ନୂଆଦିଲ୍ଲୀ: ଜ୍ଞାନବାପି ମସଜିଦ୍ ପରିସରରେ ଥିବା ବ୍ୟାସଙ୍କ ତହଖାନାରେ ପୂଜା ପାଇଁ ଅନୁମତି ମିଳିସାରିଛି । ଏହା ପରେ ବୁଧବାର ବିଳମ୍ବିତ ରାତିରେ ଏଠାରେ ମୂର୍ତ୍ତି ରଖି ପୂଜାର୍ଚ୍ଚନା ଆରମ୍ଭ କରାଯାଇଛି । ଅନ୍ୟପଟେ ବ୍ୟାସଙ୍କ ତହଖାନାରେ ହିନ୍ଦୁ ପକ୍ଷଙ୍କ ପୂଜାର୍ଚ୍ଚନା ବିରୋଧରେ ମୁସ୍ଲିମ ପକ୍ଷ ଆହ୍ଲାବାଦ ହାଇକୋର୍ଟଙ୍କ ଦ୍ବାରସ୍ଥ ହୋଇଛନ୍ତି । ଏହା ବିରୋଧରେ ଆବେଦନ କରିବା ସହ ଶୁଣାଣି କରିବାକୁ ଅନୁରୋଧ କରିଛି ଅଞ୍ଜୁମାନ ଇନ୍ତେଜାମିୟା ମସଜିଦ୍ କମିଟି । ତଳ କୋର୍ଟଙ୍କ ରାୟକୁ ଚ୍ୟାଲେଞ୍ଜ କରି କମିଟି ପକ୍ଷରୁ ଏହି ଆବେଦନ କରାଯାଇଛି ।
ଜ୍ଞାନବାପି ପରିସରରେ ଥିବା ବ୍ୟାସଙ୍କ ତହଖାନାରେ ପୂଜା କରିବାକୁ ଅଧିକାରକୁ ନେଇ ମାମଲା ପୁଣିଥରେ ବାରଣସୀ ଜିଲ୍ଲା କୋର୍ଟରେ ପହଞ୍ଚିଛି । ହାଇକୋର୍ଟରେ ଆବେଦନ କରିଥିବାରୁ ୧୫ ଦିନ ଲାଗି ସମୟ ମାଗିଛି ମୁସଲିମ୍ ପକ୍ଷ । ସେପଟେ ବ୍ୟାସଙ୍କ ତହଖାନାରେ ପୂଜା ଅନୁମତି ବିରୋଧରେ ସୁପ୍ରିମକୋର୍ଟରେ ମଧ୍ୟ ଅଞ୍ଜୁମାନ ଇନ୍ତେଜାମିୟା ମସ୍ଜିଦ କମିଟି ଆବେଦନ କରିଥିଲା । ଭେକେସନ୍ ରେଜିଷ୍ଟ୍ରାରଙ୍କୁ ମୁସଲିମ୍ ପକ୍ଷର ଓକିଲ ସାକ୍ଷାତ କରିବା ସହ ପୂଜା ଉପରେ ରୋକ ଲଗାଇବା ଉପରେ ବିଚାର କରିବାକୁ ଆବେଦନ କରିଥିଲେ।
ଏପରିକି ଗୁରୁବାର ଭୋର ୪ଟାରେ ସିଜେଆଇ ଡିଓ୍ବାଇ ଚନ୍ଦ୍ରଚୂଡଙ୍କ ସାମ୍ନାରେ ଦସ୍ତାବିଜ ବି ରଖିଥିଲେ । ହେଲେ ଏହି ମାମଲାରେ କୌଣସି ପ୍ରକାର ଆଶ୍ବସ୍ତି ଲାଗି ଆହ୍ଲାବାଦ ହାଇକୋର୍ଟଙ୍କ ଦୃଷ୍ଟି ଆକର୍ଷଣ କରିବାକୁ ସିଜେଆଇ କହିଥିଲେ । ନିକଟରେ ଏଏସ୍ଆଇ ରିପୋର୍ଟରେ ସ୍ପଷ୍ଟ ହୋଇଥିଲା ଯେ, ଜ୍ଞାନବାପି ମସଜିଦ୍ ଏକ ପୁରୁଣା ହିନ୍ଦୁ ମନ୍ଦିରର ଢ଼ଞ୍ଚା ଉପରେ ତିଆରି ହୋଇଛି । ଏଏସ୍ଆଇର ରିପୋର୍ଟ ଆଧାରରେ ବାରଣସୀ ଜିଲ୍ଲା କୋର୍ଟ ହିନ୍ଦୁ ପକ୍ଷଙ୍କୁ ମସଜିଦ୍ର ତହଖାନାରେ ପୂଜା କରିବାକୁ ଅନୁମତି ଦେଇଛନ୍ତି । ଏହା ପରେ ସେଠାରେ ଦେବାଦବୀଙ୍କ ମୂର୍ତ୍ତି ରଖି ପୂଜାର୍ଚ୍ଚନା ଆରମ୍ଭ ହୋଇଯାଇଛି । ଆଉ ଏଠାରେ ଶ୍ରଦ୍ଧାଳୁଙ୍କ ଭିଡ଼ ମଧ୍ୟ ବଢ଼ିବାରେ ଲାଗିଛି ।
