ଭୁବନେଶ୍ୱର, ୦୫/୦୨: ଆଜିଠୁ ଷୋଡ଼ଶ ବିଧାନସଭାର ଅନ୍ତିମ ଅଧିବେଶନ ଆରମ୍ଭ ହେବ । ନିର୍ବାଚନ ପୂର୍ବରୁ ଏହା ହେବ ବିଧାନସଭାର ଶେଷ ଅଧିବେଶନ । ଏହି ଅଧିବେଶନ ୫ରୁ ୧୩ ତାରିଖ ପର୍ଯ୍ୟନ୍ତ ଚାଲିବ । କାର୍ଯ୍ୟ ଦିବସ ମାତ୍ର ୭ଟି ଅଛି । ୮ ତାରିଖରେ କାମ ଚଳା ବଜେଟ ଆସିବ ।
ସୋମବାର ସକାଳ ୧୧ଟାବେଳେ ଗୃହ କାର୍ଯ୍ୟ ଆରମ୍ଭ ହେବ । ପ୍ରଥମ ଦିନରେ ରାଜ୍ୟପାଳ ରଘୁବର ଦାସ ଅଭିଭାଷଣ ରଖିବେ । ଏହି ଅଧିବେଶନ ପାଇଁ ରବିବାର ସନ୍ଧ୍ୟାରେ ବାଚସ୍ପତି ପ୍ରମିଳା ମଲ୍ଲିକ ସର୍ବଦଳୀୟ ବୈଠକ ଡାକିଥିଲେ । ଗୃହ କାର୍ଯ୍ୟ ସୁପରିଚାଳନା ପାଇଁ ସବୁ ଦଳର ସହଯୋଗ ଲୋଡ଼ିଥିଲେ ବାଚସ୍ପତି ।
ବିଧାନସଭା ପାଇଁ ବିଜେଡି ବିଧାୟକ ଦଳର ରଣନୀତି ବୈଠକ ସୋମବାର ସକାଳ ୧୦ଟା ୧୫ ମିନିଟରେ ଅନୁଷ୍ଠିତ ହେବ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦଳର ବିଧାୟକମାନଙ୍କୁ ଗୁରୁ ମନ୍ତ୍ର ଦେବେ । ସେହିପରି ସୋମବାର ପୂର୍ବାହ୍ନରେ ବିଜେପି ବିଧାୟକ ଦଳର ମଧ୍ୟ ବୈଠକ ରହିଛି ।
ସରକାରଙ୍କୁ ଘେରିବାକୁ କଂଗ୍ରେସ ରଣନୀତି ପ୍ରସ୍ତୁତ କରିଛି । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି, ବିଜେଡି-ବିଜେପି ଗୋଟିଏ ମୁଦ୍ରାର ଦୁଇ ପାଶ୍ୱର୍ ଭଳି କାମ କରୁଛନ୍ତି । ଏହି ପ୍ରସଙ୍ଗ ଉଠାଇ ଉଭୟ ଦଳକୁ କଂଗ୍ରେସ ଟାର୍ଗେଟ କରିବ । ଧର୍ମକୁ ନେଇ ଉଭୟ ରାଜ୍ୟ ଓ କେନ୍ଦ୍ର ସରକାର ରାଜନୀତି କରୁଛନ୍ତି । ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ୪୨୦୦ କୋଟି ଟଙ୍କା ଖର୍ଚ୍ଚ ହୋଇଥିବା କୁହାଯାଉଛି । ଏହାର ହିସାବ ଜନତାଙ୍କୁ ଦେବାକୁ ପଡ଼ିବ ।
ଜଗନ୍ନାଥ ମହାପ୍ରଭୁଙ୍କ ନାଁ ନେଇ ଭିକ୍ଷା ମାଗିଲେ ରାଜ୍ୟ ସରକାର । ସଂଗ୍ରହ ହୋଇଥିବା ଗୁଆ, ଚାଉଳ କଥା ବି ଉଠିବ । ସରକାରୀ ଟଙ୍କାରେ ଶିକ୍ଷାନୁଷ୍ଠାନରେ ପାଠପଢ଼ା ବନ୍ଦ କରି ନାଚଗୀତ କରାଯାଉଛି । ଶିକ୍ଷା, ସ୍ୱାସ୍ଥ୍ୟ ବିପର୍ଯ୍ୟସ୍ତ । ଦୁର୍ନୀତି, ଆଞ୍ଚଳିକ ବୈଷମ୍ୟ, ବେକାରୀ, ଦରଦାମ କଥା ବି ଉଠିବ ବୋଲି ଶ୍ରୀ ମିଶ୍ର କହିଛନ୍ତି । ବିରୋଧୀ ଦଳ ମୁଖ୍ୟ ସଚେତକ ମୋହନ ଚରଣ ମାଝୀ କହିଛନ୍ତି, ଏହା ଶେଷ ଅଧିବେଶନ । ଆଲୋଚନା ପାଇଁ ଅନେକ ପ୍ରସଙ୍ଗ ଅଛି । ହେଲେ ସମୟ ସୀମିତ । ଶାସକ ଦଳ ମାପିଚୁପି ଅଧିବେଶନକୁ ସଂକ୍ଷିପ୍ତ କରିଛନ୍ତି। ମୋଦି ବିକାଶର ଗ୍ୟାରେଣ୍ଟି କଥା କହୁଛନ୍ତି । ହେଲେ ଆୟୁଷ୍ମାନ ଭଳି କେନ୍ଦ୍ରର ବହୁ ଯୋଜନାରେ ରାଜ୍ୟ ସରକାର ବାଧକ ହେଉଛନ୍ତି । ବିକାଶ ନାଁରେ ରାଜ୍ୟ ସରକାର ଦେଇଥିବା ପ୍ରତାରଣା କଥାକୁ ବିଜେପି ଲୋକଙ୍କ ପାଖକୁ ନେବ ।
ସରକାରୀ ଦଳ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି କହିଛନ୍ତି, ବିଧାନସଭାକୁ ସୁରୁଖୁରୁରେ ଚଳାଇବା ପାଇଁ ସର୍ବଦଳୀୟ ବୈଠକରେ ସବୁ ଦଳ ଗଠନମୂଳକ ପରାମର୍ଶ ଦେଇଛନ୍ତି । ସ୍ୱଳ୍ପକାଳୀନ ଅଧିବେଶନରେ ଓଡ଼ିଶାର ସ୍ୱାର୍ଥ ସମ୍ବଳିତ ପ୍ରସଙ୍ଗରେ ଆଲୋଚନା ପାଇଁ ସରକାର ସବୁବେଳେ ପ୍ରସ୍ତୁତ ଅଛନ୍ତି ।