ନୂଆଦିଲ୍ଲୀ : କେନ୍ଦ୍ରୀୟ ରିଜର୍ଭ ବ୍ୟାଙ୍କ ପକ୍ଷରୁ ପେଟିଏମ୍‌ ପେମେଣ୍ଟସ ବ୍ୟାଙ୍କ ଉପରେ କଡ଼ା କାର୍ଯ୍ୟାନୁଷ୍ଠାନ ପରେ ପେଟିଏମ୍‌ର ପ୍ୟାରେଣ୍ଟ କମ୍ପାନୀ -ୱାନ ୯୭ କମ୍ୟୁନିକେସନ ଉପରେ ସଙ୍କଟ ବଢିବାରେ ଲାଗିଛି। କମ୍ପାନୀର ସେୟାରରେ ଲଗାତାର ୩ଟି କାରବାର ଦିନରେ ଲୋୟର ସର୍କିଟ୍‌ରେ ପହଞ୍ଚିଛି । ଏବେ ପେଟିଏମ୍‌ ପେମେଣ୍ଟସ ବ୍ୟାଙ୍କର ଲାଇସେନ୍ସ ଉପରେ ମଧ୍ୟ ସଙ୍କଟର  କଳା ବାଦଲ ଘେରି ରହିଛି। 

ଏହି ମଧ୍ୟରେ ଖବର ଆସିଛି କି ୱାନ୯୭ କମ୍ୟୁନିକେଶନ ଅର୍ଥାତ୍‌ ପେଟିଏମ୍‌ ନିଜର ୱାଲେଟ୍‌ କାରବାରକୁ ବିକ୍ରି କରିବା ପାଇଁ ମୁକେଶ ଅମ୍ୱାନୀଙ୍କ ସହ ଆଲୋଚନା କରୁଛି। ହିନ୍ଦୁ ବିଜନେସଲାଇନର ରିପୋର୍ଟ ଅନୁସାରେ, ମୁକେଶ ଅମ୍ୱାନୀଙ୍କ କମ୍ପାନୀ ଜିୟୋ ଫାଇନେନ୍ସିଆଲ ସର୍ଭିସେସ୍‌ ବ୍ୟତୀତ ଏଚଡିଏଫସି ବ୍ୟାଙ୍କ ସହ କଥାବାର୍ତ୍ତା ହେଉଛି। ଏହି ଖବର ପରେ ସୋମବାର ବିଏସଇ ଉପରେ ଜିୟୋ ଫାଇନେନ୍ସିଆଲ ସର୍ଭିସସେଜ୍‌ର ସେୟାର ୧୪ ପ୍ରତିଶତ ବଢି ୨୮୯.୭୦ ଟଙ୍କାର ଉଚ୍ଚତମ ସ୍ତରରେ ପହଞ୍ଚିଛି। ଏହା ସେୟାରର ଅଲ୍‌ ଟାଇମ୍‌ ହାଇ ମଧ୍ୟ। କହି ରଖୁଛୁ କି ଜିୟୋ ଫାଇନେନ୍ସିଆଲ ସର୍ଭିସେସ୍‌କୁ ଗତ ବର୍ଷ ରିଲାଏନ୍ସ ଇଣ୍ଡଷ୍ଟ୍ରିଜ୍‌ ଡିମର୍ଜ କରିଥିଲା। ଏହାପରେ ଅଗଷ୍ଟ ୨୦୨୩ରେ ଜିୟୋ ଫାଇନେନ୍ସିଆଲ ସର୍ଭିସେଜ୍‌ର ସେୟାର ବଜାରରେ ଲିଷ୍ଟିଂ ହୋଇଥିଲା। କିଛି ମାସ ଚାପରେ ରହିବା ପରେ ଏହି ସେୟାର ଦ୍ରୁତ ବେଗରେ ବଢୁଛି। 

ମିଡ଼ିଆ ରିପୋର୍ଟରେ ଦାବି କରାଯାଇଛି କି, ପେଟିଏମ୍‌ର ଫାଉଣ୍ଡର ବିଜୟ ଶେଖର ଶର୍ମାଙ୍କ ଟିମ୍‌ ଗତ ବର୍ଷ ନଭେମ୍ୱର ମାସରୁ ଜିୟୋ ଫାଇନେନ୍ସିଆଲ ସହ କଥାବାର୍ତ୍ତା କରୁଥିଲା। ସେଠାରେ ଆରବିଆଇର ପ୍ରତିବନ୍ଧକର ଠିକ୍‌ ପୂର୍ବରୁ ଏଚଡିଏଫସି ବ୍ୟାଙ୍କ ସହ କଥାବାର୍ତ୍ତା ପେଟିଏମ୍‌ ପେମେଣ୍ଟସ ବ୍ୟାଙ୍କ ଉପରେ ଆରମ୍ଭ ହୋଇଥିଲା। ଏହା ସମ୍ଭବ କି ଜିୟୋ ଫାଇନେନ୍ସିଆଲ ବଡ଼ ବେଲଆଉଟର ଅଂଶ ଭାବେ ପେଟିଏମ୍‌ ପେମେଣ୍ଟସ ବ୍ୟାଙ୍କର ଅଧିଗ୍ରହଣ କରିବାର ପ୍ରସ୍ତାବ ରଖି ପାରେ।