ଅହମ୍ମଦାବାଦ ୧୦/୧୧: ଚଳିତ ବିଶ୍ୱକପ୍‌ରେ ଶୁକ୍ରବାର ଦକ୍ଷିଣ  ଆଫ୍ରିକା ଓ ଆଫଗାନିସ୍ତାନ ପରସ୍ପରକୁ  ଭେଟିବେ। ଦକ୍ଷିଣ ଆଫ୍ରିକା ସେମିରେ ପ୍ରବେଶ କରିସାରିଛି । ଆଫଗାନିସ୍ତାନ ନିକଟରେ ମଧ୍ୟ ସୁଯୋଗ ରହିଛି । ମାତ୍ର ଶୁକ୍ରବାର ଦକ୍ଷିଣ ଆଫ୍ରିକାକୁ ୪୩୮  ରନ୍‌ ବ୍ୟବଧାନରେ ହରାଇ ପାରିଲେ ଆଫଗାନିସ୍ତାନ ସେମିରେ ପ୍ରବେଶ  କରିବ । ଯାହାକି ସମ୍ପୂର୍ଣ୍ଣ ଅସମ୍ଭବ ।  

ଦକ୍ଷିଣ ଆଫ୍ରିକା ଏଥର  ବିଶ୍ୱକପ୍‌ରେ ବିସ୍ଫୋରକ ବ୍ୟାଟିଂ  କରି ଆତଙ୍କ ଖେଳାଇ ରଖିଛି ।  କେବଳ ଭାରତ ଓ ନେଦରଲାଣ୍ଡ୍‌ସକୁ ଛାଡ଼ିଦେଲେ ଅନ୍ୟ ସବୁ ମ୍ୟାଚ୍‌ରେ  ଦକ୍ଷିଣ ଆଫ୍ରିକା ବିଶାଳ ସ୍କୋର ସଂଗ୍ରହ  କରିଛି । ତେଣୁ ଶୁକ୍ରବାର ମଧ୍ୟ  ଆଫଗାନିସ୍ତାନ ବିପକ୍ଷରେ ଧୂଆଁଧାର  ବ୍ୟାଟିଂ କରିବାକୁ ଦଳ ପ୍ରସ୍ତୁତ । 

୨୦୧୯ରେ ଗୋଟିଏ ହେଲେ ମ୍ୟାଚ୍‌  ଜିତିପାରି ନଥିବା ଆଫଗାନିସ୍ତାନ ଏଥର ୪ଟି ମ୍ୟାଚ୍‌ ଜିତିଛି । ଗତ ଅଷ୍ଟ୍ରେଲିଆ  ବିପକ୍ଷ ମୁକାବିଲାରେ ମଧ୍ୟ ଦଳ ଚମତ୍କାର  ପ୍ରଦର୍ଶନ କରି ବିଜୟ ସମ୍ଭାବନା ସୃଷ୍ଟି  କରିଥିଲା। ମାତ୍ର ଗ୍ଲେନ ମ୍ୟାକ୍ସୱେଲ୍‌  ଅପରାଜିତ ୨୦୧ ରନର ଇନିଂସ  ଖେଳି ବିଜୟ ଛଡ଼ାଇ ନେଇଥିଲେ । ଆଫଗାନିସ୍ତାନ ଏହି ପରାଜୟ ପରେ ମନୋବଳ ହରାଇ ବସିଛି । ମାତ୍ର ବୋଲିଂ ବିଭାଗ କିଛି ଚମତ୍କାର କରିବା ଆଶା  କରାଯାଉଛି । ମୋଟ୍‌ ଉପରେ ଦେଖିବାକୁ ଗଲେ ଶୁକ୍ରବାର ଦକ୍ଷିଣ ଆଫ୍ରିକା ବ୍ୟାଟର ଓ ଆଫଗାନିସ୍ତାନ ସ୍ପିନରଙ୍କ ମଧ୍ୟରେ ଅସଲ ଲଢେଇ ହେବ । 

ଅହମ୍ମଦାବାଦ ପିଚ୍‌ ବ୍ୟାଟିଂ  ପାଇଁ ଅନୁକୂଳ । ରାତ୍ରିରେ କାକର  ସମ୍ଭାବନା ନଥିବାରୁ ଟସ ବିଜୟୀ ଦଳ  ବ୍ୟାଟିଂ କରିବା ଏକପ୍ରକାର ନିଶ୍ଚିତ । ଆଫଗାନିସ୍ତାନର ସ୍ପିନରମାନେ ଏହି  ପିଚ୍‌ର ଫାଇଦା ଉଠାଇ ପାରିବେ । 

 -: ସମ୍ଭାବ୍ୟ ଦଳ :- 

ଦକ୍ଷିଣ ଆଫ୍ରିକା: କ୍ୱିଣ୍ଟନ ଡି କକ୍‌,  ତେମ୍ବା ବଭୁମା, ରାଶି ଭାନ ଡର ଡୁସେନ,  ଆଡେନ ମାରକ୍ରମ, ହେନରିକ କ୍ଲାସେନ,  ଡେଭିଡ୍‌ ମିଲର, ମାର୍କୋ ଜାନସେନ,  କେଶବ ମହାରାଜ, କାଗିସୋ ରାବାଡା,  ଲୁଙ୍ଗି ଏନ୍‌ଗିଡ଼ି, ତାବ୍ରେଜ ମାସସି ।  

ଆଫଗାନିସ୍ତାନ: ରହମନୁଲ୍ଲା  ଗୁରବାଜ, ଇବ୍ରାହିମ ଜାଦ୍ରାନ,  ରହମତ ଶାହ, ହସମତୁଲ୍ଲା ସାହିଦି  (ଅଧିନାୟକ), ଅଜମତୁଲ୍ଲା ଓମାରଜାଇ, ମହମ୍ମଦ ନବି, ଇକରାମ ଅଲିଖିଲ,  ରସିଦ ଖାନ, ମୁଜିବ ଉର ରେହମାନ,  ନବୀନ ଉଲ୍‌-ହକ୍‌, ନୁର ଅହମ୍ମଦ ।