ମାଲକାନଗିରି, ୩/୪ : ମାଲକାନଗିରି ଜିଲ୍ଲା ପୁଲିସକୁ ବଡ଼ ସଫଳତା। ନିର୍ବାଚନ ପୂର୍ବରୁ ମାଓବାଦୀଙ୍କ ଗୋଳାବାରୁଦ ଡମ୍ପିଂ ଠାବ। ବିପୁଳ ପରିମାଣର ଆଇଡି, ଗୋଳା ବାରୁଦ, ବିସ୍ଫୋରକ ସାମଗ୍ରୀ ଜବତ। ଏନେଇ ସୂଚନା ଦେଲେ ମାଲକାନଗିରି ଏସପି।

ସୂଚନା ଅନୁଯାୟୀ, ମାଲକାନଗିରି ଜିଲ୍ଲା କାଲିମେଳା ଥାନା ଅନ୍ତର୍ଗତ ଆନ୍ଧ୍ର ଓଡ଼ିଶା ସୀମାନ୍ତ ଦୟାଲତୁଙ୍ଗ ଗାଁ ନିକଟ ଜଙ୍ଗଲରେ ମାଓବାଦୀଙ୍କ ଗତିବିଧି ସହ ବିସ୍ଫୋରକ ସାମଗ୍ରୀ ଲୁଚାଇ ରଖାଯାଇଥିବା ନେଇ ଗୁଇନ୍ଦା ସୂତ୍ରରୁ ଖବର ମିଳିଥିଲା । ଏସପି ୱାଧୱାନିଙ୍କ ନିର୍ଦ୍ଦେଶ କ୍ରମେ ମାଲକାନଗିରି ଡିଭିଏଫ୍ ବାହିନୀ, ପୁଲିସ ଓ ଗୁଇନ୍ଦା ପୁଲିସ ବାହିନୀ ମିଳିତ ତଲାସୀ ଅଭିଯାନ ଆରମ୍ଭ କରିଥିଲେ। ଦୟାଲତୁଙ୍ଗ ଗ୍ରାମ୍ୟ ଜଙ୍ଗଲ ମଧ୍ୟରେ ଖୋଜା ଖୋଜି କରୁଥିବା ସମୟରେ ପାହାଡ଼ ନିକଟରେ ହଠାତ୍ ମେଟାଲ ଡିଟେକ୍ଟରରୁ ସାଇରନ ବାଜିଥିଲା। ମାଓବାଦୀଙ୍କ ଦ୍ଵାରା ମାଟି ତଳେ ଲୁଚାଇ ରଖାଯାଇଥିବା ଏକ ଡମ୍ପିଂ ଠାବ ହୋଇଥିଲା। ସେଥିରୁ ବିପୁଳ ପରିମାଣର ଆଇଡି, ବିସ୍ଫୋରକ ସାମଗ୍ରୀକୁ ଯବାନମାନେ ଜବତ କରିଥିଲେ। ଜବତ ସାମଗ୍ରୀ ମଧ୍ୟରୁ ୧୯୦ଟି ଇଲକ୍ଟ୍ରିକ ଜିଲେଟିନ ଷ୍ଟିକ, ୨୦ କେଜି ଓଜନର ଗୋଟିଏ ଆଇଡି ବୋମା, ୭କେଜି ଓଜନର ୫ଟି ଆଇଡି ବୋମା, ୫କେଜି, ୪କେଜି ଓଜନର ଗୋଟିଏ ଆଇଡି ବୋମା, ୭କେଜି ଓଜନର ୫ଟି ଆଇଡି ବୋମା, ୫କେଜି, ୪କେଜି, ୨କେଜି ଓଜନର ଗୋଟିଏ ଲେଖାଏଁ ଆଇଡି ବୋମା, ୩କେଜି ଓଜନର ୩ଟି ଆଇଡି ବୋମା ସହ କିଛି ମାଓ ସାମଗ୍ରୀ ଜବତ ହୋଇଥିଲା। ଉକ୍ତ ଜଙ୍ଗଲରେ ଆଜି ଦିନ ତମାମ ପୁଲିସ ପକ୍ଷରୁ ସର୍ଚ୍ଚ ଅପରେସନ ଜାରି ରହିଛି। ଆସନ୍ତା ନିର୍ବାଚନ ସମୟରେ ମାଓବାଦୀ ମାନେ କୌଣସି ଏକ ବଡ଼ ଧରଣର ହିଂସାକାଣ୍ଡ ଓ ବିସ୍ପୋରଣ ଘଟଣା ଘଟାଇବା ପାଇଁ ଏହି ଆଇଡି ବମ୍ ଗୁଡିକ ଲୁଚାଇ ରଖିଥିଲେ। ସେମାନଙ୍କ ଯୋଜନାକୁ ମାଲକାନଗିରି ପୁଲିସ ପଣ୍ଡ କରିଦେଇଛି।