କୋଲକାତା,୧୬/୧୧: ଗୁରୁବାର ଇଡେନ ଗାର୍ଡେନ୍ସରେ ଦ୍ୱିତୀୟ ସେମି ଫାଇନାଲ ଖେଳାଯିବ । ୪ଦିନର ଜୋରଦାର ଅଭ୍ୟାସ ପରେ ଉଭୟ ଦକ୍ଷିଣ ଆଫ୍ରିକା ଓ ଅଷ୍ଟ୍ରେଲିଆ ମଇଦାନରେ ବଳ କଷିବା ପାଇଁ ପ୍ରସ୍ତୁତ । ୫ଥର ଚାମ୍ପିଅନ୍ ହୋଇସାରିଥିବା ଅଷ୍ଟ୍ରେଲିଆ ଗୁରୁବାର ଆଉ ଏକ ଦମ୍ଦାର ପ୍ରଦର୍ଶନ ସହ ଫାଇନାଲ୍ରେ ପ୍ରବେଶ କରିବାକୁ ଯୋଜନା କରିଛି । କେବଳ ସେତିକି ନୁହେଁ, ଲିଗ୍ ମ୍ୟାଚ୍ ପରାଜୟର ପ୍ରତିଶୋଧ ନେବାକୁ ମଧ୍ୟ କଙ୍ଗାରୁ ଦଳ ଅପେକ୍ଷା କରି ରହିଛି । ଦକ୍ଷିଣ ଆଫ୍ରିକା ପ୍ରତି ବିଶ୍ୱକପ୍ରେ ଚମତ୍କାର ପ୍ରଦର୍ଶନ କରି ଆସୁଥିଲେ ହେଁ କେବେ ଫାଇନାଲ୍ ଖେଳିବାର ସୁଯୋଗ ପାଇନାହିଁ । ତେଣୁ ଦୀର୍ଘ ଦିନର ଅପେକ୍ଷାରେ ପୂର୍ଣ୍ଣଛେଦ ପକାଇବାକୁ ଦକ୍ଷିଣ ଆଫ୍ରିକା ନିକଟରେ ବର୍ତ୍ତମାନ ସଠିକ୍ ସମୟ ରହିଛି ।
ଅଷ୍ଟ୍ରେଲିଆ ପ୍ରଥମ ୨ଟି ମ୍ୟାଚ୍ରେ ଯଥାକ୍ରମେ ଭାରତ ଓ ଦକ୍ଷିଣ ଆଫ୍ରିକା ଠାରୁ ପରାଜିତ ହୋଇଥିଲା । ଏହାପରେ ଦଳ କ୍ରମାନ୍ୱୟରେ ୭ଟି ମ୍ୟାଚ୍ ଜିତି ସେମି ଫାଇନାଲ୍ରେ ପ୍ରବେଶ କରିଛି । ବର୍ତ୍ତମାନ ପ୍ରତ୍ୟେକ ଖେଳାଳି ଫିଟ୍ ଅଛନ୍ତି ଓ ଫର୍ମ ଫେରି ପାଇଛନ୍ତି । ଅଷ୍ଟ୍ରେଲିଆର ବ୍ୟାଟିଂ ବିଭାଗ ବିସ୍ଫୋରକ ବ୍ୟାଟିଂ ସହ ପ୍ରତି ୱିକେଟ୍ରେ ଉପଯୋଗୀ ଭାଗିଦାରୀ ଗଠନ କରିବାରେ ସଫଳ ହୋଇଛି । ଡେଭିଡ୍ ୱାର୍ଣ୍ଣର, ମିଚେଲ ମାର୍ଶ ଓ ଗ୍ଲେନ ମ୍ୟାକ୍ସୱେଲ ୨ଟି ଲେଖାଏଁ ଶତକ ଅର୍ଜନ କରିଛନ୍ତି । ଟ୍ରେଭିସ୍ ହେଡ୍ ମଧ୍ୟ ଶତକୀୟ ପାଳି ଖେଳିସାରିଛନ୍ତି । ଅଷ୍ଟ୍ରେଲିଆ ସବୁ ବିଭାଗରେ ତ୍ରୁଟି ସୁଧାରି ସାରିଛି ।
ଲିଗ୍ ପର୍ଯ୍ୟାୟରେ ଅଷ୍ଟ୍ରେଲିଆକୁ ହରାଇଥିବାରୁ ଦକ୍ଷିଣ ଆଫ୍ରିକାର ମନୋବଳ ଦୃଢ ରହିଛି । ମାତ୍ର ନକ୍ ଆଉଟ୍ ମୁକାବିଲାରେ ଚାପର ବଶବର୍ତ୍ତୀ ହୋଇ ପରାଜିତ ହେବା ଦକ୍ଷିଣ ଆଫ୍ରିକାର ସବୁଠୁ ବଡ଼ ଦୁର୍ବଳତା । ଅଷ୍ଟ୍ରେଲିଆ ୧୯୯୯ ଓ ୨୦୦୭ ବିଶ୍ୱକପ୍ ନକ୍ ଆଉଟ୍ରେ ଦକ୍ଷିଣ ଆଫ୍ରିକାକୁ ହରାଇଥିଲା । ଉଭୟ ଥର ଚାମ୍ପିଅନ୍ ଆଖ୍ୟା ଅର୍ଜନ କରିଥିଲା । ଚାପରେ ଭାଙ୍ଗିପଡ଼ିବାର ଲକ୍ଷଣ ଯୋଗୁଁ ଦକ୍ଷିଣ ଆଫ୍ରିକାକୁ ‘ଚୋକର୍ସ’ ନାମ ଦିଆଯାଇଛି । ମାତ୍ର ତେମ୍ବା ବଭୁମାଙ୍କ ଦଳ ଏଥର ସବୁ କଳଙ୍କ ଲିଭାଇବାକୁ ମନସ୍ଥ କରି ଭାରତ ଆସିଛି । ବିସ୍ଫୋରକ ବ୍ୟାଟିଂ ବଳରେ ଆତଙ୍କ ଖେଳାଇଥିବା ଦକ୍ଷିଣ ଆଫ୍ରିକାର ବୋଲିଂ ବିହାନୀ ନିକଟରେ ଯଥେଷ୍ଟ ଅଭିଜ୍ଞତା ରହିଛି । କାଗିସୋ ରାବାଡା, ଲୁଙ୍ଗି ଏନ୍ଗିଡ଼ି, ମାର୍କୋ ଜାନସେନଙ୍କୁ ନେଇ ଗଠିତ ପେସ୍ ବାହିନୀ ଅଷ୍ଟ୍ରେଲିଆ ବ୍ୟାଟରଙ୍କୁ ଚୁପ୍ କରାଇବାର କ୍ଷମତା ରଖିଛନ୍ତି ।
ବ୍ୟାଟିଂ ଓ ବୋଲିଂ ବିଭାଗକୁ ବିଚାରକୁ ନେଲେ ଉଭୟ ଦଳର ଶକ୍ତି ସମାନ । ନକ୍ ଆଉଟ୍ ମୁକାବିଲାରେ ଅଷ୍ଟ୍ରେଲିଆ ଅପେକ୍ଷାକୃତ ଅଭିଜ୍ଞ। ମୋଟ୍ ଉପରେ ଦେଖିବାକୁ ଗଲେ ଉଭୟ ଦଳର ବୋଲର ମ୍ୟାଚ୍ ଫଳାଫଳ ନିର୍ଦ୍ଧାରଣ କରିବେ । ଲିଗ୍ ପର୍ଯ୍ୟୟରେ ୨୨ଟି ୱିକେଟ୍ ନେଇସାରିଥିବା ଲେଗ ସ୍ପିନର ଆଡାମ ଜାମ୍ପାଙ୍କ ଉପରେ ନଜର ରହିବ ।
ଗୁରୁବାର ମ୍ୟାଚ୍ ପାଇଁ ପ୍ରସ୍ତୁତ କରାଯାଇଥିବା ପିଚ୍ ସବୁ ବିଭାଗକୁ ସହାୟତା କରିବ । କଳା ମାଟିରେ ପିଚ୍ ପ୍ରସ୍ତୁତ କରାଯାଇଛି । ଫଳରେ ସ୍ପିନର ମାନେ ବଲ୍କୁ ଟର୍ଣ୍ଣ କରାଇପାରିବେ । ପେସ୍ ବୋଲରମାନେ ଅତିରିକ୍ତ ବାଉନ୍ସ ପାଇବେ । ସତର୍କତାର ସହ କ୍ରିଜରେ ଜମି ରହିଲେ ବିଶାଳ ସ୍କୋରକୁ ମଧ୍ୟ ଅଟକାଇ ହେବ ନାହିଁ । ଗୁରୁବାର ପାଗ କୋହଲା ରହିବ । ବର୍ଷା ଆଶଙ୍କା ମଧ୍ୟ ରହିଛି । ଖେଳରେ ବ୍ୟାଘାତ ଘଟିଲେ ରିଜର୍ଭ ଦିବସରେ ମ୍ୟାଚ ଖେଳାଯିବ ।
ସମ୍ଭାବ୍ୟ ଦଳ
ଦକ୍ଷିଣ ଆଫ୍ରିକା: କ୍ୱିଣ୍ଟନ ଡି-କକ୍, ତେମ୍ବା ବଭୁମା/ରିଜା ହେଣ୍ଡରିକ୍ସ, ରାଶି ଭାନ ଡର ଡୁସେନ, ଆଡେନ ମାରକ୍ରମ, ହେନରିକ କ୍ଲାସେନ, ଡେଭିଡ୍ ମିଲର, ମାର୍କୋ ଜାନସେନ, କେଶବ ମହାରାଜ, କାଗିସୋ ରାବାଡା, ଗେରାଲ୍ଡ କୋଏଜି, ଲୁଙ୍ଗି ଏନ୍ଗିଡ଼ି ।
ଅଷ୍ଟ୍ରେଲିଆ: ଡେଭିଡ୍ ୱାର୍ଣ୍ଣର, ଟ୍ରେଭିସ ହେଡ୍, ମିଚେଲ ମାର୍ଶ, ଷ୍ଟିଭେନ ସ୍ମିଥ୍, ମାର୍ନସ ଲାବୁସାନ, ଗ୍ଲେନ୍ ମ୍ୟାକ୍ସୱେଲ୍, ଜୋସ ଇଂଲିଶ, ପ୍ୟାଟ୍ କମିନ୍ସ, ମିଚେଲ ଷ୍ଟାର୍କ,ଜୋସ ହାଜେଲଉଡ, ଆଡାମ ଜାମ୍ପା ।
