଜପତ୍ର ଠିକ୍ ଥିଲେ ସୁଦ୍ଧା ଗାଡ଼ିର ରୁଟ୍ ଚାର୍ଟ ଠିକ୍ ନଥିବା ସନ୍ଦେହରେ ପୁଲିସ ଗାଡିଟିକୁ ପରଲସିଙ୍ଗା ଛକ ନିକଟରେ ଧରିବାରେ ସଫଳ ହୋଇଥିଲା। ତେବେ ଏହି ଘଟଣାରେ ପୁଲିସ ନିରପେକ୍ଷ ତଦନ୍ତ କରି ଆବଶ୍ୟକ ପଦକ୍ଷେପ ଗ୍ରହଣ କରିବା ପାଇଁ ସାଧାରଣରେ ଦାବି ହେଉଛି ।