ଦେବଗଡ଼, ୨୧।୧: ଦେବଗଡ଼ ଥାନା ଅନ୍ତର୍ଗତ ଲଇମୁରା ରାସ୍ତାର ଗଇଲୋ ଘାଟିରେ ଏକ ମିନି ଟ୍ରକ୍ ଦୁର୍ଘଟଣାଗ୍ରସ୍ତ । ଟ୍ରକ୍‌ଟି ରାସ୍ତାକଡ଼ର ସୁରକ୍ଷା ବାଡ଼ ଡେଇଁ ଘାଟି ତଳକୁ ଖସି ପଡ଼ିଥିବା ଜଣାପଡ଼ିଛି l ୨୦୧୭ ଏପ୍ରିଲ ୧୬ରେ ଯେଉଁ ସ୍ଥାନରେ ବସ୍ ଦୁର୍ଘଟଣାରେ ୨୭ ଜଣ ଯାତ୍ରା କଳାକାରଙ୍କ ଜୀବନ ଯାଇଥିଲା ଠିକ୍ ସେହି ସ୍ଥାନରେ ହିଁ ସମାନ ଢଙ୍ଗରେ ରବିବାର ଏହି ଦୁର୍ଘଟଣା ଘଟିଛି l 

ସୂଚନା ଅନୁଯାୟୀ, ଝରାଗୋଗୁଆ ଗ୍ରାମରେ ଥିବା ଏକ ଫାର୍ମରୁ ୪୦୭ନଂ ମିନି ଟ୍ରକ୍‌ରେ ଅଣ୍ଡା ବୋଝେଇ କରି କେନ୍ଦୁଝର ଅଭିମୁଖେ ଯାଉଥିଲା । ଏତିକି ବେଳେ ଚାଳକ ଜଣକ ଭାରସାମ୍ୟ ହରାଇ ଘାଟି ରାସ୍ତାରେ ଥିବା ସୁରକ୍ଷା ବାଡ଼ ଡେଇଁ ଘାଟି ତଳକୁ ଖସିଯାଇଥିଲା । ଫଳରେ ଗାଡ଼ିଟି ଭାଙ୍ଗିରୁଜି ଚୁରମାର୍ ହୋଇଯାଇଥିବା ବେଳେ ସୌଭାଗ୍ୟବଶତଃ ଗାଡ଼ି ଚାଳକ ଓ ସହଯୋଗୀ ଜଣକ ଅଳ୍ପକେ ମୃତ୍ୟୁମୁଖରୁ ବର୍ତ୍ତି ଯାଇଥିଲେ । ଚାଳକ ଓ ସହଯୋଗୀ ଜଣକ ହେଲେ କେନ୍ଦୁଝର ଜିଲ୍ଲା ନରଣପୁର ଗ୍ରାମର ସତ୍ୟଜିତ ସାହୁ ଓ ସହାୟକ ସରୋଜ ମାଝୀ l ସ୍ଥାନୀୟ ଲୋକଙ୍କ ସହାୟତରେ ଉଭୟ ଗୁରୁତରଙ୍କୁ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିବା ବେଳେ ବର୍ତ୍ତମାନ ୨ଜଣଙ୍କ ସ୍ୱାସ୍ଥ୍ୟବସ୍ଥା ଠିକ୍ ଥିବା ଜଣାପଡ଼ିଛି ।