ମୁମ୍ବାଇ: ଆମେରିକାର ନ୍ୟୁୟର୍କକୁ ଉଡ଼ାଣ ଭରିଥିବା ଏକ ଏୟାର ଇଣ୍ଡିଆ ବିମାନ ଯାନ୍ତ୍ରିକ ତ୍ରୁଟି ଯୋଗୁଁ ପୁଣି ମୁମ୍ବାଇ ଏୟାରପୋର୍ଟକୁ ଫେରିଆସିଛି । ବୋଇଂ ୭୭୭ ବିମାନ ଫେରି ଆସିବା ପରେ ମୁମ୍ବାଇ ବିମାନବନ୍ଦରରେ ସୁରକ୍ଷିତ ଅବତରଣ କରିଛି । ଏହା ପରେ ବିମାନର ମରାମତି କାର୍ଯ୍ୟ ଜାରି ରହିଥିବା ନେଇ ଏୟାର ଲାଇନ୍ସ ପକ୍ଷରୁ କୁହାଯାଇଛି । ଏଆଇ ୧୧୯ ମୁମ୍ବାଇରୁ ନ୍ୟୁୟର୍କ ଯାଉଥିବା ବିମାନ ଫେରି ଆସିବା ସହ ସୁରକ୍ଷିତ ଲ୍ୟାଣ୍ଡିଂ କରିଛି । ଏଥିରେ ସାମନ୍ୟ ଯାନ୍ତ୍ରିକ ତ୍ରୁଟି ଦେଖାଦେଇଥିବା ବେଳେ ଯାତ୍ରୀ ଏବଂ କ୍ରୁ ସଦସ୍ୟଙ୍କ ସୁରକ୍ଷା ଦୃଷ୍ଟିୁ ଏହି ନିଷ୍ପତ୍ତି ନିଆଯାଇଥିବା ନେଇ ଏୟାର ଲାଇନ୍ସ ପକ୍ଷରୁ ସୂଚନା ଦିଆଯାଇଛି ।
ସେପଟେ ବିମାନରେ କେତେଜଣ ଯାତ୍ରୀ ଏବଂ କ୍ରୁ ସଦସ୍ୟ ଥିଲେ ସେନେଇ ତଥ୍ୟ ମିଳିପାରି ନାହିଁ । ହେଲେ ଯାନ୍ତ୍ରିକ ତ୍ରୁଟି ଦେଖାଯିବା ପରେ ବିମାନକୁ ତୁରନ୍ତ ଫେରିବାକୁ ପଡ଼ିଥିଲା । ନ୍ୟୁୟର୍କ ଯାଇପାରିନଥିବା ସମସ୍ତ ଯାତ୍ରୀଙ୍କୁ ମୁମ୍ବାଇ ବିମାନବନ୍ଦରରେ ସମସ୍ତ ପ୍ରକାର ସହାୟତା କରାଯାଉଛି । ଏପରିକି ସେମାନଙ୍କୁ ଗନ୍ତବ୍ୟ ସ୍ଥଳ ଅଭିମୁଖେ ପଠାଇବା ଲାଗି ଏୟାର ଲାଇନ୍ସ ପକ୍ଷରୁ ଚେଷ୍ଟା ଜାରି ରହିଛି ବୋଲି ଜଣାପଡ଼ିଛି ।
ଯାତ୍ରୀମାନଙ୍କୁ ହୋଟେଲରେ ରହିବା ବ୍ୟବସ୍ଥା କରାଯାଉଛି । କେତେକଙ୍କୁ ଅନ୍ୟ ବିମାନରେ ନ୍ୟୁୟର୍କ ପଠାଯାଉଛି । ଏହା ସହ କେତେକ ଯାତ୍ରୀଙ୍କୁ ଅନ୍ୟ ତାରିଖରେ ଯିବା ପାଇଁ ଏୟାର ଲାଇନ୍ସ ପକ୍ଷରୁ ଅନୁରୋଧ କରାଯାଇଥିବା କୁହାଯାଉଛି । ହେଲେ ଯାତ୍ରୀଙ୍କ ସୁରକ୍ଷା ଦୃଷ୍ଟିରୁ ଏୟାର ଲାଇନ୍ସର ନିଷ୍ପତ୍ତିକୁ ସ୍ବାଗତ କରାଯାଇଛି ।
