ମୁମ୍ବାଇ, ୧୦/୦୨: ମହାରାଷ୍ଟ୍ରର ସିନ୍ଦେ ସରକାରରେ କ୍ୟାବିନେଟ୍ ମନ୍ତ୍ରୀ ଥିବା ଏନସିପି ନେତା ଛଗନ ଭୁଜବଳଙ୍କୁ ଜୀବନରୁ ମାରିଦେବାକୁ ଧମକ ମିଳିଛି । ଭୁଜବଳଙ୍କ ଘରକୁ ଅଜଣା ବ୍ୟକ୍ତିଙ୍କ ପତ୍ର ଆସିଛି । ଯେଉଁଥିରେ ଭୁଜବଳଙ୍କୁ ଜୀବନରେ ମାରିଦେବାକୁ ସୁପାରି ଦିଆ ଯାଇଥିବା କୁହାଯାଇଛି । ଧମକ ପରେ ଆଲର୍ଟରେ ରହିଛି ପୋଲିସ । ମିଳଥିବା ପତ୍ରକୁ ନେଇ ଛାନଭିନ୍ ଆରମ୍ଭ ହୋଇଥିବା ବେଳେ ଭୁଜବଳଙ୍କ ସୁରକ୍ଷା ବଢ଼ାଇ ଦିଆ ଯାଇଛି ।
ଏହା ପୂର୍ବରୁ ବି ଛଗନ ଭୁଜବଳଙ୍କୁ ମଧ୍ୟ ଧମକ ମିଳିଥିଲା । ମରାଠା ସଂରକ୍ଷଣକୁ ନେଇ ଛଗନ ଭୁଜବଳ ଓବିସି ସଂରକ୍ଷଣକୁ ନେଇ ବିବାଦୀୟ ଭାବେ ନିଜ ପକ୍ଷ ରଖିଥିଲେ । ଯାହା ପରେ ଭୁଜବଳଙ୍କୁ ଲାଗାତାର ଧମକ ମିଳୁଥିଲା ।
ଅନ୍ୟପଟେ ଜଲଗାଓଁରେ ବିଜେପି ନେତାଙ୍କ ଉପରେ ଗୁଳିମାଡ଼, ମୁମ୍ବାଇର ଦହିସରରେ ୟୁବିଟି ନେତାଙ୍କୁ ଗୁଳି କରି ହତ୍ୟା, ଥାନେରେ ଶିବସେନା ନେତା ମହେଶ ଗାଏକୱାଡ଼ଙ୍କୁ ବିଜେପି ବିଧାୟକ ଗଣପତ ଗୁଳି କରିବା ପରେ ପୋଲିସ ଏବେ ସତର୍କ ରହିଛି ।
ଏବେ ଛଗନ ଭୁଜବଳଙ୍କୁ ହତ୍ୟା ନେଇ ଆସିଥିବା ଚିଠିରେ ଲେଖା ଯାଇଛି, ଆପଣଙ୍କୁ ହତ୍ୟା ପାଇଁ ୫ ଜଣ ସୁପାରି ନେଇଛନ୍ତି । ସେମାନେ ଗଙ୍ଗାପୁର ଡିଣ୍ଡୋରୀର ଏକ ହୋଟେଲରେ ରହୁଛନ୍ତି । ମାରିବା ପାଇଁ ନେଇଛନ୍ତି ୫୦ ଲକ୍ଷ ଟଙ୍କା ସୁପାରୀ । ୫ ଜଣ ରାତିରେ ଆପଣଙ୍କ ପିଛା କରୁଛନ୍ତି । ଆପଣ ସାବଧାନ ରୁହନ୍ତୁ ।
